Lơm tơña kơ bôh tŭ yua mơ̆ng 3 jơlan hơdră lŏn ia pơkă kơ pơdŏng plơi pla phrâo, hrŏ trun ƀun rin kơjăp sui thun hăng pơđĭ kyar bơwih ƀong – mơnuih mơnam kual neh wa djuai aniă ƀiă hăng kual čư̆ siăng glăk dưi pok pơhai, lu mơnuih iâo anai lĕ hơdôm hơdră pơsit pok jơlan mơ̆ng Khua pơ ala mơnuih ƀôn sang kiăng mơnuih ƀôn sang tơtlaih mơ̆ng rin rơpa, amăng ƀrư̆ hrưn đĭ ƀơi lŏn pô hmâo. Ơi Hoàng Nhị Sơn, Khua git gai Ping gah tơring glông Xín Mần, tơring čar Hà Giang brơi thâo, mơ̆ng ngăn rơnoh jơlan hơdră hrŏ trun ƀun rin, jơlan hơdră lŏn ia pơkă, tơring čar pơjing hơdôm nua phrâo mơ̆ng pơlir hơbit ngă rai gơnam tam:

 “Ƀơi tơring glông anai tơnap tap biă, yua anun ƀing gơmơi ngă pơhưč anom bơwih ƀong pioh pok pơhai hơdôm jơlan pơlir hơbit amăng bruă đang hmua gah jơlan hơdră hrŏ trun rin rơpa, jơlan hơdră lŏn ia pơkă. Ră anai ƀing gơmơi hmâo hơdôm jơlan pơlir hơbit pla phun củ cải, kram mă rơbung bát độ, rông akan ia rơ-ŏt, phun čè, thảo quả, pơkra añăm mơnong un, mơnong rơmô mơ̆, ră anai hơdôm bôh anom bơwih ƀong glăk pơkĕ hrŏm hăng neh wa mơnuih ƀôn sang klă biă”.

Bôh tơhnal tơdơi rơbêh kơ 2 thun ngă tui 3 jơlan hơdră pơkă mơ̆ng lŏn ia kơ pơdong plơi pla phrâo, hrŏ trun ƀun rin kơjăp sui thun, pơđĭ kyar bơwih ƀong – mơnuih mơnam kual neh wa djuai ania ƀiă hăng kual čư̆ siăng hmâo lăng ƀuh rơđah, dưi pơkă hăng mrô yâo mơ-ak jai hrơi jai đĭ tui mơ̆ng mơnuih ƀôn sang. Khă hnun hai, tui bôh tơhnal phrâo anai mơ̆ng Grŭp lăng tui mơ̆ng Khua pơ ala mơnuih ƀôn sang lăi pơthâo glăi amăng Tal jơnum lok 6 Khua pơ ala mơnuih ƀôn sang dêh čar ta tal 15 lĕ, bruă pơphun ngă tui hơdôm jơlan hơdră ƀơi lu anih anom ăt dô̆ mơn anô̆ akă gal hăng bưp lu tơlơi tơnap, kah hăng rơnoh bruă ngă tui kaih, ngă gun, dir wir ƀu thâo pok pơhai hiưm hơpă. Đa hmâo tơlơi pơphun ngă tui hơdôm jơlan hơdră ƀơi anih giăm hloh, mơnuih apăn bruă hmư̆ hing lĕ "mơnuih apăn bruă ƀuăn gơgrong" ƀơi anăp mơnuih ƀôn sang, kah hăng tơlơi Kơ-iăng Khua Jơnum min mơnuih ƀôn sang să Thượng Trạch, tơring glông Bố Trạch, Quảng Bình Nguyễn Trường Chinh:

 “Ƀuăn hlâo sang dô̆. Thun 2022 ƀuăn, 2023 ăt ƀuăn mơn (klao). Ră anai sang dô̆ djru hmâo 44 klăk prăk mơ̆, čan tui Tơlơi pơtrun pơkă 28 neh wa ƀơi anai ƀu čan, huĭ ƀu hmâo prăk tla glăi. Sang ngă gru tơring glông pơdŏng ƀơi kual krah abih bang 130 klăk prăk laih, nua tui anun tơnap kơ plơi pla. Thun 2022-2023 ƀu dưi pơkra sang hơpă ôh”.

Ƀu bưp tơnap lơm pok pơhai ngă tui kah hăng Quảng Bình, tơring čar Hà Giang truh ră anai ngă giong laih rơbêh kơ 80% mrô tơhnal pơkă kơ djru sang dô̆ brơi sang anô̆ djuai ania ƀiă, kual čư̆ siăng. Sa mrô ngă lu anih anom, biă ñu hơdôm bôh tơring čar ƀơi kual suek, ataih čang rơmang. Tui anun Hà Giang glăi bưp hơdôm tơlơi tơnap ha jăn. Ơi Dương Việt Hùng, Khua Anom bruă bơwih ƀong anom mă yua tơring glông Xín Mần, Hà Giang dô̆ pơmin:

 “Sa dua bôh sang anô̆ lơm yap blung a djơ̆ laih. Khă hnun hai, mrô yap mơ̆ng thun 2022 truh thun 2023 pok pơhai, amra amăng hơdôm hrơi anun, arăng pơkra mă sang dưi mơn, ƀudah tơtlaih mơ̆ng ƀun rin ƀudah hơdôm bôh than pơkon ba truh lĕ ƀu djơ̆ pô dưi čơkă mă dong tah”.

Ƀu djơ̆ pô dưi čơkă mă ƀu djơ̆ mơnuih ƀôn sang abih tơnap tap ôh, samơ̆ glăi djơ̆ hăng bruă plơi pla ƀu dưi pơsir prăk ngăn drăp. Tơlơi gun tơnap pơtlaih anai lĕ lu biă lơm plơi pla pok pơhai ngă tui 3 jơlan hơdră lŏn ia pơkă. Laih anun tơlơi anai adih, hyu ngă mă, raih daih, luk puk amăng pơpha gưl, pơpha bruă apăn ngă hơdôm hơdră pơkă, hơdră bruă ƀu dưi ngă tui ba glăi bôh tơhnal. Bơkơtuai hăng ƀing gơmơi, ơi Hoàng Xuân Ánh, Khua Jơnum min mơnuih ƀôn sang tơring čar Cao Bằng lăi mơn:

 “Khom lăi lĕ, tơring čar luk puk biă, bơhmutu ñu pơhruai ngăn rơnoh lĕ ƀing gơmơi ƀu thâo ngă hiưm hơpă ôh. Ƀirô pơphô brơi hrơi anai lăi tui anai, pơgi rơkâo gum pơhiăp Ding jum glăi lăi pha ra dong. Tuč rơnuč ñu dir wir na nao, ƀu tơbiă hơdră bruă hơpă ôh”.

Anô̆ ƀu gal ƀơi tơlơi, lơm mơnuih ƀôn sang kơƀah prăk, kiăng rơwang bruă lĕ prăk mơ̆ng jơlan hơdră glăi dŏng hơđong amăng sang dưm prăk, tơring čar dir wir ƀu thâo pơsir prăk hiưm hơpă. Đa lĕ hmâo anih đa khom ĕp hơdră tla glăi prăk kơ ngăn drăp, kah hăng tơlơi ƀơi tơring čar Lạng Sơn. Tui ơi Hồ Tiến Thiệu, Khua Jơnum min mơnuih ƀôn sang tơring čar Lạng Sơn, yua kơ rim jơlan hơdră sa anom pô git gai, samơ̆ pô čơkă mă glăi kơnong kơ ha sa mơ̆, tui hăng tơlơi pơkă sa čô mơnuih kơnong kơ dưi čơkă mă sa hơdră bruă, ba truh bơrơkua lơm pơƀut glăi hơdôm mrô anun tơring čar anai amra khom tla glăi rơbêh kơ 355 klai prăk hơdôm Jơlan hơdră lŏn ia pơkă:

 “Prăk mă yua tơnap biă. Ră anai dô̆ 355 klai prăk mă yua kơ bruă ƀu dưi mă yua hăng ƀing gơmơi amra ba tơbiă tla glăi kơ Kơnuk kơna”.

Luk puk, dir wir ƀu thâo ngă tui hră pơ-ar pơtô ba hơpă. Ngă tui lĕ huĭ soh, kiăng tla glăi prăk kơnuk kơna lĕ glăi bơdjơ̆ nao pơsit bôh thâo bruă mă, bôh thâo ngă tui mơ̆ng gưl să, anom bruă. Tơlơi anai glăk ngă brơi hơdôm bôh tơring čar kual pok pơhai 3 jơlan hơdră lŏn ia pơkă tơblut amăng tơlơi “nao gun čư̆, pơwot glăi gun kơ ia”./.