Amăng lơ 3/11 laih rơgao, Khua pơ ala mơnuih ƀôn sang dêh čar hơmâo pioh ha hrơi pơčrông sai amăng sang jơnum kơ sa, dua boh tơhnal dŏ pơmĭn phara mơng črăn tơlơi phiăn lŏn mơnai (čih pơkra glăi). Tui him lăng, Khua pơ ala mơnuih ƀôn sang dêh čar amra hluai tui tơlơi phiăn lŏn mơnai (čih pơkra) amăng jơnum lok 6. Samơ̆, Khua jơnum min bơwih ƀong huă mơng Ƀirô Khua pơ ala mơnuih ƀôn sang dêh čar Vũ Hồng Thanh brơi thâo, ră anai črăn tơlơi phiăn dŏ 21 tơlơi dŏ pơmĭn phara, rơkâo tơlơi pơgôp mơng Khua pơ ala mơnuih ƀôn sang.

Lu khua mua lăi pơtong, anai lĕ črăn tơlơi phiăn yôm phăn, kiăng lăng glăi tong ten hlâo kơ mă yua. Sit biă ñu lĕ tơlơi pơkă pơhrui glăi lŏn mơnai yua tơlơi dưi lŏn ia, mơnuih mơnam; kơ bruă pơplih pô yua lŏn ngă hmua, sit biă ñu lŏn ngă hmua pơdai; kơ tơlơi dưi hăng tơlơi glăm ba mă yua lŏn mơng mơnuih ƀon sang Việt Nam dŏ hơdip pơ tač rơngiao; ƀudah hơdră pơkă lăng nua lŏn.