VOV4.Jarai-Mơguah lơ 21/4, jơnum lok 10 mơ̆ng Jơnum min apăn bruă pơ ala mơnuih ƀôn sang dêh čar pơgôp hiăp kơ tơlơi phiăn Pơkă lăng hăng pơjrao tơlơi duăm ruă. Pơhiăp ƀơi mông jơnum, Khua git gai pơ ala mơnuih ƀôn sang dêh čar ta ơi Vương Đình Huệ lăng yôm kơčăo bruă tơlơi phiăn anai, hơmâo čih pioh tơlơi pơgôp hiăp kiăng ngă giong boh yôm phun, ăt kah hăng čih pioh hmao kru hơdôm tơlơi hmao kah hăng hơdră pơhlôm, pơgang klin phrâo anai, pơdah rai tơlơi gir run pioh rơkâo đĭ amăng mông jơnum lok 3 khua mua pơ ala mơnuih ƀôn sang dêh čar ta pơ anăp.

Khua git gai pơ ala mơnuih ƀôn sang dêh čar ơi Vương Đình Huệ pơhiăp git gai jơnum

Ơi Vương Đình Huệ ăt lăi pơtong, tơlơi phiăn anai ngă djơ̆ anŏ pơkă kơ bruă pơgang tơlơi suaih pral, pơgang ba ƀing ơi ia jrao ăt kah hăng ngă rơđah, tong ten bruă mă pơkă lăng hăng pơjrao duăm ruă; kiăng hơmâo tơlơi phiăn mă yua, laih anun jak  mơnuih ƀôn sang ngă hrŏm amăng bruă akŏ pơdong anih pơjrao tơlơi duăm ruă. Pơsir hĭ tơlơi dŏ kơƀah măi mok rơgơi, pơjrao hăng hơdră phrâo, pơtrun rơnoh prăk apah pơkă lăng hăng pơjrao mơnuih duăm ruă đĭ pơmă đơi pơkă hăng rơnoh prăk mơnuih ƀôn sang dưi hơmâo.

Nay Jek: Pơblang