Nao jơnum hơmâo ƀing khua mua hơdôm ding jum, gơnong bruă, kơnuk kơna; Khua git gai Ping gah tơring čar, Khua Jơnum min mơnuih ƀôn sang 5 boh tơring čar (Dak Lak, Gia Lai, Kon Tum, Lâm Đồng, Dak Nông) hăng 9 boh tơring čar jum dar (Quảng Nam, Quảng Ngãi, Bình Định, Phú Yên, Khánh Hòa, Ninh Thuận, Bình Thuận, Đồng Nai, Bình Phước).

Đĭ pơhiăp pok blung jơnum, Kơ-iăng khua dêh čar Trần Lưu Quang lăi pơtong: Tơlơi bơwih ƀong huă-mơnuih mơnam kual Dap kơdư hơmâo tơlơi yak nao pơđĭ kyar; gru grua djop djuai ania hơmâo djă pioh, tŏ tui hăng lăi pơthâo; bruă wai pơgang abih bang mơnuih, pran đăo gơnang mơng mơnuih ƀôn sang hơkrŭ kjăp, hơđong amăng mơnuih mơnam.

Samơ̆, pơđĭ kyar bơwih ƀong huă-mơnuih mơnam kual Dap kơdư ăt aka ƀu bơkơnar amăng kual lŏn, tơlơi dưi, tơlơi gal amăng kual. Kiăng pơđĭ kyar hơđong kjăp kual Dap kơdư, mơnuih ƀôn sang hơmâo tơlơi hơdip trơi pơđao, yâo mơ-ak, hơkrŭ hơđong, rơnuk rơnua djơ̆ hăng hơnong pơkă, tơlơi rơkâo amăng tơlơi pơtrun mrô 23 mơng Ding jum kơđi čar, Khua dêh čar hơmâo pơsit ngă tui Akŏ bruă pơđĭ kyar bơwih ƀong huă-mơnuih mơnam pơlir hăng wai pơgang hơđong, rơnuk rơnua kual Dap kơdư.

Hơnong pơkă phun mơng akŏ bruă pơđĭ kyar bơwih ƀong huă-mơnuih mơnam pơlir hăng bruă wai pơgang rơnuk rơnua, hơđong amăng kual Dap kơdư lĕ hrưn đĭ ba glăi tŭ yua amăng pơđĭ kyar bơwih ƀong huă-mơnuih mơnam pơlir hăng pơhlôm hơđong amăng kual Dap kơdư pơ anăp anai. Hluai tui tơlơi anun, ƀing khua mua đing nao pơčrông sai kiăng ngă tui djơ̆, tañ ba tơlơi pơtrun mrô 23 mơng Kơnuk kơna hăng akŏ bruă mut amăng tơlơi hơdip mơda, pơgôp pơđĭ kyar kual Dap kơdư tañ, hơđong kjăp, wai pơgang rơnuk rơnua.

Amăng mông jơnum, Đại tướng Tô Lâm pơsit tong: Ping gah, Kơnuk kơna lêng kơ đing nao biă mă djop mơta hăng hơmâo ba tơbiă lu tơlơi pơtrun, tơlơi klah čun kiăng pơđĭ kyar amăng kual Dap kơdư. Akŏ phun lĕ tơlơi pơtrun mrô 23 mơng Ding jum kơđin čar kơ “Jơlan gah pơđĭ kyar bơwih ƀong huă-mơnuih mơnam hăng pơhlôm rơnuk rơnua, hơđong amăng kual Dap kơdư truh thun 2030, anăp nao truh thun 2045” hăng Akŏ bruă pơđĭ kyar bơwih ƀong huă-mơnuih mơnam pơlir hăng wai pơgang rơnuk rơnua, hơđong amăng kual Dap kơdư mơng Kơnuk kơna.

Đại tướng Tô Lâm rơkâo djop ding jum, gơnong bruă, gong gai ƀon lan mut hrŏm ha pran sa jua ngă bruă khut khăt, ngă brơi giong hơdôm tơlơi git gai; đing nao djop hơdră bruă, rơnoh mă yua ngă brơi tŭ yua hơdôm tơlơi črâo trun, hơdră bruă phrâo, pơplih kiăng ngă tui hơdôm hơnong pơkă tong ten amăng akŏ bruă hơmâo ba tơbiă hăng tơlơi pơsit “5 črăn khut khăt”. Sit biă ñu: gir run pơsir hĭ tơnap tap, gung găn, anŏ aka ƀu klă; khut khăt pơgiong, pok pơhai tŭ yua hơdôm hơdră bruă phun ƀơi kual Dap kơdư; pơtrut kiăng hrưn đĭ pơplih phrâo, ngă mơdưh, tŭ mă hơdôm tơlơi dưi, tơlơi gal amăng kual, tŏ tui gru grua hing ang, tơlơi hơdip ană mơnuih ƀơi kual Dap kơdư, hăng pran sông kơtang kar hăng Dăm San đưm hlâo adih, anai jing anŏ pơtrut pơđĭ kyar bơwih ƀong huă, gru grua, mơnuih mơnam, hrưn đĭ tơlơi hơdip mơda kơ djop djuai ania ƀơi kual Dap kơdư, “anăm brơi hlơi ôh dŏ glăi gah tlôn”; khut khăt pơsir hĭ tañ, mơng ataih, mơng ƀon lan hơdôm tơlơi ngă tơnap tap amăng pơhlôm rơnuk rơnua, anăm brơi kơtuă; khut khăt hơkrŭ anih anom kơđi čar ƀơi ƀon lan brơi kjăp, djơ̆ hăng tơlơi rơkâo, bruă jao; hrưn đĭ pran gơgrong mơng ƀing apăn bruă, mơnuih mă bruă lơm ngă tui bruă jao, djơ̆ hăng tơlơi git gai mơng Khua git gai Ping gah dêh čar Nguyễn Phú Trọng, Khua dêh čar Phạm Minh Chính anun lĕ “Hlơi ƀu khin ngă, hlơi ƀu dưi ngă, dŏ ha bơnah brơi mơnuih pơkŏn ngă”.

Đại tướng Tô Lâm lăi pơtong: rơkâo gưl Ping gah, gong gai hơdôm boh tơring čar ieo gah gum hrŏm kjăp hăng hơdôm boh tơring čar kual Dap kơdư amăng pok pơhai akŏ bruă mơng Kơnuk kơna, kơtưn ngă hrŏm, pơlir hơbit pơđĭ kyar bơwih brơi tuai čuă ngui, anih anom, jơlan glông, pơhưč tuh pơ alin, tŭ mă hơdôm tơlơi gal mơng ayuh hyiăng lŏn mơnai, mơnuih mă bruă glăk hơmâo mơng kual Dap kơdư. Mơng gru grua hing ang sông kơtang mơng đưm đă ră hlâo, pơsăn hơtai amăng rơnuk blah wang hăng pran kơtang, thâo pơčeh phrâo hrưn đĭ pơplih phrâo, pran mut hrŏm, akŏ phĭ tui Ping gah, tui wa Hô mơng djop djuai ania ƀơi kual Dap kơdư, Đại tướng Tô Lâm đăo gơnang: Ping gah, gong gai, ling tơhan hăng mơnuih ƀôn sang hơdôm tơring čar kual Dap kơdư amra găn rơgao tơnap tap, tơlơi lông, ngă truh kih bruă jao pơđĭ kyar bơwih ƀong huă-mơnuih mơnam, pơhlôm rơnuk rơnua, hơđong, tañ ba kual Dap kơdư pơđĭ kyar tañ hloh, djop mơta hăng hơđong kjăp./.