VOV4.Jarai-Thun blan rơgao, amăng tơring čar Tây Ninh hơmâo lu mơnuih Việt Nam, ƀuh tơlơi pơhing mơnuih mơnam facebook arăng plư lăi nao pơ dêh čar Kur mă bruă apah ƀong prăk blan lu. Sit biă gơ̆, lu mơnuih lê̆ luh arăng plư nao pơ dêh čar Kur mă bruă tơnap tap, arăng kơtư̆ juă ngă sat, mă bruă tơl truh 11 mông sa hrơi, mă bruă, tơnap tap đut hlah, arăng taih čom, ƀơi sĭ blơi mơnuih mơ̆ng kông ty anai nao pơ kông ty pơkŏn, tơl thâo laih, kơnong tơguan sang anŏ mơ-it nao prăk song glăi mơnuih dưi glăi pơ Việt Nam.

Tơlơi anai, ƀơi kual Dap Kơdư ăt hơmâo, mơnuih ƀôn sang ta khom kơđiăng. Tơlơi čih “Hơdôm čơđông plư lăi pơblih tơlơi hơdip ƀơi gah adih guai dêh čar”, lăi nao tơlơi anun pơ Tây Ninh.

Anom bruă tơhan pơlih mă mơnuih soh gah kông an tơring čar Tây Ninh brơi thâo, mơ̆ng akŏ thun truh ră anai, hơmâo tŭ mă 21 pok hră rơkâo djru nao pơklaih mơnuih sang anŏ mơ̆ng tơring čar arăng plư nao pơ dêh čar Kur mă bruă apah, ngă sat kơtư̆ juă, taih amang. Ƀing anai kiăng glăi pơ čar ta pô khom song hăng prăk kah dưi glăi. Tui hăng hơdôm sang anŏ lăi pơthâo, ană bă gơñu đuăi kơdop mơ̆ng sang anŏ, čih anăn rơkâo nao mă bruă pơ čar Kur, mă bruă kơ kông ty anăn Thiên Đường tơlơi ngui ngor.

Kông an Tây Ninh mă bruă hăng hơdôm sang anŏ hơmâo ană bă lê̆ luh arăng plư

Samơ̆ kơnong pơhiăp nao rai hăng telephôn laih anun thâo tui hăng tơlơi pơhaih anih ană bă dŏ hơmâo bruă mă, anih ƀong huă klă soh, tum teč bruă mă, tơlơi hơdip mơda lĕ ƀu thâo ôh. Bơngơ̆t bơngañ hăng ƀu hơđong ôh lơ̆m hmư̆ pơhiăp tepephôn, ană iâu brơi nao pơklaih ñu arăng kiăng song prăk kah brơi glăi mơ̆ng dêh čar Kur adih anun.

Amai Hồng, dŏ pơ tơring glông Dương Minh Châu, tơring čar Tây Ninh brơi thâo, ƀuh amĭ ñu tơnap tap, ană dra ñu thun anai kiah 17 thun, đuăi nao hơjăn ngă hră pơar nao pơ dêh čar Kur mă bruă kiăng ĕp prăk djru glăi kơ amĭ. Samơ̆, prăk blan ƀu ƀuh ôh, kơnong ƀuh amĭ ñu ră anai đuăi hyu yŭ ngŏ akŏ tlôn hơduah prăk kiăng song glăi ană:

“Phrâo anai ƀuh gơyut ñu arăng taih, pơkĕ hăng apui lơtrik laih anun sĭ kơ anih pơkŏn blơi, rung răng biă mă, iâu telephôn kiăng glăi tañ Việt Nam yơh. Kâo hơjăn păn đôč, ama ñu djai laih, kâo ăt ƀu anăm wai ñu yua kơ nao mă bruă rĭm hrơi”.

Dưi thâo, hrơi blan giăm anai tơlơi pơhing mơnuih ƀôn sang đuăi nao ča čot pơ dêh čar Kur, ngă tơnap tap kơ bruă ĕp mơnuih, yua tơlơi arăng kiăng mơnuih mă bruă kơ casino pơ dêh čar Kur lu tui. Tui hăng tơlơi pơhing Facebook, Zalo, Wechat, Instagram…ƀing soh sat plư mơ̆ng dêh čar Kur, gơñu čih tơlơi pơhing jak iâu, ĕp mơnuih mă bruă ƀong prăk blan lu laih anun prăk apah nao rai ƀong huă lĕ mơnuih dŏ pơ dêh čar Kur adih soh tla brơi hlâo.

Lơ̆m anun, ră anai mrô hlăk ai, tơdăm ngek dra muai Việt Nam hlăk hyu ĕp bruă mă, anun yơh ƀuh tơlơi jak iâu anun amuñ amĕ mơtam tŭ ư. Lơ̆m mơnuih hơduah bruă hăng mơnuih kiăng apah tŭ ư laih, hơmâo mơnuih pơ Việt Nam, pơgiăng nao hăng jơlan amrĕ đôč, đuăi nao ƀu hơmâo hră pơar ôh truh pơ dêh čar Kur. Ayong Tùng dŏ pơ tơring glông Gò Dầu, hơmâo ană hlăk dŏ mă bruă pơ dêh čar Kur bơngơ̆t biă mă:

"Prăk blan mă bruă lăi pơhlưh amăng prăk huă, anih dŏ, ha blan ƀuăn hlâo lăi hơdôm hơpluh klăk prăk mơtam, samơ̆ gơñu djă pioh abih ƀu brơi mă ôh. Ană kâo lăi ñu pơkra anŏ ngui game, mă bruă mơ̆ng 10 mông mơguah truh 10 mông mlăm, ƀơi anŏ ia ăt ƀu hơmâo mơñum lơi”.

Amai Sen ăt dŏ pơ tơring glông Gò Dầu laih anun hơmâo ană dŏ mă bruă pơ dêh čar Kur lăi:

“Pơhiăp telephôn kiăng glăi yơh, ñu lăi amĭ prăp lui prăk song glăi, yua kơ hơmâo laih gơyut ñu phrâo anai arăng sĭ lui baih, 31 klăk ƀudah 34 klăk prăk amăng 2,3 hrơi đôč dưi glăi yơh. Ñu lăi prăp lui mơ̆ng 30-40 klăk prăk tui anun lah, ƀu thâo rơđah lơi hơdôm”.

Giong tơña lăng tong ten, lơ̆m ƀing arăng mă nao pơ dêh čar Kur, tơdah khua kông ty lăng mơnuih mă bruă ƀu djơ̆ hăng anŏ gơñu kiăng lĕ gơñu sĭ pô anun kơ kông ty pơkŏn hăng rơnoh yôm hloh hlâo kơ anun. Tơdah pô anun kiăng glăi pơ Việt Nam lĕ khom iâu sang anŏ ĕp prăk song glăi. Ƀing soh sat lăi pơthâo prăk song glăi 1.800 USD, dưm dưm hăng 40 klăk kah dưi song glăi pơ Việt Nam, tơdah ƀu hơmâo ôh lĕ sĭ pô anun kơ kông ty pơkŏn blơi, lơ̆m anun prăk song glăi amra lu hloh dơ̆ng.

Ră anai, anom bruă tơhan pơlih mă mơnuih soh gah kông an Tây Ninh hơmâo pơtô lăi kơ mơnuih ƀôn sang, răng kơđiăng hăng tơlơi pơhing amăng facebook, arăng čih plư lăi mă bruă prăk blan lu, bruă mă ƀu gleh ôh samơ̆ prăk lu tơdah nao pơ dêh čar Kur mă bruă, sa blan truh 20 klăk prăk; huăi huač prăk ngă hră pơar, ƀu tơguan hơmâo hră ƀăng hơgĕt ôh, tŭ kơ thâo tơčoh măi đôč….

Anai yơh tơlơi pơhing ngă kơ lu mơnuih hlăk dŏ pơmin ĕp bruă hyuk ƀong prăk lu, pơblih tơlơi hơdip phara pơ anih ƀing soh sat dưm laih čơđông kap pơ anăp adih. Tui hăng anom bruă tơhan pơgang rơnuk rơnua pơtom hiăp gah kông an Tây Ninh mơ̆n, mơ̆ng blan 9/2021 truh ră anai, tơhan kơnuk kơna dêh čar Kur lăi pơthâo hơmâo 9 čô mơnuih pơdjai drơi pô, kơdâo mơ̆ng sang dlông tal, rôt tơkuai, đơ đa rơngiă hlao ƀu thâo nao pơpă ôh....

Kông an Tây Ninh pơtă kơ mơnuih ƀôn sang anăm hmư̆ ôh tơlơi plư mơ̆ng ƀing soh sat

Pơdjơ̆ nao tơlơi soh sat đuăi dêh čar tač rơngiao ča čot, mơ̆ng lơ 1/1 truh lơ 1/4/2022, kông an Tây Ninh pơsir 17 mơta tơlơi hăng 38 čô mơnuih ngă soh, hơmâo tơlơi mơ̆ng thun 2021 pơsir aka giong, tơgŭ kơđi 9 wơ̆t hăng 16 čô mơnuih soh; hlăk ĕp kơđi 7 wơ̆t tơlơi soh hăng 22 čô mơnuih soh. Mơ̆ng akŏ thun truh ră anai, hơmâo 59 čô mơnuih ƀôn sang Việt Nam dưi hơmâo sang bruă khua anih jưh pơ ala Việt Nam ƀơi dêh čar Kur brơi glăi, pơ anăp anai dŏ 14 čô dơ̆ng. Kông an Tây Ninh lăi lui hlâo, mơnuih ƀôn sang hmư̆ hiăp arăng plư, đuăi nao pơ dêh čar Kur ĕp bruă mă lê̆ luh đôč.

Laih dơ̆ng anăm djru ƀing soh sat plư brơi đuăi nao pơ dêh čar Kur ča čot, tơda hmư̆ hing lăi hmư̆ kông an mơtam.

Thượng tá, Trần Minh Kiệt, Kơ-iăng Khua anom tơhan pơgang rơnuk rơnua pơtom hiăp gah kông an Tây Ninh brơi thâo:

“Kông an Tây Ninh pơtă kơ mơnuih ƀôn sang anăm hmư̆ ôh tơlơi plư pleč lăi mă bruă hyuk ƀong prăk blan lu pơ dêh čar tač rơngiao ƀu hơmâo ôh lah. Čang rơmang mơnuih ƀôn sang ta hơduah ĕp sang bruă kơnuk kơna, hơmâo hră pơar mă bruă pơčrâo brơi bruă mă, djru pơgang ba mơnuih ƀôn sang dêh čar ta hơđong ƀiă”.

Ƀuh rơđah kiăng ĕp bnruă mă lăp yơh. Samơ̆, mơnuih ƀôn sang khom pơđing hmư̆ laih anun thâo tong ten tơlơi pơhing ĕp bruă mă, kơñ lê̆ luh arăng đôč, jing mơnuih arăng ngă sat, arăng sĭ mơdrô ngă hlun mơnă. Pơgăn bruă ngă sat djơh hăng anai, dưi pơgang tơlơi rơnuk rơnua hơđong kơ mơnuih mơnam amăng tơring čar, plơi pla.

Nay Jek: Pơblang