Pioh lu mông đing nao lăng tui hơdôm bôh yôm mơng tal jơnum lok 4, Khua pơ ala mơnuih ƀôn sang dêh čar ta tal 15, ơi Võ Tấn Tài, Kơ-iăng Khua Khul pơlir hơbit hơdôm khul grŭp giăng mah tơring čar Daklak, Khua hơđăp apăn bruă Djuai ania – Tơlơi đăo Grŭp črâo ba kual Dăp Kơdư mơ-ak biă hăng bôh tơhnal 94,38% mrô khua pơ ala mơnuih ƀôn sang tŭ ư, Tơlơi pơtrun pơsit kơ pơphô sa dua hơdră pơkă, hơdră bruă gum djru pha ra pơđĭ kyar plơi prong Buôn Ma Thuột, tơring čar Daklak hmâo sit nik dưi pel ĕp. Ơi Võ Tấn Tài brơi thâo:

 “Hăng sa čô mơnuih mơng plơi prong Buôn Ma Thuột ƀing gơmơi ƀuh kơ-ak biă kơ tơlơi lăng ba mơng Ping gah hăng Kơnuk kơna pioh kơ bruă pơdŏng plơi prong Buôn Ma Thuột. Ƀing gơmơi pơmin lĕ Buôn Ma Thuột lăi ha jăn hăng Daklak lăi hrom tơdơi kơ dưi hmâo Khua pơ ala mơnuih ƀôn sang pel ĕp hơdră pơkă pha ra pơđĭ kyar hơneč mă hrơi mông ngă gal brơi hăng ngă tui tơlơi gir run mơng pô kiăng pok pơhai hơdră pơkă pha ra hăng lu hơdră bruă rơđah rơđông ngă gal brơi kơ rim gơnong bruă rim mơta bruă pơmut hrom pran kơtang pơdŏng plơi prong Buôn Ma Thuột sit nik jing anih anom phun”.

Tui hăng ơi Thái Hồng Hà, Khua Gơnong bruă bôh thâo bơkơjăp drơi jăn hăng tuai čuă ngui Daklak: Tơlơi pơtrun pơsit dưi pel ĕp hmâo hrom hăng hơdôm tơlơi pơkă pơphô hlâo sa dua mơta tơlơi pơkă, hơdră bruă pha ra pioh kơ plơi prong Buôn Ma Thuột, tơring čar Daklak kơ wai lăng prăk kak, ngăn drăp kơnuk kơna; pơpha gưl wai lăng kơnuk kơna amăng pơkă kual lŏn; đing nao ngă pơhư̆č tuh pơplai; đing nao hăng mơnuih juăt bruă, mơnuih kơsem min hăng mơnuih hmâo bôh thâo pha ra. Yua anun, ơi Thái Hồng Hà čang rơmang:

 “Khua pơ ala mơnuih ƀôn sang sit nik pel ĕp hơdôm hơdră pơkă, pha ra, 5 hơdră pơkă lĕ mơ-ak biă. Anun ăt lĕ gru nam, jing gru, pran kưl đĭ mơ̆ mơng anun gir run pơdŏng hiưm hơpă tui tơlơi klah čun 67 mơng Ding jum kơđi čar hăng Tơlơi pơtrun pơsit 103 amăng ƀrư̆ pơdong Buôn Ma Thuột jing anih anom phun tui Tơlơi pơtrun pơkă 23 phrâo anai”.

Đam amăng mông jơnum tui tơđar blan 10 mơng Jơnum min mơnuih ƀôn sang tơring čar Daklak mơtăm, ơi Phạm Ngọc Nghị, Khua Jơnum min mơnuih ƀôn sang tơring čar hmâo rơkâo laih hơdôm gơnong bruă, anom bruă plơi pla tŭ mă mơtăm hơdôm hơdră pơkă pha ra phrâo dưi hmâo Khua pơ ala mơnuih ƀôn sang pel ĕp kiăng plơi prong tañ ngă tui bruă pô, bruă jao wai lăng kơnuk kơna hăng gong gai plơi prong, djru mơnuih ƀôn sang klă hloh. Ơi Phạm Ngọc Nghị lăi rơđah:

 “Rơniao kơ hơdôm bôh yôm amăng tơlơi lăi pơthâo lĕ rơkâo ƀing gih khom đing nao hơdră pơkă pha ra kơ Buôn Ma Thuột, dưi pel ĕp laih lĕ ƀing ta khom tŭ mă mơtăm amăng jơlan hơdră 2023 kơ hơdră pơkă Buôn Ma Thuột hăng lu Tơlơi pơtrun pơsit mơng Gong gai dêh čar, Ping gah dêh čar lĕ Jơnum khom gơgrong ba mut kiăng pơphô kơ Grŭp mă bruă”./.