Khua khul čih pioh, Khua anom bruă pơ ala mơnuih ƀôn sang dêh čar Bùi Văn Cường brơi thâo: Thun 2024, Jơnum min apăn bruă phun pơ ala mơnuih ƀôn sang dêh čar, pơtum prăp lui, jak iâu jơnum hăng git gai lu wơ̆t jơnum lok khua mua pơ ala mơnuih ƀôn sang dêh čar; Bruă mă čih pơkra tơlơi phiăn; sem lăng, pơsit lu bruă mă yôm kơ dêh čar; bruă mă pơtom hiăp hăng ngă hrŏm jar kmar; bruă mă pơsir tơlơi rơkâo mơ̆ng mơnuih ƀôn sang; Pơtô brơi bruă mă mơ̆ng ƀing pơ ala mơnuih ƀôn sang dêh čar, grup pơ ala mơnuih ƀôn sang hăng pơhlôm brơi anŏ gêh găl rô nao rai jơnum mơ̆ng ƀing pơ ala mơnuih ƀôn sang dêh čar; Pơtô brơi bruă mă mơ̆ng Khul pơ ala mơnuih ƀôn sang djop gưl hăng pơphun jơnum lok Jơnum min apăn bruă phun pơ ala mơnuih ƀôn sang dêh čar thun 2024.

Hơdôm tơlơi pơgôp hiăp tŭ ư brơi kơtưn kơ bruă khom hruă kjăp tơlơi tơpă amăng bruă mă, djơ̆ hnong lơ̆m ngă tui Hơdră pok pơhai bruă mă, biă mă ñu khom pơtô lăi, ngă kjăp tong ten tơlơi tơpă amăng bruă mă, hră pơar mơ-it đĭ kơ djop anom bruă, ĕp lăng tum djop, tơpă djơ̆ tui tơlơi pơkă mơ-it hră pơar kơ mông jơnum. Amăng anun, kiăng đing nao tong ten bruă prăp lui hră pơar, tơlơi čih pơƀut djơ̆ hnong, djơ̆ mông pơkra, pioh kơ Khul djuai ania, djop jơnum min mơ̆ng anom bruă pơ ala mơnuih ƀôn sang dêh čar pơtong glăi laih anun ding kơna mơ̆ng Jơnum min apăn bruă phun pơ ala mơnuih ƀôn sang dêh čar hơmâo hrơi mông kơsem min hră pơar tong ten hloh, djru hrŏm pơtrut tal jơnum ƀing pơ ala mơnuih ƀôn sang dêh čar tŭ yua hloh....

Khua pơ ala mơnuih ƀôn sang dêh čar, Vương Đình Huệ lăi lĕ, bruă čih pơkra glăi Hơdră mă bruă thun 2023 sit mơ̆n khom ngă yơh, yua kơ bruă pơkă hlâo laih anun bruă ngă tui sit nik ñu hơmâo phara ƀiă. Khă tui anun, Khua pơ ala mơnuih ƀôn sang dêh čar tŭ ư hăng tơlơi pơgôp hiăp mơ̆ng djop ding kơna Jơnum min apăn bruă phun pơ ala mơnuih ƀôn sang dêh čar jing bruă mă pơkra glăi hơdră lu đơi, tơlơi anai kiăng lăng glăi hrăm tui:

“Ƀơi anŏ rim blan mơtam, aka lăi nao ôh rim thun ƀudah rim rơwang pơkă hơdôm blan sa wơ̆t, sit ba pơmut nao laih samơ̆ tơl jơnum lĕ lui hĭ, pơmut glăi dơ̆ng. Bruă anai, tơlơi glăm ba mơ̆ng ƀing apăn bruă phun, djop jơnum min, lăng glăi hrăm tui kiăng hơdai gum hrŏm djop sang bruă mơ̆ng kơnuk kơna. Tơdơi anai, sit mơ̆n amra sem glăi tui hluai rim blan hơmâo hơdôm mơta akŏ bruă dŏ kaih hăng khom pơblih yua kơ anom bruă pơpă glăm ba. Tơl giăm mông laih ƀư̆ pơkra glăi, kiăng pơblih pơkra glăi abih hơdră. Phrâo anai, ƀing pơ ala pơsit khut khăt kơ bruă anai. Kâo rơkâo lĕ thun 2024 khom ngă kjăp glăi bruă anai, kiăng ĕp hlơi pô glăm ba phun, pô khua, pô ngă bruă pơdjơ̆ nao kơ anŏ ngă kaih, khom pơsir khut khăt tơlơi anai”.

Pơgôp hiăp nao amăng hră lăi pơthâo pơsir bruă mơnuih ƀôn sang rơkâo mơ̆ng sang bruă khua pơ ala mơnuih ƀôn sang dêh čar blan 10 hăng blan 11 rơgao, ƀing ding kơna Jơnum min apăn bruă phun pơ ala mơnuih ƀôn sang dêh čar lăi lĕ, mơnuih ruah khua đing nao biă mă tơlơi pơhing hơjan hlim ia ling dăo ƀơi kual Tong krah; nua ia săng đĭ, nua apui lơtrik yua; tơlơi tơnap mơ̆ng ƀing ngă bruă sĭ mơdrô mah hơmâo rŭ glăi ƀiă samơ̆ tơlơi hơdip mơda mơnuih ƀôn sang ƀơi lu plơi pla dŏ tơnap tap đôč, biă mă ñu sang anŏ ngă hmua pơhrui glăi aset, kual tơnap tap....Kơ-iăng khua pơ ala mơnuih ƀôn sang dêh čar Trần Quang Phương lăi pơtong, boh yom phun phrâo anai mơnuih ƀôn sang bơngơ̆t yua hăng đing nao lu lĕ tơlơi soh sat, amăng anun lu tơlơi ngă soh sat hŭi rơhyưt biă mă. Pơblang kơ tơlơi bơngơ̆t anai, Kơ-iăng Khua ding jum kông an Trần Quốc Tỏ brơi thâo:

“Hơdôm wơ̆t tơlơi soh sat dŏp kưp thun blan rơgao hơmâo biă mơ̆n laih anun mơnuih ƀôn sang ăt hŭi hăng bơngơ̆t lu. Hơdôm tơlơi soh sat gơmơi hơmâo pơphun nao pơgăn hmao kru, hơduah ĕp tơlơi soh hăng kiăo mă ƀing ngă soh djơ̆ hăng tơlơi phiăn. Samơ̆ boh tơhnal hơduah ĕp brơi ƀuh amăng hrơi giăm têt thun hlâo, bruă mă ƀing soh sat juăt hyu ngă soh kah hăng ñu phiăn ƀuh. Dua lĕ, ƀing soh sat gơñ ma túy, hot jrao ngă khin hơtai, hyu pơrung pơrăng ăt lu. Klâo lĕ ăt ƀing arăng ngă sat anun aka ƀu khin nao lăi hmư̆ tơlơi soh sat djơ̆ tui tơlơi pơkă hăng anom bruă kơnuk kơna, laih anun tơlơi ƀu răng kơđiăng hlâo pioh pơhlôm pơgang, bruă anai ngă hrŏm djop tơring čar, plơi pla ƀing tơhan mă bruă pơ anun, biă mă ñu ƀing arăng ngă sat kiăng djru pơtô pơblang thâo hluh tơlơi phiăn pơkă”.

Jơnum min apăn bruă phun pơ ala mơnuih ƀôn sang dêh čar rơkâo Kơnuk kơna, brơi git gai djop ding jum, anom bruă hăng tơring čar brơi tañ pơsir hĭ hơdôm anih lŏn dlưh, čơđang, lŏn tơhlŏm ƀudah pơphun pơdŭ đuăi sang anŏ mơnuih ƀôn sang mơ̆ng anih hŭi rơhyưt kiăng hơđong tơlơi hơdip mơda laih anun mă bruă ngă hmua. Ding jum bruă mă tơhan rơka hăng mơnuih mơnam pơsir, djru pơgang tơlơi dưi, boh tŭ yua kơ mơnuih hơmâo tơlơi duăm ruă yua mơ̆ng bruă mă. Ding jum tuh tia pơkra ming hăng sĭ mơdrô khom hơmâo hơdră pơsir mơtam tơlơi sĭ mơdrô amăng internet juăt lăi sĭ mơdrô online đang mơ̆ng pơgang ba tơlơi tŭ brơi mơnuih blơi gơnam huăi lê̆ luh plư pleč. Ding jum kông an kơtưn ĕp hơdră pơgang tơlơi rơnuk rơnua, hơđong kơ mơnuih mơnam, boh nik ñu amăng bơyan pơdơi čơkă thun phrâo hăng ngă yang thun phrâo djuai ania ta ƀong têt pơ anăp.