VOV4.Jarai - Tô̆ tui dong bruă jơnum tal 16, čơtlăm lơ 11/10, gum pơhiăp kơ hơdôm tơlơi lăi pơthâo glăi bơwih ƀong – mơnuih mơnam hăng prăk kak ngăn drăp kơnuk kơna, Jơnum min apăn bruă Khua pơ ala mơnuih ƀôn sang dêh čar rơkâo ngă rơđah hăng mrô mă yua djơ̆, nua blơi lu hloh kơ nua sĭ ngă lu anom bơwih ƀong sĭ mơdrô ia xăng, ia jâu lup hăng khom krư̆ bah amăng. Hrom hăng anun pơplih pơkra nua ia xăng ia jâu; wai lăng nua hơdôm gơnam kiăng yua lu, yua kơ lom nua ia xăng ia jâu hrŏ trun, lu mơta gơnam ăt ƀơi rơnoh dlông mơn. Ăt amăng cơtlăm lơ 11/10 mơn, gum pơhiăp kơ tơlơi lăi pơthâo glăi mơng Gong gai dêh čar kơ bôh tơhnal pok pơhai ngă tui Jơlan hơdră pơkă mơng lŏn kơ pơđĭ kyar bơwih ƀong mơnuih mơnam kual neh wa djuai ania ƀiă hăng kual čư̆ siăng rơwang 2021-2030, Jơnum min apăn bruă Khua pơ ala mơnuih ƀôn sang dêh čar rơkâo tañ ngă giong jơlan gah pơpha abih mrô prăk yua pơđĭ kyar ngăn drăp kơnuk kơna rơwang 2021-2025 dô̆ glăi; hmâo hơdră pơhrui hrom hơdră bruă, djă pioh ngăn rơnoh kơplah wah hơdôm Jơlan hơdră pơkă mơng lŏn ia, pơhlôm ba glăi bôh tŭ yua ngăn rơnoh tuh pơplai./.

VOV.VN čih

Siu H’ Prăk pơblang