VOV4.Jarai - Mơguah lơ 25/7, ƀơi Ƀirô Khua pơ ala mơnuih ƀon sang dêh čar pơphun Jơnum mă tơlơi pơgôp hiăp amăng črăn tơlơi pơtrun ba tơbiă tơlơi pơkă tal jơnum Khua pơ ala mơnuih ƀon sang dêh čar (čih pơkra glăi). Amăng mông jơnum ƀing khua mua đing nao pơgôp hiăp amăng hơdôm boh tơhnal akŏ phun amăng črăn tơlơi pơtrun kiăng pơtrut bruă mă amăng Ƀirô Khua pơ ala mơnuih ƀon sang dêh čar jai hrơi klă ƀiă dong hăng hrưn đĭ amăng bruă mă, tŭ yua amăng hơdôm tal jơnum Khua pơ ala mơnuih ƀon sang dêh čar. Lu tơlơi pơgôp hiăp brơi ƀuh kiăng klă dong amăng ba tơbiă tơlơi pơtrun đĭ jing pơtrun tơlơi phiăn kiăng pơhlôm tơpă sit lơ̆m pơphun ngă tui, kah hăng lăp djơ̆ tui tơlơi găn rơgao mơng sa, dua boh dêh čar glăk ngă tui ră anai. Ƀing khua mua ăt đing nao pơgôp hiăp amăng bruă pơhrua tơlơi pơkă ƀu kiăng hră lăi pơthâo amăng sa, dua mông jơnum abih bang kiăng huăi rơngiă hrơi mông pơphun jơnum hăng ƀing khua mua hơmâo hrơi mông pơgôp hiăp; Kơ bruă pơhrua tơlơi pơkă kŏm Khua pơ ala mơnuih ƀon sang mă yua hră pơ-ar aka ƀu tŭ yap; kơ bruă ngă, hră pơ-ar sem lăng, tơlơi pơtrun hơdôm bruă yôm phun amăng bơwih ƀong huă-mơnuih mơnam; kơ bruă aka ƀu klă amăng tơlơi phăn amăng črăn pơkă amăng tơlơi phăn.

Siu Đoan: Pơblang