Ding jum Pơtô hăng Pơjuăt lăi pơtong, tơlơi pơmin mơ̆ng Ding jum lĕ ƀu kom ôh bruă pơtô thim, hrăm pơhrua gah rơngiao samơ̆ khom hơmâo tơlơi pơkă sit nik rơđah rơđong, tơlơi pơtrun brơi djơ̆ găl wai lăng klă hloh bruă pơtô thim, hrăm pơhrua gah rơngiao kơ mông hrăm sit nik ƀơi sang hră.

Hơmâo ană dŏ hrăm sang hră gưl sa, samơ̆ amai Nguyễn Thu Hương dŏ ƀơi kuân Hai Bà Trưng, ƀôn prong Hà Nội brơi ană ñu ƀu hrăm dơ̆ng tah gah rơngiao, ta juăt lăi hrăm pơhrua ƀudah hrăm thim yua kơ ană bă ñu hrăm abih ha hrơi laih ƀơi sang hră. Yua kơ anun, lơ̆m Ding jum Pơtô hăng Pơjuăt ngă hră Pơtô ba mrô 29 pơkă kơ bruă pơtô, hrăm pơhrua, ñu ƀuh mơak hăng dong yua biă mă tơlơi pơtrun phrâo anai:

“Kâo tŭ ư biă hăng tơlơi pơtrun djop anih hrăm amăng gưl sa ƀu hrăm pơhrua dơ̆ng tah hơdôm tơlơi hrăm phun. Yua kơ ƀing čơđai sang hră gưl 1, kâo pơmin hơdôm tơlơi hrăm amăng sang hră, ƀing nai pơtô djop laih, ƀing čơđai hrăm dŏ glăi pơ sang hră abih ha hrơi, tlam mơguah mơtam, tơdah hrăm pơhrua dơ̆ng amăng tlam mơmŏt sit mơ̆n ƀu hơmâo pran jua dơ̆ng tah. Tơdah hrăm pơhrua lĕ ƀing čơđai hrăm hơdôm tơlơi hrăm anŏ gơñu hor, anŏ thâo phara gêh găl hăng hnơr thun gơñu”.

Ƀơi tơring čar Dak Lak, tơdơi kơ hơmâo Hră Pơtô ba mrô 29/2024/TT-BGDĐT, mơ̆ng Ding jum Pơtô hăng Pơjuăt čih pơtrun ,ngă tui mơ̆ng lơ 14/2, lu sang hră ƀơi Dak Lak hlong pơdơi mơtam bruă pơtô hrăm thim, pơkă glăi akŏ bruă dăp brơi pơtô hrăm kiăng gêh găl hăng tơlơi pơtrun phrâo. Djop sang hră ƀơi Dak Lak ăt lăi pơthâo tơlơi pơkă phrâo kơ ƀing nai pơtô, čơđai sang hră hăng amĭ čơđai sang hră. Ơi Võ Ngọc Nam, Khua sang hră gưl dua Phan Chu Trinh, plơi prong Ƀuôn Ma Thuột, tơring čar Dak Lak brơi thâo, sang hră gơñu hơmâo pơphun mông pơtô lăi kiăng pơthâo boh yom phun mơ̆ng Hră pơtô ba mrô 29, jing Thông tư anun kơ abih bang nai pơtô, amĭ ama čơđai sang hră hăng čơđai sang hră thâo hluh. Laih dơ̆ng brơi abih bang ƀing nai pơtô khom ngă hră ƀuăn rơ̆ng ngă tui tơpă, bruă pơtô pơhrua, hrăm pơhrua tơdah hơmâo. Hrŏm hăng anun, sang hră ăt jŭ yap glăi abih bang, ming pơkra glăi hơdră pơtô hrăm kiăng gêh găl hăng tơlơi Pơtô ba anun.

Nai Nguyễn Thị Thu Hiền, pơtô tơlơi hrăm Ngữ văn ƀơi sang hră gưl dua Phan Chu Trinh lăi, Hră pơtô ba mrô 29 djơ̆ biă mă. Sa tơlơi dơ̆ng, lu amĭ ama čơđai sang hră ăt kiăng pơtô thim, pơhrăm brơi kơ ană bă gơñu lu hloh, biă mă ñu čơđai sang hră anih 9, anih 12 prăp či pơplông abih anih. Yua kơ anun, hơmâo tơlơi pơtô ba, pơblang glăi rơđah pioh kơ amĭ ama ƀing čơđai sang hră huăi sư̆ rơbư̆, hŭi ƀu thâo brơi ană hrăm pơhrua pơpă mơ̆ng djơ̆.

Tui hăng ơi Võ Đức Tân, hơmâo ană hrăm anih 11 ƀơi tơring glông Čư̆ Kuin, tơring čar Dak Lak, Hră Pơtô ba 29 djru kơ čơđai sang hră kiăng hơmâo lu mông ngă bruă sit nik gah rơngiao, huăi kơniă đơi amăng tơlơi hrăm. Khă tui anun, hăng ƀing čơđai sang hră anih hrăm rơnuč lĕ, bruă hrăm pơhrua, pơhrăm glăi kiăng biă mă. Ană bă dŏ hrăm anih 11, ñu čang rơmang lĕ, djop gưl anom bruă kơnuk kơna tañ hơmâo hră pơčrâo brơi tong ten kiăng kơ čơđai sang hră hơmâo anih hrăm pơhrua glăi djop samơ̆ huăi ngă soh tơlơi Pơtô ba.

Tui hăng Tơlơi Pơtô ba anun mơ̆ng Ding jum Pơtô hăng Pơjuăt, ƀu dưi pơtô hrăm thim kơ čơđai sang hră gưl sa ôh, kơnong hơdôm tơlơi hrăm gah adoh suang, pơrơguăt drơi jăn, pơtô hrăm hơdră dŏ dong ƀong huă amăng tơlơi hơdip mơda đôč kiăng hrăm pơhrua ga rơngiao mông hrăm hră. Ƀing nai ƀu dưi pơtô pơhrua ôh gah rơngiao mông hrăm pơ anih, pơ sang hră laih anun ƀu dưi pơhrui mă prăk apah hrăm thim lơi. Hơdră ngă anai, kiăng pơgăn bruă ƀing nai pơtô ba čơđai sang hră anih ñu pơtô glăi hrăm pơ sang mă prăk apah hrăm thim, kah hăng pơgô̆ ƀing amĭ ama čơđai sang hră khom brơi ană bă hrăm thim, laih dơ̆ng kơtưn pơđĭ tui  tơlơi gơgrong ba mơ̆ng ƀing nai amăng bruă wai lăng tong ten bruă hrăm pơhrua gah rơngiao. Tui hăng yă Khúc Thị Huệ, Khua sang hră gưl klâo Ngọc Hồi, tơring glông Thanh Trì, Hà Nội, hơdôm tơlơi pơtrun amăng hră pơtô ba mrô 29 amra djru pơsir hơdôm mơta tơlơi aka ƀu klă mơ̆ng hlâo adih, mơ̆ng ƀing amĭ ama čơđai sang hră pơdjơ̆ nao kơ bruă pơtô, hrăm pơhrua thim amăng sang hră laih anun pơ sang anŏ ƀing ngă nai pơtô gah rơngiao mông hrăm sit nik. Sang hră ngă tui djơ̆ hră pơtô ba ăt ka hăng tơlơi pơtô pơblang glăi mơ̆ng Gơnong bruă Pơtô hăng Pơjuăt Hà Nội pơtrun:

“Sang hră pơdơi jăng jai bruă pơtô pơhrăm glăi kơ čơđai sang hră mơ̆ng lơ 14/2. Thun anai, ăt pơtô pơhrăm glăi kơ čơđai sang hră hrăm anih 12 hăng lu čơđai či hrăm glăi, pioh pơtô pơhrua hrŏm amăng mông hrăm ƀơi anih hrăm amăng sang hră, ƀing nai pơtô ăt pơdah thâo akŏ bruă tơlơi hrăm glăi, boh yom phun či hrăm hăng pơtô. Tơdah hrăm glăi tơdơi kơ blan 5 kah hăng ră anai lĕ sang hră aka ƀu ngă giong akŏ bruă anun lĕ sit mơ̆n abih amăng khul čơđai sang hră hrăm anih 12 prăk pơplai kơ bruă pơtô hrăm glăi ăt amra lu mơ̆n, ƀu ƀiă ôh”.

Ƀuh rơđah bruă pơtô hrăm pơhrua thim gah rơngiao lĕ anŏ kiăng lăp djơ̆ mơ̆n hăng ƀing  čơđai sang hră laih anun ƀing nai pơtô. Kơ-iăng khua ding jum pơtô hăng pơjuăt ơi Phạm Ngọc Thưởng lăi pơtong, tơlơi kiăng mơ̆ng Ding jum Pơtô hrăm pơjuăt lĕ kom bruă pơtô hrăm pơhrua gah rơngiao sang hră, samơ̆ kiăng hơmâo hră pơtrun pơkŏn djơ̆ lăp hloh kơ bruă wai lăng bruă pơtô hrăm kiăng gêh găl hloh:

“Tơdah ƀing nai pơtô ngă tui djơ̆ hơdôm tơlơi pơtô amăng anih hrăm hăng pơtong glăi djơ̆ hloh, sit mơ̆n ƀu kiăng pơtô hăng hrăm pơhrua gah rơngiao mông hrăm pơ anih ôh, ăt amra ngă djơ̆ tơhnal pơkă mơ̆ng jơlan hơdră pơtô hrăm abih bang mơ̆n. Samơ̆, kŏn lơi sa hơnơ̆ng. Yua kah hăng hơmâo lăi laih, anŏ či kiăng lăp djơ̆, hơmâo lu čơđai sang hră kiăng hrăm pơhrua lu hloh dơ̆ng tơlơi hrăm, rơngiao kơ tơlơi hrăm amăng sang hră samơ̆ ăt khom wai lăng lăp djơ̆ tơlơi pơtô hrăm anai mơ̆ng ƀing nai pơtô kiăng djơ̆ rơ-ua, ba glăi rup rap kơ anom bruă pơtô hrăm, ƀing nai pơtô amra tơpă hloh”.

Hră pơtô ba mrô 29 mơ̆ng Ding jum Pơtô hăng Pơjuăt čih pơkra lơ̆m thun blan hlăk dŏ hrăm anun yơh ƀiă lu ăt bơbeč djơ̆ mơ̆n kơ bruă pơtô hrăm mơ̆ng akŏ thun ƀơi djop sang hră hăng čơđai sang hră, biă mă ñu ƀing čơđai sang hră hrăm abih anih či rơnuč gưl. Khă hnun, lu tơlơi pơgôp hiăp kiăng lăi pơtong, tơdah djop sang hră, ƀing nai pơtô, gong gai kơnuk kơna plơi pla ngă tui djơ̆ tơlơi pơtô ba hơmâo pơkă amăng hră pơtô ba mrô 29, amra ba glăi bruă pơtô hrăm djơ̆ tơpă hloh, bruă hrăm pơhrua ăt djơ̆ găl huăi pơgô̆ čơđai sang hră hrăm lu mông gah rơngiao kơ mông hrăm sit nik, ngă ƀu mơak klă pran jua amăng mơnuih mơnam kah hăng mơ̆ng anai pơ klôn.