Lơ̆m hmư̆ hing hơmâo hră čih pioh mơ̆ng rơkơi bơnai ơi ia jrao Đào Ngọc Thạnh hăng Mai Thị Kim Ngân ƀơi phường Cẩm Thành, tơring čar Quảng Ngãi, sang anŏ yă Trần Thị Sô, să Tịnh Khê, tơring čar Quảng Ngãi hơđăp gir tui nao ĕp tơl sang či pơhmu lăng. Ƀơi mrô 46 amăng hră čih pioh, anăn “Trần Thị Lê” ƀuh ƀrač, djơ̆ hrŏm soh hăng hră kơđŏm anăn pô djai mơ̆ sang anŏ yă Sô glăk djă pioh. Phun tơhnal hơmâo mơ̆ng hră sô kơnô anun ngă phôn pran sang anŏ, čang rơmang tơdơi kơ lu thun hyu ĕp adơi ayong kơnung djuai amra ƀuh. Yă Trần Thị Sô, adơi tơhan djai drơi kơ lŏn ia Trần Thị Lê ră ruai ol kơdol: “Kâo mơak biă lơ̆m hmư̆ tơlơi pơhing met ba đĭ amăng plang mơnuih mơnam. Ĕp rơđah, ƀuh anăn Trần Thị Lê jing kâo mơak kơtang kơtit. Kâo tơguan adơi ayong hyu ĕp brơi, kiăng ĕp ƀuh tơlang tơleh amai kâo, či ba glăi dor pơ pơsat tơhan să gơmơi”.

Thun anai ñu 96 thun laih, samơ̆ ơi ia jrao y sĩ Đào Ngọc Thạnh ăt dŏ hơdor mơn, hơdor anih sang ia jrao arăng iâu Bệnh xá B23 đưm adih, hăng anih dor lu ling tơhan đưm hlâo. Ñu brơi thâo, hră čih pioh djŏp plơi pla, anih mă bruă, hrơi djai hăng bruă pơjrao mơ̆ng 181 čô tơhan. Hrơi djai čih amăng hră jing hrơi djơ̆ sit mơtăm yơh lơ̆m ƀing tơhan tơ̆i pran ƀơi sang ia jrao, yua hnun ăt pleh ploh mơn pơhmu hăng hră pơthâo mơnuih djai mơ̆ng anom bruă. Lăi glăi dong kơ tơhan pơsăn drơi Trần Thị Lê, ơi Đào Ngọc Thạnh dŏ hơdor đôč: “Trần Thị Lê, tơdah ƀu hơmâo anŏ pơplih mơ̆ng khul tơhan tơring glông Trà Bồng lĕ dŏ đam ƀơi Cà Đam. Anai jing sit mơtăm yơh, kâo yơh pô ngă, lăi pơthâo hăng sang anŏ gih djơ anun”.

Hơdôm tơlơi čih pioh hrŏm hăng tơlơi dŏ hơdor mơ̆ng ơi Thạnh glăk jing tơlơi pơhing akŏ phun yom biă mă, djru kơ bruă mă 500 hrơi mlăm mơ̆ng tơring čar Quảng Ngãi. Nao čuă sang anŏ hăng tŭ mă hră čih pioh, Đại tá Trịnh Công Sơn, Kơ-iăng khua kơđi čar Sang bruă khua git git tơhan tơring čar Quảng Ngãi ol kơdok mơn lơ̆m ƀuh boh hră čih dŏ hơnong đôč anŏ yom ñu: “Kiăo tui hơdôm tơlơi pơhing anai, Khul git gai bruă mơ̆ng tơring čar Quảng Ngãi sem lăng glăi dong, pơhmu nao rai hăng hơdôm tơlơi pơhing glăk hơmâo, laih dong pơhmu lăng amăng hră lơkak dong. Biă ñu kiăo tui tơlơi tum pơƀut mơ̆ng plơi pla hăng gru phun đưm adih mơ̆ng Quảng Ngãi amăng rơnuk blah wang, či sem lăng, pel ĕp pơ anih hmư̆ hing”.

Hră čih pioh mơ̆ng ơi ia jrao Bệnh xá B23 đưm adih ƀu kơnong jing gơnam djă pioh mơ̆ng rơnuk blah wang đôč ôh, ăt jing apui tơlŭi jă bơngač ba jơlan hyu ĕp ƀing gŏp. Hơdôm tơlơi pơhing yom anun amra hơmâo ling tơhan, mơnuih apăn bruă hyu ĕp, sem lăng, pơsit rơđah; djru ngă bơrơđah djŏp tơlơi hmư̆ hing, djŏp phun tơhnal, kiăng tañ glăi glăi ƀing tơhan pơ plơi pla, anih amĭ ƀă yă pơjing.