VOV4.Jarai - Lơ 4/4, ƀơi ƀôn prong Cần Thơ, Grŭp hyu mă bruă mơng khua pơ ala hmâo pơphun jơnum “Bôh thâo lăng tui pioh kơ khua pơ ala mơnuih ƀôn sang ruah” pioh kơ ƀing Khua pơ ala mơnuih ƀôn sang tal 15, khua pơ ala Khul pơ ala mơnuih ƀôn sang, hơdôm mơnuih lăi pơthâo glăi bruă mă, mơnuih gum bruă, mơnuih mă bruă čar sa dua bôh Anom bruă Grŭp Khua pơ ala mơnuih ƀôn hăng hăng Khul pơ ala mơnuih ƀôn sang hơdôm bôh tơring čar, ƀôn prong gah Dơnung dêh čar. Ơi Trần Thanh Mẫn, Kơ-iăng Khua git gai wai lăng pơ ala mơnuih ƀôn sang dêh čar ta nao pơhmư̆ hăng črâo ba bruă jơnum. Bruă jơnum kiăng lăi pơthâo kơ Khua pơ ala bôh thâo abih bang kơ lăng tui, hơdôm bôh thâo kiăng hloh kơ bruă lăng tui, kah hăng: Bôh thâo pơblang tơlơi pơhing, bôh thâo tơña, bôh thâo lăng tui akô̆ bruă, bôh thâo pơphô bruă amăng lăng tui pioh kơ mơnuih pơphô bruă djru ƀirô khua pơ ala mơnuih ƀôn sang. Bruă jơnum tal anai dưi pơpha jing 2 anih, sa pioh kơ ƀing Khua pơ ala mơnuih ƀôn sang hăng Khua pơ ala Khul pơ ala mơnuih ƀôn sang. Truh ră anai, Grŭp hyu mă bruă khua pơ ala mơnuih ƀôn sang hmâo pơphun 4 bruă jơnum pơhrăm brơi kơ khua pơ ala mơnuih ƀôn sang dêh čar hăng khua pơ ala Khul pơ ala mơnuih ƀôn sang ƀơi hơdôm bôh tơring čar, ƀôn prong Hà Nội, Huế hăng Tuyên Quang./.

Siu H’ Prăk: Pơblang