Jơnum min apăn bruă Khua pơ ala mơnuih ƀôn sang dêh čar ta hmâo gum pơhiăp lăi pơblang, tŭ mă, pơplih pơkra hră čih Tơlơi phiăn pơgang pơgăn apui ƀong hăng pơtlaih mơnuih hmâo tơlơi truh. Bơhmu hăng hră čih Tơlơi phiăn lăi pơthâo amăng Tal jơnum lok 7, hră čih pơkra Tơlơi phiăn tal anai pơkă 1 mơta tơlơi phara kơ pơgang pơgăn apui ƀong pioh kơ sang dô̆; 1 mơta tơlơi phara kơ pơgang pơgăn apui ƀong hăng sang dô̆ pơkĕ hrŏm bơwih ƀong sĭ mơdrô; Pơhrua nao tơlơi pơkă pioh kơ dua djuai sang dô̆ anai pơhlôm tơlơi kiăng kơ tơlơi pơkă pơhlôm pơgang apui ƀong, tơtlaih. Khă hnun hai, tui hăng Kơ-iăng Khua Jơnum min tơlơi phiăn Nguyễn Trường Giang, hơdôm tơlơi pơkă anai dô̆ hrŏm hrŏm đôč, tơnap ngă tui biă hăng ƀirô ngă tui tơlơi phiăn hăng mơnuih ƀôn sang:

 “Ƀing ta pơkă lĕ gơnam lăi pơthâo apui ƀong, jơlan pioh hmâo angin, gơnam ƀruăč ayuh apui, ayuh măt tui tơlơi pơkă. Tơlơi ƀơi anô̆ lĕ hlơi pơkă tui anai lĕ ƀu rơđah ôh. Dua lĕ, anai jing tơlơi mơ̆ ră anai hmâo lu ƀơi plơi prong, hơdôm sang anăp gah jơlan leng kơ hmâo tơlơi pơkĕ hrŏm hăng sĭ mdrô. Tơdah ƀu pơkă rơđah thơ tâ̆o hloh kơ Gong gai dêh čar ƀudah Khua Ding jum Kông ang pơkă”.

Hơdôm ding kơna Jơnum min apăn bruă Khua pơ ala mơnuih ƀôn sang dêh čar ta biă ñu lăi rơđah kơ tơhnal tơnap amăng pơgang, pơgăn apui ƀong pioh kơ sang lu tal. Khua Jơnum min bôh thâo pơtô juăt Nguyễn Đắc Vinh rơkâo:

 “Sang lu tal lĕ lu biă, hmâo lu mơnuih tum pơƀut. Tơdah hmâo tơlơi apui ƀong thơ tơnap biă pơtlaih ñu. Yua anun klă hloh hmâo bruă pơgang pơgăn ñu. Samơ̆ dua dong lĕ hơdôm jơlan gah hăng gơnam mă yua pơgang pơgăn apui ƀong kơ sang lu tal glêh tơnap hloh, anun pơkă rơđah bruă anai”.

Bơ̆ Kơ-iăng Khua git gai wai lăng pơ ala mơnuih ƀôn sang dêh čar ta ơi Trần Quang Phương pơtŏng sit.

 “Abih bang hơdôm djuai sang leng kơ khom hmâo tơlơi pơkă djơ̆, rơnoh pơkă. Samơ̆ ră anai anih dô̆ lu mơnuih lu tal ăt jing tơlơi đing nao hloh lĕ pơkă kơ pơgang, pơgăn apui ƀong. Bơhmutu ñu hmâo lu anih dô̆ lu mơnuih pơdŏng amăng jơlan añep, ƀu hmâo jơlan pioh rơdêh pơgang apui mut. Kơnong kơ sa dua bôh sang dô̆ lu mơnuih phrâo ră anai đôč tui tơlơi pơkă pơdŏng plơi prong lĕ hmâo”.

Ăt amăng rơwang hrơi tơjuh rơgao mơn, lơm hmâo tơlơi gum pơhiăp kơ bruă pơblang, tŭ mă, pơplih pơkra hră čih Tơlơi phiăn mă jia (pơplih pơkra), Jơnum min apăn bruă Khua pơ ala mơnuih ƀôn sang dêh čar ta lăi lĕ, bruă pơplih mă jia mơ̆ng 0-5% lĕ mơnuih ngă đang hmua amra bơdjơ̆ nao prong bruă ngă đang hmua yua kơ nua kơmok pruai amra đĭ, ba truh đĭ nua gơnam tam mă mơ̆ng đang hmua. Khua Jơnum min djuai ania Y Thanh Hà Niê Kdăm lăi rơđah:

 “10 thun hăng anai, nua kơmok ƀu hrŏ trun ôh. Tui tơlơi lăi pơthâo glăi mrô kơmok pruai ngă đang hmua dong đĭ samơ̆ nua sit ñu ƀu hrŏ trun ôh hăng mơnuih ngă đang hmua khom glăm ba phun. Arăng đing nao biă lĕ anô̆ klă kơmok mơ̆ kâo pơmin anai jing bruă mă mơ̆ Kơnuk kơna amăng wai lăng kiăng đing nao”.

Khă hnun hai, ƀơi rơnoh lăng mơ̆ng khul pơlir hơbit sĭ mơdrô măi mok Việt Nam, ơi Đậu Anh Tuấn brơi thâo, bruă pơplih kơmok pruai hơdai nao tuh jia 5% amra ƀu ngă prăk blơi kơmok đĭ ôh:

 “Bôh thâo pơkra kơmok pruai mơ̆ng ƀing ta prong biă, yua anun tơdah mă yua tuh jia 5% thơ kiăng lăi blơi mut kơmok ăt khom tuh jia 5% mơn, amăng dêh čar prăk yua pơkra kơmok hrŏ trun. Tui anun kơmok pruai amăng dêh čar ƀu hmâo gru than pioh đĭ ôh hăng đa lĕ amra hmâo lu mơnuih blơi dong. Anai ăt lĕ sa tơlơi kiăng phun pơmin nao ngă hiưm hơpă ƀing ta gơgrong mă bôh thâo pơkra kơmok pruai hăng djă pioh rah bruă pơkra kơmok pruai amăng lŏn ia”.

Klah čun mông jơnum tui akô̆ bruă tơlơi phiăn blan 8, Khua git gai wai lăng pơ ala mơnuih ƀôn sang dêh čar ta ơi Trần Thanh Mẫn rơkâo hơdôm ƀirô bơdjơ̆ nao ngă giong 10 mơta hră čih tơlơi phiăn pioh mơ-ĭt kơ mông Jơnum Khua pơ ala mơnuih ƀôn sang tui bruă gơgrong, pơkă hlâo pơphun mơ̆ng lơ 28-30/8. Khua git gai wai lăng pơ ala mơnuih ƀôn sang dêh čar ta ăt brơi thâo mơn, mông jơnum 36 mơ̆ng Jơnum min apăn bruă Khua pơ ala mơnuih ƀôn sang dêh čar amra pơphun mơ̆ng 19-22/8, bôh yôm lăp đing nao amăng mông jơnum anai lĕ Jơnum min apăn bruă Khua pơ ala mơnuih ƀôn sang dêh čar amra tơña hăng 3 čô Khua Ding jum.

 “Mông jơnum tal 36, tơlơi tơña lăi glăi tơlơi tơña mơ̆ng hơdôm ding jum, gơnong bruă. Khua git gai wai lăng pơ ala mơnuih ƀôn sang dêh čar ta hăng ƀing Kơ-iăng Khua git gai wai lăng pơ ala mơnuih ƀôn sang hmâo git gai hơdôm ding jum, gơnong bruă hăng gong gai pioh prăp lui kơ mông tơña hăng lăi glăi tơlơi tơña anai. Amăng anun, Ding jum đang hmua hăng pơđĭ kyar ƀon sang, Ding jum sĭ mơdrô, Ding jum bôh thâo đưm, bơkơjăp drơi jăn hăng tuai čuă ngui amra lăi glăi tơlơi tơña”./.