Amăng jơnum Khua pơ ala mơnuih ƀon sang laih rơgao hơmâo lu mơnuih djuai ania ƀiă đing nao bruă bơdjơ̆ nao bơwih brơi tơlơi hơdip mơda kơ mơnuih ƀon sang. Amăng anun, mơnuih ƀon sang đing nao hloh bruă wai lăng nua sĭ mơdrô gơnam pioh bơwih ƀong huă hăng pơsir hơdôm tơlơi ngă gun amăng tơlơi pơkă, hơdră bruă. Tơlơi anai yôm phăn biă lơ̆m tơlơi bơwih ƀong huă - mơnuih mơnam amăng lŏn ia glăk amăng hrơi blan hơkrŭ glăi tơdơi kơ abih klin hăng glăk dong ƀơi anăp lu tơlơi lông, ngă tơlơi hơdip kơ mơnuih ƀon sang bưp tơnap tap. Kiăo tui lăng hơdôm hrơi pơčrông sai amăng gong pơdah rup, mơnuih ƀon sang djop djuai ania ƀơi hơdôm tơring čar kual ataih đing nao bruă bơwih ƀong huă, đĭ tui prăk pơhrui kơ mơnuih kual tơnap tap. Tạ Minh Nhất, dŏ ƀơi să Tân Hương, tơring glông Yên Bình brơi thâo:

“Kơnong bruă pơđĭ kyar bơwih ƀong huă kơ mơnuih djuai ania ƀiă, kual ataih, asuek, tui kâo pơmĭn, kiăng Khua pơ ala mơnuih ƀon sang dêh čar, kơnuk kơna hăng djop ding jum, gơnong bruă hơmâo hơdră tong ten kiăng pơđĭ kyar hơdôm phun pla gah yŭ phun kyâo glai, biă mă ñu hơdôm phun akha kyâo, kiăng kơ hơmâo dong lŏn pla kyâo, bruă mă, lu dong prăk pơhrui brơi mơnuih ƀon sang kual ataih, asuek, laih dong plai ƀiă ƀuh mơnuih sua mă lŏn glai, phă glai rưng kiăng kơ hơmâo lŏn ngă đang hmua”.

Kơ bruă kiăng wai lăng kjăp sĭ mơdrô kmơk pơ tač rơngiao kiăng kơ plai ƀiă glêh tơnap kơ mơnuih ƀon sang, ayong Vũ Duy Dũng dŏ ƀơi tơring čar Điện Biên brơi thâo, tơdah ƀu đing nao, ƀu pơsir hĭ tañ amra ba truh kơ bruă mơnuih ƀon sang mah pla pơjing lu gơnam đang hmua hăng pơhlôm djop pơdai kơtor brơi mơnuih mơnam, samơ̆ ƀing gơñu amra rơmon rơpa.

“Ră anai, nua kmơk đĭ kơtang, anun lĕ nua sĭ kmơk Đạm đĭ mơng 9.000 truh 19.000, mơnuih ƀon sang ngă đang hmua pơhrui glăi ƀu hơmâo, tơlơi bơwih ƀong gơnang nao ngă hmua; hăng bruă rông hlô mơnong, nua blơi gơnam ƀong brơi hlô rông ăt đĭ 5 wŏt, mơnuih rông hlô ră anai glăk pơhrui glăi ƀrô hăng rơnoh tuh pơ alin ƀudah aset ƀiă, ƀu hơmâo kmlai yua anun lui hĭ rông. Ƀing gơmơi čang rơmang Kơnuk kơna tañ hơmâo hơdră pơđĭ kyar kual pla pơjing amăng dêh čar, kiăng kơ plai ƀiă blơi mut mơng tač rơngiao kiăng pơhlôm gơnam ƀong brơi hlô rông, tơdah ngă tui anun kah dưi trun nua gơnam ƀong brơi hlô rông hăng mơnuih ƀon sang kah pơhrui hơmâo hmăi kiăng tŏ tui pơđĭ kyar”.

Pơhmutu hăng tơlơi bơwih ƀong huă ƀơi Việt Nam ăt glăk bơbeč nao kơtang yua klin Covid-19, rơnoh pơhrui 2,95% thun 2020 hăng thun 2021 lĕ 2,6%, ơi Phạm Văn Hoà, Khua pơ ala mơnuih ƀon sang tơring čar Đồng Tháp lăi pơthâo: 2 thun ư̆ añ, găn rơgao lu tơlơi tơnap tap, ră anai mơnuih ƀon sang glăk glăm ba lu tơlơi glêh glar lơ̆m nua ia săng, ia jâu đĭ kơtang hloh, tơlơi anai bơdjơ̆ nao bruă sĭ mơdrô gơnam tam pơkŏn, nua pơdŭ pơgiăng, ngă kơ lu gơnam pơkŏn đĭ nua. Anai lĕ hrơi mông kiăng pơmĭn nao lu hơdră pơsir kiăng djru brơi mơnuih ƀun rin:

“Mơng anai truh rơnuč thun ngă hiưm pă gir run kơtang hloh kiăng pơgăn prăk kak trun nua hăng tơdah prăk trun nua Kơnuk kơna ta dưi pơhlôm brơi, anai lĕ sa tơlơi rơkâo yôm phun kiăng pơhlôm brơi tơlơi hơdip mơda, pơhlôm brơi ƀing mơnuih rin rơpa huăi tơnap tap amăng tơlơi hơdip, sit biă ñu mơnuih ƀon sang hơmâo prăk pơhrui aset hăng pơhlôm brơi bruă pơkra pơjing sĭ mơdrô gơnam ră anai glăk bưp tơnap tap”.

Tui khua mua amăng Kơnuk kơna, kiăng đing nao gơnong bruă ngă hmua, sa gơnong bruă akŏ phun kiăng pơhlôm hơđong amăng thun blan dêh čar bưp tơnap tap lơ̆m nua kmơk, nua gơnam ƀong brơi hlô rông hăng gơnam pioh ngă hmua lêng kơ đĭ soh. Ơi Nguyễn Tạo, Khua pơ ala mơnuih ƀon sang tơring čar Lâm Đồng brơi thâo:

“Rơkâo Kơnuk kơna hơmâo hơdră pơhlôm brơi hmao tlôn kiăng bong glăi nua sĭ mơdrô glăk đĭ kơtang mơng kmơk, gơnam yua amăng ngă đing hmua, ia săng ia jâu. Laih dong ăt hơmâo hơdôm hơdră kiăng bong glăi khut khăt bruă sĭ dŏp, sĭ gơnam ča čot, biă mă ñu hăng bruă sĭ kmơk, ia jrao pơgang phun pla pơkra mă ča čot. Đing nao pơsir hĭ bruă ngă hră pơ-ar kiăng pơtrut tañ bruă jao prăk tuh pơ alin bruă čar, sit biă ñu lĕ 3 jơlan hơdră tui hơnong pơkă dêh čar, jơlan hơdră man pơdong plơi pla phrâo, jơlan hơdră pơhrŏ trun ƀun rin, jơlan hơdră ngă tui tơlơi pơtrun mrô 88 pơđĭ kyar bơwih ƀong huă kual mơnuih djuai ania ƀiă, kual ataih, asuek”.

Ơi Nguyễn Quang Thi, Khua pơ ala mơnuih ƀon sang tơring čar An Giang ăt brơi thâo, Kơnuk kơna kiăng hơmâo dong lu hơdră bruă kiăng bruă ngă hmua sit nik pơhlôm tui tơlơi yôm lĕ ngă gong phun amăng bơwih ƀong huă:

“Rơkâo Khua pơ ala mơnuih ƀon sang dêh čar, Kơnuk kơna tŏ tui hơmâo tơlơi pơkă, hơdră bruă lăp djơ̆, pơtrut pơđĭ kyar bơwih ƀong huă tui khul grup amăng ngă hmua, hơdră djru lăp djơ̆ amăng lŏn mơnai, mă jia, čan prăk hăng boh thâo măi mok”.

Hrŏm hăng anun, Yă Hồ Thị Kim Ngân, Khua pơ ala mơnuih ƀon sang tơring čar Bắc Cạn brơi thâo, kiăng pơplih tơlơi pơmĭn pơđĭ kyar pơlir hơbit djop kual, kah pha hăng mă yua ngăn drăp kiăng pơđĭ kyar amăng kual, amăng anun kơtưn jao brơi tui gưl, gơgrong hăng glăm ba mơng rĭm boh ƀon lan:

“Rơkâo Khua pơ ala mơnuih ƀon sang dêh čar, Kơnuk kơna sem lăng, pơpha hluai tui tơlơi dưi brơi kơ Khul pơ ala mơnuih ƀon sang tơring čar kơ bruă pơplih mă yua glai rưng sô hơđăp, lŏn ngă hmua pơdơi prong pơ yŭ 20 ektar hăng pơplih yua glai wai pơgang, glai pla glăi pơ yŭ 30 ektar kiăng ngă gêh gal amăng bruă pok pơhai ngă tui hơdôm hră pơ-ar tuh pơ alin”.

Lu hơdră djru pơsir tơnap tap, pok mă yua ngăn drăp kiăng pơđĭ kyar bơwih ƀong huă-mơnuih mơnam hơmâo Khua pơ ala mơnuih ƀon sang ba tơbiă amăng Jơnum Khua pơ ala mơnuih ƀon sang dêh čar hơdôm hrơi laih rơgao. Ƀing khua mua kah hăng mơnuih ƀon sang kual tơnap tap čang rơmang hơdôm bruă gun găn, tơnap tap amra pơsir hĭ hmao tlôn, hơmâo tơlơi pơsit lăp djơ̆ hăng pơplih phrâo, mơng anun amra pơtrut kơtang kiăng hơkrŭ glăi, hơđong bơwih ƀong huă, pơhlôm brơi tơlơi hơdip mơda, ngă pơgiong hơdôm hơnong pơkă amăng pơđĭ kyar bơwih ƀong huă mơnuih mơnam thun anai.