Thun 2024, hăng tơlơi gơgrong lĕ anom pơphô bruă phun, djru brơi Ƀirô Khua pơ ala mơnuih ƀôn sang dêh čar, jơnum min apăn bruă Khua pơ ala mơnuih ƀôn sang dêh čar, Khul djuai ania, djop jơnum min mơng Ƀirô Khua pơ ala mơnuih ƀôn sang dêh čar, hơdôm anom bruă gah Jơnum min apăn bruă Khua pơ ala mơnuih ƀôn sang dêh čar, anom bruă Khua pơ ala mơnuih ƀôn sang dêh čar hơmâo pok pơhai, ngă tui hăng pơgiong lu tơlơi rơkâo, bruă jao kơtrâ̆o, amăng anun hơmâo hơdôm boh tơhnal kiăng ngă ječ, phrâo, tơnap, glêh glar. Anom bruă Khua pơ ala mơnuih ƀôn sang dêh čar hơmâo hmao tlôn pơphô bruă, djru pơphun truh kih 6 lok jơnum Khua pơ ala mơnuih ƀôn sang dêh čar, amăng anun hơmâo 4 lok jơnum ƀu tui tơđar hăng 2 lok jơnum tui tơđar; 33 mông jơnum mơng jơnum min apăn bruă Khua pơ ala mơnuih ƀôn sang dêh čar; 7 tal jơnum yôm phăn mơng Jơnum min apăn bruă Khua pơ ala mơnuih ƀôn sang dêh čar; hrŏm hăng lu bruă mă pơkŏn mơng Khua git gai pơ ala mơnuih ƀôn sang dêh čar, ƀing kơ-iăng Khua git gai pơ ala mơnuih ƀôn sang dêh čar.

Hăng hơdôm tơlơi gir run prong hloh, thun 2024, anom bruă Khua pơ ala mơnuih ƀôn sang dêh čar hơmâo gum hrŏm pơphô bruă, djru brơi Ƀirô Khua pơ ala mơnuih ƀôn sang dêh čar tŭ yap mă yua 31 tơlơi phiăn, 17 tơlơi pơtrun pơkă, pơgôp hiăp hăng 21 črăn tơlơi phiăn…pơgôp hmao tlôn ngă tui hơdôm hơdră bruă, tơlơi črâo trun mơng Ping gah, djơ̆ hăng tơlơi rơkâo sit nik hăng tơlơi hơdip mơda, pơgôp yôm phăn amăng bruă pơgiong hơdră bruă, tơlơi phiăn, ngă tui hơdôm hơnong pơkă čih pơkra tơlơi phiăn amăng rơwang ngă bruă hăng pơtrut pơđĭ kyar bơwih ƀong huă-mơnuih mơnam amăng lŏn ia ta.

Đĭ pơhiăp git gai amăng Jơnum klah čun bruă mă thun 2024, pok pơhai bruă jao thun 2025 mơng anom bruă Khua pơ ala mơnuih ƀôn sang dêh čar, Khua git gai pơ ala mơnuih ƀôn sang dêh čar ơi Trần Thanh Mẫn tŭ yap hăng pơpŭ hơdôm bruă mă mơng anom bruă Khua pơ ala mơnuih ƀôn sang dêh čar, hơdôm anih anom hơmâo lu tơlơi gir run, pơsir hĭ lu bruă hăng hơdôm boh than klă ƀiă. Lăi pơtong thun 2025 lĕ thun pơphun Jơnum Ping gah djop gưl, anăp nao Jơnum Ping gah đơ đam dêh čar tal 14 mơng Ping gah; prap lui plĕ hră ruah Khua mua đơ đam dêh čar tal 14 mơng Ping gah; prap lui hrơi plĕ hră ruah Khua pơ ala mơnuih ƀôn sang dêh čar tal 16 hăng ruah khua mua Jơnum min pơ ala mơnuih ƀôn sang djop gưl rơwang thun 2026-2031…yua anun, Khua git gai pơ ala mơnuih ƀôn sang dêh čar ơi Trần Thanh Mẫn rơkâo anom bruă Khua pơ ala mơnuih ƀôn sang dêh čar, Ping gah anom bruă hăng khul mơnuih mă bruă mut phung tŏ tui pran gơgrong, gum pơgôp, thâo pơčeh phrâo kiăng pơgiong bruă jao.

“Ƀơi anăp lĕ kiăng tŏ tui pơplih hơdră mă bruă, “Pơplih klă” bruă mă mơng hơdôm anom bruă mơng Ƀirô Khua pơ ala mơnuih ƀôn sang dêh čar, ječ ameč pơgiong hơdôm bruă dưm dăp hơbot djop jơnum min mơng Ƀirô Khua pơ ala mơnuih ƀôn sang dêh čar, hơdôm anom bruă Jơnum min apăn bruă Khua pơ ala mơnuih ƀôn sang dêh čar, hơdôm anih anom gah anom bruă Ƀirô Khua pơ ala mơnuih ƀôn sang dêh čar tui tơlơi rơkâo mơng gơnong glông”.

Khua git gai pơ ala mơnuih ƀôn sang dêh čar ơi Trần Thanh Mẫn ăt rơkâo pel ĕp, rơkâo pơplih pơkra, pơhrua hơdôm tơlơi phiăn, tơlơi pơtrun bơdjơ̆ nao bruă dưm dăp, hơbot anih anom, pơplih pơkra, pơhrua tơlơi pơkă jơnum, tơlơi pơkă bruă mă mơng Jơnum min apăn bruă Khua pơ ala mơnuih ƀôn sang dêh čar. Laih dong, tŏ tui pơplih phrâo, tŏ tui hrưn đĭ klă dong, pơphô bruă, djru brơi klă hơdôm tal jơnum pơƀut; ƀing apăn bruă, mơnuih Ping gah, mơnuih mă bruă kiăng tŏ tui gơgrong khut khăt, ngă tui gru grua anih anom mă bruă, pơtrut kơtang bruă pơgang, pơgăn hưp ƀong kông ngăn, yua khưi khai, bruă ngă soh.

Lăi pơtong, Ding jum kơđi čar hơmâo tơlơi pơtrun mrô 57 kơ pơplih pơđĭ kyar boh thâo phrâo, yua boh thâo măi mok, pơplih pơčeh phrâo hăng pơplih yua boh thâo phrâo dêh čar, Khua git gai pơ ala mơnuih ƀôn sang dêh čar ơi Trần Thanh Mẫn rơkâo kiăng pơtrut kơtang yua boh thâo phrâo hăng pơplih mrô amăng bruă mă mơng anom bruă Khua pơ ala mơnuih ƀôn sang dêh čar, pơlir hăng bruă ngă hră pơ-ar, pơhlôm bruă hruaih, pơlir hơbit, pơlăi nao rai tơlơi pơhing hmao tlôn, tŭ yap.

Khua git gai pơ ala mơnuih ƀôn sang dêh čar đăo gơnang, hăng tơlơi gir run ƀu pơdơi mơng ƀing apăn bruă, mơnuih mă bruă mơng hơdôm anom bruă Khua pơ ala mơnuih ƀôn sang dêh čar, sit biă ñu amăng hrơi blan phrâo ră anai lơm djop anih anom kơđi čar glăk ngă tui tơlơi pơtrun mrô 18, rơkâo rĭm čô mơnuih apăn bruă, mơnuih Ping gah mơng Khul Ping gah, khul mơnuih mă bruă mut phung kjăp pran, đăo gơnang nao tơlơi git gai mơng Ping gah kiăng ngă tui truh kih hơdôm hơnong pơkă ba tơbiă.

Khua git gai pơ ala mơnuih ƀôn sang dêh čar ăt rơkâo, ƀing apăn bruă, mơnuih mă bruă pok pơhai khut khăt tơlơi črâo trun mơng Khul git gai Ping gah kơ bruă pơphun Tết Ất Tỵ thun 2025, pơplôm brơi sit nik, tong ten, lăp djơ̆ tơlơi pơkă, hơđong hăng pơsir hĭ bruă phrâo ƀuh, sit biă ñu amăng bơyan ƀong tết; rơkâo anom bruă Khua pơ ala mơnuih ƀôn sang dêh čar đing nao, bơwih brơi Tết kơ ƀing apăn bruă, mơnuih mă bruă pơhlôm sa bơyan tết pơđao pran jua, mơ-ak mơ-ai, rơnuk rơnua, pơkrem. /.