VOV4.Jarai - Mơguah lơ 25/7, ƀơi plơi prong Kon Tum pơphun Jơnum bơkơtuai ƀơi anăp kơplah wah Khul čơđai hăng Khul pơ ala mơnuih ƀon sang tơring čar Kon Tum tal II thun 2022. Anai lĕ mông jơnum pơƀut yôm phăn kiăng ƀing čơđai amăng tơring čar pơdah tơlơi čang rơmang hăng anai lĕ hrơi mông kiăng Khul pơ ala mơnuih ƀon sang tơring čar kah hăng djop gưl gong gai pơdah pran đing nao, gum djru, đing tơngia hmư̆ tơlơi rơkâo mơng ƀing čơđai.

Yă Nghe Minh Hồng, Kơ-iăng Khua Jơnum min mơnuih ƀon sang tơring čar Kon Tum lăi glăi sa, dua bruă mơ̆ ƀing čơđai đing nao

Amăng mông jơnum, 55 čô čơđai lĕ ding kơna Khul čơđai amăng tơring čar hăng tơring glông mơ-it nao Khul pơ ala mơnuih ƀon sang tơring čar Kon Tum 19 tơlơi tơña hăng lu bruă mơ̆ ƀing čơđai đing nao, anun lĕ yua internet brơi lăp djơ̆; bruă pơgô̆ mă čơđai; čang rơmang dưi pơtô hrăm brơi tơlơi hơdip mơda; tuh pơ alin blơi gơnam măi mok yua amăng pơtô hrăm ƀơi hơdôm sang hră; bruă amĭ ama kiăng pơhlôm brơi tơlơi dưi hơjăn mơng ƀing čơđai…Khul pơ ala mơnuih ƀon sang, Jơnum min mơnuih ƀon sang tơring čar Kon Tum, ƀing pơ ala brơi hơdôm gơnong bruă, anom bruă bơdjơ̆ nao hơmâo tŭ mă, lăi glăi tơlơi tơña, laih dong lăi pơthâo, črâo brơi dong kơ ƀing čơđai hơdôm bruă mơ̆ ƀing gơñu đing nao hăng boh thâo pơsir hĭ hơdôm bruă juăt ƀuh amăng tơlơi hơdip mơda.

Siu Đoan: Pơblang