Amăng mông jơnum, Ding jum hmâo lăi pơhing kơ bôh tơhnal pok pơhai, ngă tui hơdôm akô̆ bruă bơdjơ̆ nao bơwih brơi yua kơ tơlơi pơđĭ kyar pơhlôm drơi jăn čơđai muai amăng hơdôm thun dô̆ čơđai ƀơi sang anô̆ hăng amăng plơi pla rơwang 2018-2025. Hơdôm hrơi rơgao, hơdôm ding jum, gơnong bruă, ƀirô, khul grŭp hăng tơring čar, ƀôn prong hmâo djru brơi rơbêh kơ 6 klăk 400 rơbâo prăk kơ sa wot čơđai hăng abih bang prăk mă yua rơbêh kơ 1.646 klai prăk.

Amăng mông jơnum, hơdôm Ding jum, gơnong bruă, tơring čar, ƀôn prong ăt hmâo lăi mơn bôh tơhnal ăt kah hăng hơdôm tơlơi tơnap, tơlơi lông lơm bơwih brơi hăng pơgang ba čơđai muai, rơkâo đĭ jơlan gah pioh hmâo tui tơhnal pơkă, ba tơbiă mơ̆ng hơdôm Tơlơi pơsit mơ̆ng Khua dêh čar, amăng anun, lu khua pơ ala pơdah pran jua bơngot kơ tơlơi taih amang, ngă sat čơđai muai, dŏp mă čơđai ngă anô̆ sông mă hmâo gru than lu tui ƀơi sa dua bôh tơring čar, ƀôn prong, lu mơta tơlơi bưp anô̆ gun, ƀu dưi pơsir./.