Khua git gai pơ ala mơnuih ƀôn sang dêh čar ơi Trần Thanh Mẫn lăng: tal 1 mơng jơnum pơgiong hiam klă; hơmâo mơnuih ƀôn sang đing nao, kiăo tui lăng. Bruă ruah mơnuih apăn bruă hơmâo pơphun hmao tlôn, djơ̆ tơlơi pơkă hăng djop hră plĕ. Mông pơčrông sai ƀơi sang jơnum, ƀơi grup hăng hơdôm mông tơña, lăi glăi pơphun dik dak, ngă pô, akŏ phun, tañ hloh. Lu khua mua pơgôp hiăp tong ten, sit nik, hăng pran jua gum pơgôp, gơgrong hloh, ba tơbiă lu hơdră kiăng djru amăng boh tơhnal git gai wai lăng bơwih ƀong huă-mơnuih mơnam, wai pơgang rơnuk rơnua mơng Kơnuk kơna, djop ding jum, gơnong bruă.

Amăng jơnum lok 34, Jơnum min apăn bruă Khua pơ ala mơnuih ƀôn sang dêh čar sem lăng tong ten hăng pơdah rơđah rơđông hơdôm črăn hră hơpă pơhlôm lăp djơ̆ kiăng mơ-it đĭ Khua pơ ala mơnuih ƀôn sang dêh čar sem lăng amăng tal 2, sit biă ñu hơdôm akŏ bruă bơdjơ̆ nao prong anun lĕ tơlơi phiăn hră pơhlôm nua mơnuih mơnam (čih pơkra glăi) hơdôm črăn hră pơ-ar him lăng mơ-it nao Khua pơ ala mơnuih ƀôn sang dêh čar sem lăng tui tơlơi pơkă amăng 1 lok jơnum (anun lĕ dưm dăp kual ia rơsĭ lŏn ia; tơlơi phiăn wai lăng, mă yua phao kơtuai, boh pơtuh hăng gơnam bơdjơ̆ nao (čih pơkra glăi: hơdôm tơlơi pơtrun ngă tui hơdră yôm phara brơi tơring čar Nghệ An, ƀôn prong Đà Nẵng, Khua git gai pơ ala mơnuih ƀôn sang dêh čar ơi Trần Thanh Mẫn rơkâo Jơnum min apăn bruă Khua pơ ala mơnuih ƀôn sang dêh čar đing nao hơdôm bruă hơmâo pơhrua amăng jơlan hơdră čih pơkra tơlơi phiăn, tơlơi pơtrun amăng thun 2024.

“4 tơlơi phiăn čih pơkra glăi: Tơlơi phiăn čih pơkra, pơhrua sa, dua črăn amăng tơlơi phiăn lŏn mơnai, tơlơi phiăn sang dŏ, tơlơi phiăn sĭ sang dŏ, lŏn mơnai; tơlơi phiăn hơdôm anom bruă čan prăk hăng tơlơi pơtrun mơng Ƀirô Khua pơ ala mơnuih ƀôn sang dêh čar kơ pơhrŏ mă jia sĭ gơnam tam. Hơdôm bruă hơpă hơmâo anom bruă bơdjơ̆ nao hơmâo tơlơi črâo ba, khŏm ngă hiưm pă pơsir hĭ tơnap tap, gun găn”.

Jơnum min apăn bruă Khua pơ ala mơnuih ƀôn sang dêh čar pơgôp hiăp amăng črăn tơlơi phiăn pơhlôm rơnuk rơnua amăng jơlan glông. Khua Jơnum min wai lăng rơnuk rơnua mơng Ƀirô Khua pơ ala mơnuih ƀôn sang dêh čar Lê Tấn Tới lăi rơđah: lơ 22/5, Khua pơ ala mơnuih ƀôn sang dêh čar pơčrông sai ƀơi sang jơnum kơ črăn tơlơi phiăn pơhlôm rơnuk rơnua, hơđong amăng jơlan glông. Djop tơlơi pơgôp hiăp lêng kơ tŭ ư hăng črăn tơlơi phiăn pơhlôm rơnuk rơnua, hơđong amăng jơlan glông hăng hơmâo tŭ mă, pơplih pơkra. Sit biă ñu, Khua jơnum min wai pơgang rơnuk rơnua lăi rơđah: hluai tui tơlơi sit nik amăng hrơi blan rơgao, rơkâo Jơnum min apăn bruă Khua pơ ala mơnuih ƀôn sang dêh čar pơhrua  tơlơi pơkă “rơdêh pơgiăng čơđai sang hră ƀudah rơdêh pơgiăng mơnuih pơlir hrŏm hăng pơgiăng čơđai nao sang hră” amăng črăn 46 amăng tơlơi phiăn anai. Kơ-iăng Khua git gai pơ ala mơnuih ƀôn sang dêh čar ơi Nguyễn Khắc Định brơi thâo:

“Rơdêh pơgiăng čơđai nao sang hră kiăng pơhlôm tui hơnong pơkă phara, ngă hiưm pă kiăng mơnuih wai lăng, mơnuih mơgăt rơdêh lơm trun mơng rơdêh thâo ƀu hơmâo hlơi dong tah amăng rơdêh. Ƀing ta kiăng lăi pơthâo tơlơi anai tơl abih bang mơnuih, wai lăng kjăp djop anih, pơphun pel ĕp tong ten kiăng pơhlôm hơdôm boh rơdêh ƀu djơ̆ hăng hơnong pơkă amra lui hĭ abih”.

Pơdah tơlơi tŭ ư hrŏm hăng bruă pơkă kjăp hăng hơdôm rơdêh pơgiăng ƀing čơđai anet, pơglôm rơnuk rơnuk rơnua, hơđong amăng bruă pơgiăng ƀing čơđai anet nao pơ sang hră hăng rơdêh ôtô, Khua čih pioh Ƀirô Khua pơ ala mơnuih ƀôn sang dêh čar ơi Bùi Văn Cường brơi thâo; rơngiao kơ tơlơi pơkă rơkâo hăng rơdêh ôtô, dŏ tơlơi rơkâo hăng mơnuih mơgăt, mơnuih wai lăng, sang hră dong…Sit biă ñu bruă pơgiăng ƀing čơđai gưl I, čơđai anet kiăng pơhlôm grê dŏ lăp djơ̆ hăng hnưr ƀing čơđai tui tơlơi pơkă, hăng kiăng ngă rơđah jao brơi anom bruă hơpă kiăng pơhlôm brơi tong ten:

“Črăn 70 tơlơi phiăn Jơlan glông pơkă hơmâo 2 anih pơgiăng čơđai nao sang hră lĕ sang hră hăng anih anom bơwih ƀong gah pơdŭ pơgiăng, rơkâo tơlơi phiăn anai ƀu djơ̆ kơnong pơkă tong ten tơlơi glăm ba mơng sang hră đôč ôh mơ̆ wŏt tơlơi pơkă kơ anih anom bơwih ƀong gah pơdŭ pơgiăng lơm pơgiăng ƀing čơđai nao sang hră hăng rơdêh ôtô ăt gơgrong amăng bruă anai”.

Ăt amăng jơnum anai, Jơnum min apăn bruă Khua pơ ala mơnuih ƀôn sang dêh čar pơgôp hiăp kơ bruă lăi pơthâo, tŭ mă tơlơi pơgôp, pơplih pơkra črăn tơlơi phiăn plơi prong jưh jom (čih pơkra glăi) hăng pơgôp hiăp amăng akŏ bruă dưm dăp man pơdong plơi prong jưh jom Hà Nộ rơwang thun 2021-2230, anăp nao truh thun 2050 hăng pơplih pơkra akŏ bruă hrŏm plơi prong jưh jom Hà Nội truh thun 2045, anăp nao truh thun 2065./.