Thun hrăm 2026-2027, Sang hră đôm lăm kơnuk kơna čem rông gưl dua hăng gưl klâo Pi Năng Tăk, să Bác Ái Đông, tơring čar Khánh Hòa dưi man pơdong hăng ba yua, pơhrua abih gơnam yua pơtô hrăm răm hăng sô laih. Ƀơi anih prong rơhaih 3,8 ha, sang hră hơmâo 18 boh anih hrăm, 60 boh anih dŏ hăng sang pơtô hrăm lu mơta, kiăng dưi ngă djơ̆ bruă hrăm hră, dŏ dong ƀong huă kơ giăm 500 čô čơđai sang hră mơnuih djuai ƀiă amăng kual gah Dơnung tơring čar. Rơnoh prăk tuh pơ alin rơbêh 83,6 klai prăk. Adơi Kiều Năng Bảo Trâm, čơđai sang hră anai, kah pơpha:

“Sang hră ngă giong laih, kâo dưi mut hrăm amăng sang hră phrâo hiam, rơgoh hơdjă hăng hơmâo lu gơnam yua hrăm hră djop djel. Kiăng hơmâo anih dŏ hăng hrăm hră kơ ƀing gơmơi hiam klă hloh”.

Ơi Bùi Quang Quyền, Khua sang hră đôm lăm kơnuk kơna čem rông pioh kơ djuai ania ƀiă gưl dua hăng gưl klâo Pi Năng Tăk, lăi lĕ, bruă tuh pơ alin, ngă gêh găl kơ čơđai sang hră pioh kơ čơđai sang hră djuai ƀiă dưi hrăm hră, dŏ glăi, ƀong huă amăng sang hră, kơnuk kơna čem rông ba, djru ngă plai ƀiă anŏ pleh ploh, tơlơi gêh găl gah bruă pơtô hrăm mơ̆ng djop tơring, kual:

“Anai lĕ bruă ngă tui jơlan hơdră prong mơ̆ng Ping gah, Kơnuk kơna pioh pơđĭ tui boh tŭ yua pơtô hrăm bơkơnar hloh. Ƀu hơmâo tơlơi kah ania pơpha djuai ôh plah wah tơring čư̆ siăng hăng kual lơ̆n dăo giăm hang ia rơsĭ. Anăp nao kiăng ngă bơkơnar amăng bruă pơtô hrăm hăng pơđĭ kyar hloh”.

Kiăng pơđĭ tui boh tŭ yua pơtô hrăm kual čư̆ siăng, kual ataih, hrŏm  hăng bruă pơblih phrâo gơnam yua mă bruă pơtô hrăm, Khánh Hòa dŏ djru ngă pơblih anŏ gêh găl hrăm hră, anih dŏ, ƀong huă kơ čơđai sang hră hăng jơlan hơdră djru prăk hrăm hră, ia tơsâo rơmô, sik, djru ba hơdrôm hră hrăm, hră čih hăng gơnam yua hrăm hră. Tơlơi ƀing čơđai pơdơi hrăm hră, lui sang hră pioh djru amĭ ama mă bruă pơ hmua ƀudah djru bruă pơkŏn amăng sang anŏ, ăt dưi pơblih laih, pơsir tañ mơ̆n.

Khánh Hòa ră anai hơmâo 2,24 klăk čô mơnuih ƀôn sang, amăng anun mơnuih ƀôn sang djuai ƀiă hơmâo 266.000 čô mơnuih. Thun hrăm 2026-2027, đơ đam tơring čar hơmâo 462.000 čô čơđai sang hră hrăm ƀơi 318 boh sang hră. Amăng bơyan pơdơi prong laih rơgao, tơring čar hơmâo tuh pơ alin 1.143 klai prăk pioh ming pơkra glăi sang hră, man pơdong phrâo, anih hrăm hăng blơi gơnam yua pơtô hăng hrăm ƀơi djop sang hră laih anun pơtô hrăm glăi ƀing nai pơtô hrăm hră. Ơi Vũ Ngọc Đương, Khua Gơnong bruă Pơtô hăng Pơjuăt tơring čar Khánh Hòa, brơi thâo:

“Hơdôm mơta gơnam yua mă bruă, ba yua pơtô hrăm ƀơi djop sang  hră amăng tơring čar hơmâo tuh pơ alin djop laih. Mơ̆ng anih hrăm phrâo, blơi gơnam yua mă bruă, pơdong sang pơhrăm lu mơta. Amĭ ama čơđai sang hră ƀuh mơak biă mă, dong yua ngă tui pok pơhai Hră pơtrun 71, pơđĭ tui boh tŭ yua hrăm hră, ngă pơhrŏ ƀiă anŏ pleh ploh bruă pơtô hrăm ƀơi djop tơring, amăng dêh čar, ngă bơkơnar boh tŭ yua pơtô hrăm amăng đơ đam dêh čar”.

Dơ̆ng mơ̆ng bruă jak iâu čơđai sang hră pơwơ̆t glăi hrăm hră, hơmâo nao tơl sang, rim sang anŏ, djru ba gơnam yua hrăm hră truh pơ bruă tuh pơ alin man pơdong anih hrăm, sang hră tơring čar Khánh Hòa hlăk pơjing rai anŏ gêh găl brơi kơ čơđai sang hră kual čư̆ siăng, kual mơnuih ƀôn sang djuai ƀiă hrăm hră hơmâo boh tŭ yua hiam klă hloh.