Anai jing bruă yôm biă mă ră anai lơ̆m Khul tơhan pok pơhai khut khăt Tơlơi pơtrun mơng Ping gah Ling tơhan kơ pơtrut tui tơlơi pơmin klă hiam mơ̆ng Ling tơhan Wa Hồ, gir pơgăn hĭ tơlơi pơmin ngă bruă thâo mă pô đôč.

Hơdôm tơlơi ba bơkơtuai pơsit tơlơi pơmin “Ling tơhan Wa Hồ” pơsit tơlơi pơmin pran jua kiăo tui Ping gah, Kơnuk kơna mơng Ling tơhan ta, jing anŏ yôm phun mơ̆ng ling tơhan mơnuih ƀôn sang Việt Nam. Tơlơi pơmin pran jua “Ling tơhan Wa Hồ” jing tơlơi pơkă hiam, tơlơi hiam amăng pran jua mơnuih ngă tơhan hơkrŭ, tơlơi anun lĕ amăng rơnuk pơpă, hrơi mông pơpă tŭ mơn, Ling tơhan ăt abih pran jua hăng Ping gah, djru ană plơi, amra blah ayăt djai drơi pô yua tơlơi rơngai mơ̆ng Lŏn ia, yua jơlan đĭ kyar chủ nghĩa xã hội. Hơdôm tơlơi yôm anun hơmâo akŏ pơjing hăng pơđĭ kyar amăng hrơi blan akŏ pơdong, blah ngă hăng kơjăp bruă mơ̆ng Ling tơhan mơnuih ƀôn sang Việt Nam. Tui hăng nai tha prin, nai prin tha Hoàng Chí Bảo, ding kơna hơđăp amăng Khul čih tơlơi pơtô djơ̆ arăng iâu Lý Luận bơblang anăn “Ling tơhan Wa Hồ”.

“Ling tơhan Wa Hồ ƀu kơnong jing tơlơi pioh kơsem min boh thâo đôč ôh mơ̆, anai lĕ tơlơi hơmâo lu mơnuih pơčeh tơlơi adoh, adoh suang, jing tơlơi hơmâo lu mơnuih rơgơi kơhnâo čih boh hră, adoh suang lăp đing nao, lăng yôm biă mă, anih pơkŏn ƀu hơmâo ôh. Ling tơhan Wa Hồ pơƀut djŏp tơlơi pơmin pran jua khin hơtai mơ̆ng ling tơhan ta. Lăi nao anŏ hiam gru grua Việt Nam rơnuk Hồ Chí Minh, amăng anun hơmâo gru grua bruă tơhan, gru grua ling tơhan”.

Pơhiăp ƀơi mông bơkơtuai, Trung tướng ơi Trịnh Văn Quyết, Kơ-iăng khua Anom bruă Kơđi čar, Khul tơhan Việt Nam pơsit: anăn pơpŭ yôm “Ling tơhan Wa Hồ” hơmâo mơnuih ƀôn sang đăo gơnang, kiăng khăp brơi kơ ling tơhan mơ̆ng rơnuk blah ayăt Prang. Amăng hrơi pơpă tŭ mơn, mah tơnap tap dơ̆ pă tŭ mơn, djai drơi pô tŭ mơn, samơ̆ ling tơhan ăt khŏm găn rơgao, ngă hiam tui rup Ling tơhan Wa Hồ, jao tơnap jai jă bơngač hloh. Ƀơi anăp hơdôm tơlơi lông lăng ră anai, pran jua hiam tui anai jai kiăng pơtrut tui:

“Amăng rơnuk phrâo, bruă akŏ pơdong ling tơhan, hơkrŭ kơjăp ling tơhan pơgang lŏn ia, pơgang kơjăp Lŏn ia hăng hơdôm tơlơi kiăng jai hrơi prong hloh. Lơ̆m anun, hơmâo khul grup hil neč pơčut pơčao, pơsuh ngă rung răng, hyu ngă mă, hyu lăi mă, pơčut pơčao, lăi pơthâo soh sat tơlơi pơtrun mơ̆ng Ping gah, tơlơi phiăn mơ̆ng kơnuk kơna hăng gru grua mơ̆ng Ling tơhan Việt Nam sông kơtang, tơlơi pơmin hiam “Ling tơhan Wa Hồ”. Hloh kơ abih bang, anŏ yôm prong hloh mơ̆ng pran jua “Ling tơhan Wa Hồ” khŏm hơmâo djă pioh, pơtrut tui kơjăp hloh, djơ̆ hăng tơlơi kiăng, bruă hơmâo jao amăng rơnuk anai”.

Ƀơi anăp hơdôm tơlơi tơnap tap “ngă rung răng tơlơi rơngai” ră anai, lu tơlơi pơgôp hiăp ba tơbiă hơdră kiăng mơdưh pran jua gum pơgôp, hrăm kơjăp bruă, pơtrut tui tơlơi pơmin “Ling tơhan Wa Hồ” amăng rơnuk phrâo. Amăng anun hơmâo tơlơi git gai khut khăt, djŏp mơta mơ̆ng Ping gah; pơtrut akŏ pơdong anih hơdip gru grua hiam amăng Ling tơhan; djă bong kơjăp tơlơi pơmin pran jua yôm mơ̆ng Ling tơhan Wa Hồ, khut khăt pơkơdong glăi tơlơi pơmin kiăng klă mă hơjăn pô.

Jơnum bơkơtai hơmâo lu tơlơi pơgôp hiăp ngă rơđah hơdôm tơlơi yôm phun mơ̆ng tơlơi tơlơi pơmin pran jua “ling tơhan Wa Hồ” jing atur kiăng Ping gah Ling tơhan, Ding jum ling tơhan, Anom bruă phun Kơđi čar hăng ping gah, anom git gai djŏp gưl pơsit tơlơi pơtrun, hơdră git gai črâo bruă abih bang tơhan djă bong, pơtrut tui anŏ yôm mơ̆ng gru grua “Ling tơhan rơnuk Wa Hồ” amăng rơnuk phrâo; ngă truh kih bruă akŏ pơdong Ling tơhan, hơkrŭ kơjăp ling tơhan, pơgang Lŏn ia. Laih dong, jing rơnoh pơkă tơlơi pơmin hiam kiăng khua, mơnuih ping gah amăng Khul tơhan lăng glăi, pơplih mă, gir hrăm kơjăp tui bruă, hơmâo tơlơi pơmin hơkrŭ lŏn ia kơjăp, bang hyu anŏ yôm gru grua “Ling tơhan Wa Hồ” amăng rơnuk phrâo.

Anŏ yôm mơ̆ng gru grua “Ling tơhan Wa Hồ” hơmâo mơ̆ng hơdôm anŏ yôm phara mơ̆ng gru grua tơhan Việt Nam, hơmâo djŏp rơnuk khua, ling tơhan mơ̆ng Khul tơhan Việt Nam hmư̆ tui, djă pioh, pơbuă tui yŭ kơ tơlơi git gai, pơphun ngă bruă, pơtŏp brơi mơ̆ng Ping gah ta hăng Khua mir sir Hồ Chí Minh. Pơtrut tui hăng ngă brơi anŏ yôm gru grua hiam “Ling tơhan Wa Hồ” hơmâo djă bong kơjăp, jă bơngač, gum akŏ pơdong Ling tơhan Việt Nam kơjăp kơtang kơ kơđi čar, pơđĭ tui anŏ klă amăng abih bang bruă, kơtang blah ngă, ngă giong bruă mơ̆ Ping gah, Kơnuk kơna hăng mơnuih ƀôn sang jao.