VOV4.Jarai - Klin Covid-19 hmâo ƀơi abih bang hơdôm bôh tơring čar, ƀôn prong amăng đơ đam dêh čar, hmâo laih lu nai pơtô čơđai hăng čơđai sang hră ƀă kơman klin. Kiăng pơhlôm klă, juăt hăng ñu, tui hluai bôh nik hmâo, hơdôm bôh tơring čar, ƀôn prong hmâo lu hơdră pơtô hăng pơhrăm bŏng glăi pơplih tañ kiăng čơđai sang hră dưi nao sang hră.

Pơsit klin Covid-19 dô̆ ngă tơnap, samơ̆ sang hră ƀu dưi krư̆ bah amăng abih bang anun hơdôm bôh tơring čar, ƀôn prong leng kơ rơkâo hơdôm anih anom pơtô pơhrăm ba tơbiă jơlan gah pơtô pơhrăm lăng nao rai mơng ataih pơkĕ hrom hrăm ƀơi sang hră kiăng hmao pơplih hơdră pơtô tui tơlơi klin ruă ƀơi tơring čar, ƀôn prong pô. Jơlan gah mơ̆ hơdôm tơring čar, ƀôn prong pok pơhai ră anai anun lĕ brơi čơđai sang hră ƀơi hơdôm bôh să, phường, tring kual pơhlôm ƀudah amra hmâo klin ngă ƀiă dưi nao sang hră hrăm.

Ơi Nguyễn Thế Bình, Khua Gơnong bruă pơtô pơhrăm tơring čar Hà Giang brơi thâo, hăng pran jua pơphun pơtô pơhrăm pơplih tañ tui tơlơi klin ruă ngă, Jơnum min mơnuih ƀôn sang tơring čar hmâo tơlơi pơsit brơi čơđai sang hră hơdôm kual pơhlôm nao glăi sang hră mơng rơnuč blan 11 – tơdơi kơ 4 rơwang hrơi tơjuh brơi kơ čơđai sang hră pơdơi jăng jai nao sang hră kiăng pơgang, pơgăn klin:

“Hăng neh wa ƀơi anai mơ̆ hmâo rơnoh klin ngă mrô sa, mrô dua, hơdôm bôh sang hră pơphun brơi hrăm ƀơi sang hră hăng ngă tui tơpă hơdôm bruă pơgang pơgăn klin. Hăng rơnoh mrô 3, mrô 4 lĕ hơdôm anih anom anai jăng jai ƀu brơi čơđai sang hră nao hrăm pơ̆ sang hră ôh hăng pok pơhai hơdră pơphun pơtô pơhrăm pơkon, amra pơtô pơhrăm lăng nao rai mơng ataih, jao tơlơi hrăm, ƀudah hră pơhrăm, jao rơwang bruă pơhrăm kơ ƀing čơđai sang hră, ƀudah lĕ hrăm glăi, hơkrŭ tơlơi pơhrăm hluai tui bruă jao tơlơi hrăm glăi pơ̆ sang kơ čơđai sang hră. Truh ră anai đơ đam tơring čar hmâo laih 430 bôh sang hră amăng mrô 633 bôh sang hră brơi čơđai sang hră pơwot glăi sang hră hrăm, hmâo 68%”.

Lom hmâo klin, hơdôm anih anom leng kơ khăng khŏp krư̆ bah amăng sang hră amăng đơ đam tơring čar, ƀôn prong, pơ ala nao anun lĕ kual añep tui rim anih hrăm, rim čơđai sang hră, nai pơtô čơđai hmâo bơdjơ̆ nao; pơphun pơčrang lăng Covid-19 hăng hơdai nao pơtô lăng nao mơng ataih, ƀudah pơdơi jăng jai nao sang hră amăng hơdôm hrơi ƀiă hloh kiăng pel ĕp, hyu huĕt ĕp, tơdơi kơ anun tañ brơi čơđai sang hră nao sang hră. Kah hăng ƀơi tơring čar Hòa Bình, tơdơi kơ hmâo klin Covid-19, Jơnum min mơnuih ƀôn sang tơring čar pơsit brơi čơđai sang hră, ƀing hrăm gưl dlông, čơđai kơsem min ƀơi hơdôm anih anom pơtô pơhrăm amăng đơ đam tơring čar pơdơi jăng jai bruă hrăm ƀơi sang hră amăng 2 hrơi kiăng pel ĕp, ruah mă hăng tlâ̆o vaccine pơgang klin Covid-19. Tơdơi kơ anun mơtăm, hơdôm bôh sang hră hmâo gơgrong hlâo pơphun jơlan gah pơtô pơhrăm pơplih tañ truh rim anih hrăm, gir run kiăng čơđai sang hră dưi nao sang hră, pơhlôm djop hơdôm bruă pơgang hlôm hlâo klin ruă. Yă Bùi Thị Kim Tuyến, Khua Gơnong bruă pơtô pơhrăm tơring čar Hòa Bình lăi pơhing:

“Ƀơi đơ đam tơring čar ăt hmâo mơn sang hră pơphun brơi čơđai nao sang hră kah hăng tơđar, samơ̆ ăt hmâo mơn sang hră pơphun hrăm lăng rai mơng ataih hăng đa lĕ amăng sang hră hmâo anih tơdah hmâo F0 lĕ anih anom hrăm lăng nao rai mơng ataih, bơ̆ hơdôm bôh sang hră pơkon ăt dô̆ hrăm ƀơi sang hră mơn. Sit yơh ăt khom ruah tơbiă mơn hơdôm F1 bơdjơ̆ nao pơkon leng kơ huăi ƀă klin sôh, anun kah mơng pơhlôm brơi kơ čơđai sang hră wot nai pơtô”.

Ơi Nguyễn Việt Hà, Kơ-iăng Khua Anom mă bruă kơđi čar tơlơi pơmin, Gơnong bruă pơtô pơhrăm tơring čar Vĩnh Phúc ăt brơi thâo mơn, sa dua bôh sang hră ƀơi hơdôm bôh tơring glông Sông Lô, Vĩnh Tường, Yên Lạc, plơi prong Phúc Yên hăng Vĩnh Yên glăk pơphun pơtô pơhrăm lăng nao rai mơng ataih kiăng pơgang pơgăn klin. Kiăng pơhlôm bôh yôm pơtô pơhrăm amăng sa thun, hơdôm bôh sang hră leng kơ pơphun pơtô pơhrăm tui jơlan hơdră pơplih pơkra djơ̆ hăng bruă hrăm lăng nao rai mơng ataih.

“Hăng hơdôm mơnuih lom hơdai nao hrăm lăng nao rai mơng ataih lĕ ăt tui hăng hơdră kiăng ječ mơn, jăng jai ngă juăt tañ mơn. Tơdơi kơ klin dưi wai lăng hơdôm phun than lar tưp hyu lĕ hơdôm bôh sang hră hơdai nao hrăm ƀơi sang hră. Kiăng pơhlôm klă lom pok pơhai hrăm lăng nao rai mơng ataih, hơdôm bôh sang hră hmâo ruah laih hơdôm mô-đun bôh thâo djơ̆ ƀơi hơdôm mơta tơlơi hrăm kiăng pơhlôm jơlan hơdră kơčăo bruă tui jơlan hơdră hmâo ba tơbiă”.

Ding jum pơtô pơhrăm pơsit, hơdră pơphun pơtô pơhrăm ƀơi hơdôm anih anom ră anai leng kơ pơplih tañ biă hăng tơlơi gir run ngă hơdư̆ hĭ đut hlah ƀu klă mơng klin ruă truh bruă mă mơng sang hră. Hơdră pơphun pơkĕ hrom hăng hơdôm hơdră pơtô pơhrăm mơng hơdôm tơring čar, ƀôn prong djru pơhlôm rah kơ mơnuih pơtô hăng pơhrăm, pơhlôm rah jơlan hơdră hrăm mơ̆ dưi djă pioh mơn anô̆ kơjăp ñu. Anai ăt lĕ tơhnal mơ̆ Ding jum pơtô pơhrăm hmâo ba tơbiă laih mơng akô̆ thun hrăm, Ding jum hmâo pơtô laih hăng hơdôm tơring čar ƀôn prong glăk pok pơhai pơplih tañ truh rim sang hră, kiăng ngă giong kơčăo bruă thun hrăm./.

            VOV4: Čih – Siu H’ Prăk: Pơblang