Tui hăng tơlơi hơmâo lăi pơthâo ƀơi mông jơnum, hrŏm hăng pơđĭ kyar bơwih ƀong huă, tơlơi hơdip djŏp mơta mơ̆ng ƀing đah kơmơi 19 boh tơring čar kual Tong Krah - Dap Kơdư hơmâo pơplih rơđah. Tơlơi lăp hơdor rơđah rơđông kơ tơlơi gơgrong bruă mơ̆ng đah kơmơi amăng kual lĕ mrô đah kơmơi ngă khua amăng ping gah, gong gai, đah kơmơi pơ ala mơnuih ƀôn sang dêh čar hăng jơnum min pơ ala mơnuih ƀôn sang lu hloh kơ mơ̆ng hlâo laih.

Bruă ruah mă ƀing đah kơmơi ngă khua pơ ala mơnuih ƀôn sang djŏp gưl ră anai lêng kơ lu tui, lêng kơ mơnuih rơgơi soh mơn, hơmâo lu hlăk ai. Yă Nguyễn Thị Minh Hương, Kơ-iăng khua Khul pơlir hơbit đah kơmơi Việt Nam pơpŭ kơ hơdôm tơlơi hơmâo ba bơkơtuai, tơlơi rơkâo đĭ mơ̆ng ƀing khua, laih anun čang rơmang anai amra jing sa amăng hơdôm phun tơhnal kiăng hơdôm boh tơring ba tơbiă hơdră ngă bruă đah mơ̆ng pơđĭ tui tơlơi gơgrong bruă mơ̆ng ƀing đah kơmơi; ba tơbiă hơdră ngă bruă tong ten či pơphun ngă hơdôm hơdră djru kơ ƀing đah kơmơi tŭ yua hloh.