Jơlan hyu ĕp anun dưi hơmâo ling tơhan Grup 51 ăt mă bruă, hăng tơlơi pơmin kjăp, pran jua ngă bruă khut khăt kơtang hloh hơduah ĕp kiăng rŭ ba glăi tơlang tơleh tơhan djai pơsăn drơi jăn yua kơ lŏn ia ta, dŏ đih glăi ƀơi dêh čar tač rơngiao, đah mơ̆ng ba glăi dor pơ lŏn amĭ ƀă yă pơjing, anih amĭ dor la ama dor sôk.

Thiếu tá Vũ Hồng Hiến, arăng pơpha bruă ngă khua wai lăng gah grup K51 brơi thâo, amăng anih gơñu hyu ĕp pơsat, arăng dor tơhan pơsăn drơi jăn mơ̆ng dêh čar ta ƀơi tơdron blah amăng dêh čar Kur jing kual lŏn glai klô čư̆ siăng kriăng pơtâo, jơlan mrơ̆k, pum rok drơi, kơnong rơbat tơkai đôč hyu hơduah ƀudah đĭ rơkĭ kơtuai hang ia krông. Hrŏm hăng gơnam djă ba pioh mă bruă djă hăng tơngan, rim čô tơhan amăng grup djă ba ƀrô djop braih huă amăng 7-10 hrơi dŏ amăng glai klô. Jơlan nao truh rơbâo rơbăn yak tơkai rơbat hyu lơ̆m glai rơ-oh glai rơ-ong thong dơlăm ĕp anih arăng dor tơhan djai pơsăn drơi, lu wơ̆t đuăi hyu ĕp glăi soh sel đôč, samơ̆ hơmâo mơ̆n hrơi blan tơphă hĭ, bưng băi, hơmâo ĕp ƀuh bôt pơsat arăng dor tơhan gơ̆p ta hăng ƀuh gơnam gơñu djă lui amăng drơi jăn thâo krăn pô.

“Hyu mă hơjăn ƀing ta đôč, sa grup anet pơpha hơmâo 2,3 čô adơi ayong tơhan. Lơ̆m ta klơi rŭ đĭ, ƀuh bơnal arăng akă thâo krăn lĕ iâu đĭ mơtam yơh. Anai yơh, anong wa ah! Lơ̆m ƀuh hnun, mơak luh ia mơta ƀu thâo pia hăng boh pơhiăp đôč đač ôh. Klơi djơ̆ bôt pơsat anih arăng dor ƀing anong wa pơsăn drơi, hơmâo pô dŏ glăi ƀiă tơlang, ƀruih tơlang tơleh, đơ đa ƀu dŏ anŏ hơgĕt dơ̆ng tah, kơnong anung ba tơlô̆ lŏn ƀudah gơnam gơñu dŏ djă amăng drơi jăn. Tơlơi anun, pran jua ta rơngôt biă mă”.

Hrŏm hăng bruă mă hyu hơduah ĕp, rŭ đĭ, pơƀut glăi mơ̆ng lu bôt pơsat arăng dor tơhan pơsăn drơi, ƀing khua mua, ling tơhan Grup K51 Dak Lak dŏ ngă bruă, jak iâu mơnuih ƀôn sang amăng anih gơñu pơdong puih kơđông hăng ngă bruă pơtom hiăp gah ling tơhan, nao bưp tơña bla ƀing khua mua gong gai kơnuk kơna, ngă klă bruă pơtom hiăp hăng mơnuih ƀôn sang dêh čar gơ̆p. Ƀing tơhan ta djru ba na nao, tơña bla, brơi gơnam, pơhiăp tom, djru pơkă lăng hăng pơpha ia jrao kơ mơnuih ƀôn sang duăm ruă. Mơ̆ng anun, lu mơnuih ƀôn sang Kur pơčrâo brơi Grup thâo tơlơi pơhing lăi nao anih hơmâo bôt pơsat, tơlơi pơhing tŭ yua kơ ta. Thiếu tá Nguyễn Văn Duẩn, ding kơna amăng Grup K51 brơi thâo:

“Mơnuih ƀôn sang pơ anai arăng djru ba biă mă kơ ƀing ta, ƀơi anŏ ñu arăng jak ba mơnuih amăng sang anŏ gum hrŏm hyu ĕp laih anun djru Grup tơhan K51 dêh čar ta klơi rŭ glăi tơlang tơleh ƀing pơsăn drơi jăn dŏ đih glăi ƀơi dêh čar Kur. Lu mơnuih ƀôn sang lơ̆m gơmơi ĕp ƀuh anih dor, rŭ đĭ tơlang ƀing gơñu ăt ol kơdol pran jua mơ̆n, laih anun hlâo či glăi ƀing gơñu ƀu her pơčlah ôh. Ƀuh gơmơi arăng jĕ giăm kah hăng phung wang sang anŏ, kah hăng ƀuh rup rap hlâo adih ƀing tơhan rơnuk Wa Hồ nao djru ba djuai ania Khmer, Kur huăi đut djuai ƀing Pol Pôt pơdjai lui”.

Grup K51 hơmâo bruă mă hyu hơduah ĕp pơsat rŭ ba tơlang tơhan djai pơsăn drơi ƀơi kual hơmâo 4 boh tơring glông: Batchanđa, Kônhet, Keosama, Ôrăng hăng plơi prong Senmônôrum gah tơring čar Mundulkiri dêh čar Kur. Anai lĕ tơring čar kual čư̆ siăng, jơlan nao rai tơnap tap, gleh glar biă mă, yua lŏn adai ayuh hyiăng pơđiă phang hang drơi, hlim hơjan ia ling dăo. Thượng tá Trịnh Ngọc Kiệm, Khua grup K51 brơi thâo, kơnong hơmâo tơlơi pơhing, mah ƀu tong ten ôh, ataih hơdôm rơtuh km hai, Grup nao mơtam :

“Pơpă hơmâo tơlơi pơhing arăng pơčrâo brơi, gơmơi ƀuh ƀô̆ mơta mơtam, khom găn rơgao tơlơi tơnap tap, jơlan ataih, pơtong rơđah, hơduah ĕp, kiăng klơi rŭ ba pơsir tơlơi pơhing. Sit klơi ƀuh, hơduah ĕp gơnam gru kơnăl mơ̆ng anih kuai mă anun, ƀing khua mua hăng tơhan mah gleh glar tŭ mơ̆n, hơdôm tơlơi tơnap anun amra hơmâo tơlơi mơak lơ̆m ĕp ƀuh ngă hlai hĭ pran jua rơngôt”.

Amăng 23 thun laih rơgao, tơlơi gir run hơduah ĕp tơlang tơleh ƀing gơ̆p tơhan adơi ayong anong nao djru tơlơi blah ngă ƀơi dêh čar Kur, Grup K51 hơmâo ĕp ƀuh ba glăi 746 per tơlang tơleh ƀing pơsăn drơi glăi pơ lŏn amĭ ƀă yă pơjing, anih amĭ dor la, ama dor sôk ƀơi Việt Nam ta pô.

H’Yim Kđoh, Kơ-iăng Khua Jơnum min mơnuih ƀôn sang tơring čar Dak Lak lăi, tơlơi gir run hăng boh tơhnal mơ̆ng bruă hyu hơduah ĕp thun blan rơgao yua Grup K51 pơphun, hơmâo djru prong prin ngă plai ƀiă tơlơi hning rơngôt kơ sang anŏ mơnuih pơsăn drơi jăn; pơdah rai bruă mă “Ƀong boh hơdor kơ pô pla, mơñum ia hơdor kơ pô klơi” mơ̆ng djuai ania ta, ba glăi tơlơi pơtô yôm dơlăm biă mă kơ bruă mă hơdor tơngia tla pran.

“Lăp pơ-ư ang biă mă hăng pơpŭ yôm hơdôm tơlơi gir run mơ̆ng ƀing adơi ayong tơhan. Kâo đăo sit lĕ hăng tơlơi đing nao prong mơ̆ng anom bruă Ping gah tơring čar, khul khua pơ ala mơnuih ƀôn sang, jơnum min mơnuih ƀôn sang, jơnum min djop djuai ania mơnuih mơnam Việt Nam tơring čar laih anun tơlơi khăp hăng pơpŭ prong dơlăm mơ̆ng djop djuai ania tơring čar pioh kơ ƀing tơhan Grup K51 ƀu kơnong tơlơi khăp, tơlơi pơpŭ, tơlơi đăo kơnang đôč ôh jing sa tơlơi čang rơmang prong gơñu khom ngă pơgiong bruă yôm pơphăn lŏn ia jao kơ gơñu dŏ mă bruă ƀơi kual lŏn dêh čar gơyut gơyâo”.

Hăng bruă mă yôm pơphăn, prong prin ƀing khua mua, ling tơhan Grup K51 Dak Lak hơmâo găn rơgao laih lu hnơr rơnuk mă bruă gleh glar tơnap tap. Bruă gơñu ngă kret kruai, hyiăl amăl, samơ̆ lăp pơ-ư ang prong, ƀing adơi ayong khua mua, ling tơhan Grup K51 ngă anun buă hăng tơlơi tơnap tơl ƀlĕ ia hŏu hang wơ̆t ia mơta hrŏm hăng tơlơi mơak lơ̆m ĕp ƀuh sa čơƀeh, amruih meh anet aneo hai tơlang tơleh ƀing pơsăn drơi jăn yua kơ lŏn ia, anun jing drơi jăn tuh drah pơčah asar mơ̆ng ƀing adơi ayong anong wa dŏ đih glăi ƀơi lŏn ia arăng, ta gir run kiăng ba glăi dor pơ anih lŏn amĭ ƀă yă pơjing, plơi pla lŏn ia ta anih amĭ dor la, anih ama dor sôk.