Tui tơlơi pơsit pok mơnă hlâo thun pơkă thun 2024 mơng Khua mir sir phrâo lăi pơthâo, Khua mir sir pơsit pok 3.763 čô mơnă glăk krư̆ tui tơlơi ngă soh hăng 7 čô glăk lui hĭ jang jai kơ bruă mă krư̆ tui tơlơi ngă soh, hơmâo tơlơi gal kiăng dưi pok hlâo thun pơkă thun 2024. Bruă pok mơnă hlâo thun pơkă ƀu djơ̆ pơhlôm brơi kơ hlơi ôh ƀudah hăng ƀing mơnă hơpă, mah ƀing mơnă lĕ mơnuih ƀôn sang Việt Nam hăng tač rơngiao.

Ƀing mơnuih dưi pok hlâo kơ thun pơkă ăt ngă tui hơdôm tơlơi phak pơhrua tui tơlơi pơkă amăng tơlơi phiăn anun lĕ: kŏm ƀu brơi ruah ngă mơnuih apăn bruă ƀơi hơdôm anih anom, ăt hơmâo arăng kiăo tui lăng, phak prăk, duh glăi prăk bơdjơ̆ nao bruă ngă soh, hơdôm bruă pơkŏn dong…