Rơgao 5 thun pok pơhai ngă hrŏm bruă mă abih bang mơnuih ƀôn sang gum hrŏm pơgang rơnuk rơnua lŏn ia plah wah tơhan kông an hăng djop gưl mơnuih tơpuôl hơmâo ƀuh pơblih tŭ yua biă mă amăng bruă mă, pran jua gum hrŏm mơ̆ng ƀing khua mua, ling tơhan, mơnuih mă bruă čar, mơnuih ngă kông ñơn mơ̆ng dua anom bruă.

Pơhiăp git gai jơnum, Kơ-iăng khua ding jum kông an, Lê Quốc Hùng rơkâo anom bruă mơnuih tơpuôl hăng ƀing ngă kông ñơn, mơnuih apăn bruă čar djop sang bruă amăng dêh čar kiăng ngă hrŏm na nao tong ten hloh hăng tơhan kông an, kiăng pơtrut ngă bruă hur har sem lăng, pơgăn tơlơi soh sat, răm ƀăm mơnuih mơnam, jăm ƀuah hơdôm bruă mă soh glăi hăng tơlơi phiăn, pơđĭ tui boh tŭ yua amăng bruă jak iâu abih bang mơnuih ƀôn sang gum hrŏm wai pơgang tơlơi rơnuk rơnua dêh čar.