VOV4.Jarai - Mơguah lơ 31/3, hră pơphing ling tơhan pơphun jơnum “pơpŭ gru hiam mơng ling tơhan rơnuk wa Hô”. Amăng mông jơnum, ƀing khua mua lăng yôm tơlơi kiăng pơtrun tơlơi pơsit mrô 847, amăng anun pơsit tong 5 mơta tơlơi ngă gru hơdip hiam mơng ling tơhan rơnuk wa Hô. Tơlơi yôm blung hlâo lĕ “Kĕ phĭ hăng lŏn ia, hăng Ping gah, Kơnuk kơna hăng mơnuih ƀon sang. Tơlơi pơmĭn tui hăng Chủ Nghĩa Mac-Lênin, tơlơi pơmĭn tui Hồ Chí Minh, hăng hơnong pơkă rơngai lŏn ia hăng chủ nghĩa xã hội. Hăng pran gir run kơtang hloh, tuh rơhyu pran jua, găn rơgao tơnap tap, glêh glar, amra ngă tui bruă jao hăng pơgiong truh kih djop mơta bruă jao”.

Mông jơnum

Hơdôm tơlơi pơgôp hiăp lăi pơtong: Gru grua hing ang mơng Ling tơhan, gru hơdip hiam klă mơng “Ling tơhan rơnuk wa Hô” lêng kơ djă pioh, khut khăt pơgăn hơdôm tơlơi ngă soh, hơdôm bruă hưp ƀong kông ngăn, kiăng ba glăi tơlơi tơpă sit amăng anih anom mă bruă, hơmâo Ping gah, Kơnuk kơna, mơnuih ƀon sang đăo gơnang, kiăng khăp.

Siu Đoan: Pơblang