VOV4.Jarai - Rơwang hrơi tơjuh rơgao, ƀơi sang bruă khua pơ ala mơnuih ƀon sang, hơmâo pơphun jơnum lok 9 mơng Jơnum min khua apăn bruă pơ ala mơnuih ƀon sang dêh čar. Jơnum tal anai hơmâo kah pơpha jing 2 wơ̆t hăng 7 hrơi ha mơkrah ngă bruă. Lăp đing nao, ƀơi mông jơnum anai, Jơnum min khua apăn bruă pơ ala mơnuih ƀon sang dêh čar pioh 1 hrơi ngă bruă hăng 2 čô khua amăng Kơnuk kơna. Tơdơi kơ hrơi pơphun jơnum, rơwang hrơi tơjuh rơgao, Jơnum min khua apăn bruă pơ ala mơnuih ƀon sang pơgôp hiăp kơ kơčăo bruă Tơlơi phiăn hơdră ngă bruă mơng akŏ truh pơ tlôn, hră pơ-ar sem lăng, pơsit ba mơnuih gơñ jrao ma túy mơng 12 thun truh yŭ 18 thun khŏm nao pơ anih añ jrao; hăng sa, dau tơlơi yôm phun pơkŏn dong.

Pơhiăp pơphun mông Jơnum, Khua git gai pơ ala mơnuih ƀon sang dêh čar ơi Vương Đình Huệ brơi thâo: Jơnum min khua apăn bruă pơ ala mơnuih ƀon sang dêh čar hơmâo ngă tui tơlơi pơkă, hơduah tơña, mă tơlơi pơgôp hiăp kơ 6 mơta bruă. Kiăo tui hră tŭ ư jing pơsit 2 mơta bruă tơña Khua ding jum Pơkra gơnam sĭ mơdrô Nguyễn Hồng Diên hăng Khua ding jum Kông ngăn lŏn tơnah hăng ayuh hyiăng lŏn adai Trần Hồng Hà. Tơlơi hơmâo tơña kơ Khua ding jum pơkra gơnam sĭ mơdrô pơƀut kơ bruă pơkra gơnam, bruă sĭ ia săng ia jâo; bruă pơkă nua ia săng ia jâo amăng thun blan rơgao. Bruă wai lăng anih sĭ mơdrô, pơgang pơgăn sĭ gơnam ča čot, gơnam pơkra mă ča čot, gơnam ƀu klă, ƀu thâo rơđah anih pơkra....Khua ding jum Kông ngăn lŏn tơnah hăng Ayuh hyiăng lŏn adai Trần Hồng Hà lăi glăi bruă ngă tui tơlơi pơtrun tơña hăng wai lăng akŏ bruă mơng Ƀirô khua git gai pơ ala mơnuih ƀon sang bơdjơ̆ nao bruă čuk pơkra, wai lăng, mă yua lŏn tơnah ƀơi plơi prong. Tơlơi gơgrong bruă hăng hơdră pơsir bruă arăng mơneč mă bruă pơjuă nua amăng mông jơnum bơrơsua blơi lŏn tơnah hăng nua rơgao đơi hăng nua pơkă mơng anih sĭ mơdrô či pơđĭ tui nua lŏn ƀơi hơdôm kual ieo gah kiăng ƀong lơi mă hơjăn. Khua git gai pơ ala mơnuih ƀon sang dêh čar ơi Vương Đình Huệ lăi:

“Hrŏm hăng bruă pơphun ngă, wai lăng akŏ bruă prong mơng Ƀirô khua pơ ala mơnuih ƀon sang hăng Jơnum min khua apăn bruă pơ ala mơnuih ƀon sang lĕ hơdôm tơlơi pơplih klă mơng bruă tơña, lăi glăi tơlơi tơña pơsit anai lĕ bruă wai lăng ƀơi anăp, klă mơng Khua pơ ala mơnuih ƀon sang, jing ngă bang hyu, pơhưč arăng mă bruă pơčeh phrâo gir pơplih klă tui bruă wai lăng hăng ngă brơi bruă mơng khua mua pơ ala mơnuih ƀon sang kiăo tui hăng tơlơi hơmâo sit nik, djơ̆ hăng tơlơi hơdip; djơ̆ hăng tơlơi kiăng mơng mơnuih ƀon sang hăng ƀing kư tri kiăng akŏ pơjing Kơnuk kơna tui tơlơi phiăn xã hội chủ nghĩa mơng mơnuih ƀon sang, yua mơnuih ƀon sang pơdong, bơwih brơi mơnuih ƀon sang”.

Khua git gai pơ ala mơnuih ƀon sang Vương Đình Huệ.

Mông jơnum tơña ƀing khua hơmâo pơphun amăng lơ 16/3, hơmâo pơphun ƀơi Sang jơnum prong Diên Hồng, Sang bruă khua git gai pơ ala mơnuih ƀon sang hăng pơtruh lăng nao rai amăng tivi hăng 63 Grup khua pơ ala mơnuih ƀon sang dêh čar laih anun hơmâo pơdah amăng tivi hlao kiăng abih bang mơnuih ƀon sang lăng tui.

Ăt amăng rơwang hrơi tơjuh rơgao, tơdơi mông jơnum lok 9, Jơnum min khua apăn bruă pơ ala mơnuih ƀon sang tŭ ư kiăng pơtrun Tơlơi phiăn kơ akŏ tlôn ngă bruă, hră pơ-ar sem lăng, pơsit ba mơnuih gơñ jrao ma túy mơng 12 thun truh yŭ kơ 18 thun mut amăng anih añ jrao amăng hơdôm mơta tơlơi anai: ƀing gơñ jrao ma túy ƀu nao rơkâo čih anăn, ƀu ngă tui ƀudah rŏng či lui mă pô bruă añ jrao ma túy; mơnuih gơñ ma túy amăng hrơi blan glăk añ jrao hơmâo arăng ƀuh mă yua glăi dong jrao ma tuý; ƀing gơñ jrao ma túy hrŭp hăng jrao ngă gơñ mơn ƀu nao čih anăn, ƀu ngă tui ƀudah rŏng či pơdơi bruă añ jrao.

Khă hnun hai, tui hăng ƀing khua, ƀing hơmâo pơplih mơng tơlơi phiăn lĕ ƀing gơñ jrao ma túy djŏp 12 thun truh yŭ 18 thun laih anun ba gơñu nao añ jrao ƀu djơ̆ bơtơhmal mơnuih soh kơđi prong ôh, anun kiăng pơƀuh rơđah tơlơi phara anai, ngă hră pơ-ar amuñ brơi, thâo pap, pơhlôm klă hloh kơ mơnuih nao añ jrao. Khua Jơnum min Ling tơhan - rơnuk rơnua mơng Ƀirô khua git gai pơ ala mơnuih ƀon sang Lê Tấn Tới lăi:

“Hơmâo ƀing đuăi hyu ča čot, ƀu hơmâo sang anŏ, ta čih glăi anăn ñu, amĭ ama, adơi amai ñu tơnap mơn, aka ƀu lăi nao ôh bruă ngă soh prong mơ̆ pô ngă soh yŭ 18 thun. Kâo dŏ pơmin, lơ̆m glăk ngă hră pơ-ar, pơsit pô nao añ jrao, arăng lăi “ană kâo rơkâo mă pô ñu nao añ jrao”, pơsit tui anun jing rơngiă mông, glêh glar biă. Anai lĕ tơlơi aka ƀu djơ̆ anun yơh hơmâo mơnuih pơhmao mă ƀong prăk”.

Ƀơi mông jơnum, Kơ-iăng ding jum ia jrao Trần Văn Thuấn lăi: gơñ jrao ma túy jing tơlơi ruă ƀu thâo hlao ôh mơng dlô, hơmâo WHO pơsit jing tơlơi ruă lok nao lok rai aka ƀu hơmâo jrao pơjrao. Ding jum ia jrao tŭ ư pơhrua tui ƀing ƀu nao rơkâo añ jrao tui tơlơi phiăn mơ̆ amăng hrơi sang phăt kơđi pơsit khŏm ba nao añ jrao, ƀudah amĭ ama, pô čem rông pô gơñ jrao rơkâo nao añ jrao.

Amăng tal 1 anai, Jơnum min khua apăn bruă pơ ala mơnuih ƀon sang ăt pơgôp hiăp kơ Tơlơi lăi pơthâo glăi boh than mơng blung a mơng grup wai lăng bruă dưm dăp, pơplih glăi bruă ngă hră pơ-ar mơng tơring glông, să rơwang thun 2019-2021. Tơlơi lăi pơthâo blung a mơng grup wai lăng “Bruă ngă tui tơlơi phiăn kơ čơkă mơnuih ƀon sang hăng pơsir brơi hră ngă kơđi, ƀom mơnuih ngă soh mơng lơ 1/7/2016 truh lơ 1/7/2021”.

Rơngiao kơ anun, ƀơi mông jơnum anai, Jơnum min apăn bruă pơ ala mơnuih ƀon sang ăt pơgôp hiăp tơlơi lăi pơthâo glăi mơng Kơnuk kơna kơ klah čun, pơtŏng glăi abih bang bruă man pơkra jơlan Hồ Chí Minh; sem lăng bruă pơhrua tui prăk kơnuk kơna mă mơng prăk djru ƀu kiăng tla glăi mơng čar rơngiao; bruă pơhrư̆i sui hrơi ngă tui hăng brơi prăk tuh pơ plai mă mơng prăk kơnuk kơna thun 2021 jing thun 2022 dong; pơgôp hiăp kơ akŏ bruă tuh pơ plai ngă bruă amăng rơwang thun găp ƀrô 2021-2025 kơ hơdôm kơčăo bruă, hơdôm prăk djru aka ƀu pơpha nao.

VOV1: Čih - Siu H’Mai: Pơblang