VOV4.Jarai - Lơ 11/1 phrâo rơgao, ƀơi Hà Nội, Jơnum min djuai ania hmâo pơphun Jơnum klah čun ngă tui tơlơi pơtrun pơsit mrô 45 mơng Khua dêh čar kơ bruă “Pơsit brơi sa dua anăn hră pơhing phrâo, hơdrôm hră pơhing phrâo kơ kual djuai ania ƀiă hăng kual čư̆ siăng, kual tơnap tap” rơwang mơng thun 2019-2021 hăng pok pơhai bruă mă hơdôm thun tô̆ tui. Amăng mông jơnum, ƀing khua pơ ala rơkâo pơ̆ anăp khom kơtưn dong hơdôm jơlan hơdră pôr pơhing djơ̆ tui tơlơi kiăng phrâo kah hăng pơtui jua pơhiăp, djru măi mok kiăng neh wa ngă juăt hăng hơdôm bôh yôm pơplih mrô ƀơi internet.

Tơdơi kơ 3 thun pok pơhai hmâo laih giăm truh 34 klăk hră pơhing mơng 19 mơta hră čih tơlơi pơhing hăng hơdrôm hră pơhing pơsit brơi đôč kơ rim să, plơi pla rơbêh kơ 424 rơbâo čô mơnuih djuai ania ƀiă hăng mơnuih ƀôn sang kual čư̆ siăng, kual asuek ataih mơng 54 bôh tơring čar amăng đơ đam dêh čar.

Hơdôm hră pơhing djru lăi pơhing hơdră pơtrun, hơdră bruă tơlơi phiăn mơng Ping gah hăng Kơnuk kơna lăi hrom hăng bruă djuai ania, hơdră bruă djuai ania lăi ha jăn djru ngă tui jơlan hơdră pơkă mơng lŏn ia pơđĭ kyar bơwih ƀong – mơnuih mơnam kual neh wa djuai ania ƀiă, kual čư̆ siăng mơng thun 2021-2030; pơhrăm brơi dong tơlơi hơdip tâ̆o yâu, pran jua kơ neh wa djuai ania ƀiă, pơđĭ tui tơlơi pơmin bơwih kơ bruă bơwih ƀong huă, tơlơi hơdip mơda mơng mơnuih ƀôn sang; hrom hăng anun pôr, lar hyu dơlăm gru bôh thâo mơng neh wa djop djuai ania.

Amăng mông jơnum, ƀing khua pơ ala gum nao pơhmư̆ mông Jơnum pơsit yôm hơdôm bôh tơhnal ngă tui Tơlơi pơtrun pơsit 45 mơng Khua dêh car rơwang mơng thun 2019-2021 kơ kual neh wa djuai ania ƀiă hăng kual čư̆ siăng. Khua pơ ala kơ Grŭp djuai ania hơdôm bôh tơring čar ăt rơkâo mơn lu jơlan gah pơsir kiăng ngă tui bruă jao klă hloh amăng rơwang mơng 2022-2025 kah hăng kơtưn dong djop djuai pôr pơhing djơ̆ hăng tơlơi pơhing phrâo kah hăng pơtui jua pơhiăp, djru brơi măi mok kiăng neh wa ngă juăt hăng hơdôm bôh yôm pơplih mrô ƀơi glông internet. Ơi Lê Ngọc Vinh – Kơ-iăng Khua Grŭp djuai ania tơring čar Daklak rơkâo:

“Tuh pơplai kiăng pơdŏng, măi mok ha amăng plĕ hơdôm anih pôr jua pơhiăp, pơdah rŭp să. Anai lĕ glông pôr pơhing yôm phăn, sit nik hăng ba glăi bôh tơhnal hloh amăng bruă pôr pơhing tơlơi pơtrun, jơlan gah mơng Ping gah, hơdră bruă tơlơi phiăn mơng Kơnuk kơna, tơlơi kơđi čar phrâo hăng lăi pơthâo bôh thâo hơdip mơda găn rơgao bơwih ƀong huă, djă pioh ngă tui bôh thâo, gru grua djuai ania”.

Đơ đam anih jơnum

Ƀing khua pơ ala ăt hmâo ba tơbiă mơn lu jơlan gah kiăng ngă klă bruă jao amăng rơwang mơng 2022-2025 kah hăng: Pơđĭ bruă mă mơng Grŭp apăn bruă djuai ania hơdôm bôh tơring čar, ƀôn prong; pơplih phrâo hơdră lăi pơthâo tơlơi pơhing (kơtưn dong hră pơhing rŭp, mrô bôh yôm amăng glông pơhing mơnuih mơnam, tuh pơplai ha amăng plĕ glông pôr pơhing pơtui jua pơhiăp, djru măi mok djă hyu...); pơsur mơnuih ƀôn sang hmâo tơlơi juăt lăng hră pơhing; hmao tlôn pơplih pơkra hăng pok prong truh lu mơnuih čơkă mă hơdră bruă; pơđĭ tui anô̆ kơjăp, kơtưn dong bôh yôm, akô̆ bruă kah hăng lăi pơblang glăi tơlơi phiăn, gru grua bôh thâo; pơdŏng glông pioh tô nao rai, lăi pơthâo, bơkơtuai nao rai tơlơi pơhing...

Pơhiăp amăng mông klah čun jơnum, Khua ding jum Jơnum min djuai ania Hầu A Lềnh pơsit: Hơdră pơtrun djru brơi sa dua hră pơhing, hơdrôm hră pơhing ƀu pơhrui prăk kơ kual neh wa djuai ania ƀiă hăng kual čư̆ siăng lĕ hơdră pơtrun, hơdră bruă djơ̆ mơng Ping gah hăng kơnuk kơna. Pơ̆ anăp anai amra pha brơi dong hơdôm hră pơhing, hơdrôm hră pơhing hăng hơdôm mơta hră pơhing phrâo pơkon kơ kual neh wa djuai ania ƀiă hăng kual čư̆ siăng. Yua kơ hơdôm djuai pơdah rŭp anai ƀu djơ̆ kơnong kơ djru kơtưn thâo, pơplih bruă mă, phiăn juăt bơwih ƀong huă ôh mơ̆ ñu dô̆ jing glông pôr pơhing lăi nao bôh nik kiăng gru than pơplih pơkra, pơhrua nao, pơplih pơhlôm hĭ hơdră bruă hăng neh wa djuai ania ƀiă. Ơi Hầu A Lềnh lăi rơđah:

“Rơgao kơ 3 thun ngă tui hăng pran pơsit mơng ƀing ta rơwang 5 thun mơng ră anai truh thun 2025, hmâo laih hơdră pơtrun, ƀing ta hmâo klah čun, pơsit glăi laih, pơ̆ anăp anai hmâo jơlan gah pơsit kiăng ngă tui laih, tơlơi lĕ ƀing ta ngă hiưm hơpă đôč. Kiăng ngă hiưm hơpă abih bang hơdôm bôh ƀirô pôr pơhing, hơdôm bôh ƀirô pơphô bruă mơng hơdôm ding jum gơnong bruă gum hrom pơphô brơi kơ hơdôm ding jum gơnong bruă gum hrom hăng Jơnum min djuai ania ngă tui klă hloh”.

Khua ding jum Jơnum min apăn bruă djuai ania Hầu A Lềnh đĭ pơhiăp amăng mông jơnum

Kiăng hơdôm tơlơi pơhing, hơdră pơtrun, hơdră bruă... dưi pôr hyu klă hloh truh hăng neh wa djuai ania ƀiă hăng kual čư̆ siăng, tui hăng Khua Jơnum min apăn bruă djuai ania ơi Hầu A Lềnh, kiăng pơđĭ glông anô̆ kơjăp, pơplih hơdră, bôh yôm mơng hơdôm hră pơhing tui jơlan gah djơ̆, pơkĕ hrom sit nik hăng bôh nik kiăng tơlơi pơhing mơng neh wa djop djuai ania.

Amăng jơlan gah pơđĭ kyar hrom, ƀơi lu anih anom mơng djop djuai pôr pơhing tui lu măi mok pha ra, hră pơhing ăt jing anô̆ gal hloh hăng neh wa djuai ania ƀiă, yua anun, kiăng ngă tui abih anô̆ gal mơng hră pơhing lom pôr pơhing truh mơnuih ƀôn sang. Hrom hăng anun, Khua Jơnum min apăn bruă djuai ania ăt rơkâo mơn hơdôm ding jum, gơnong bruă, plơi pla bơdjơ̆ nao kiăng gum hrom klă pioh ngă tui hơdră pơtrun, djru pơđĭ tui hloh dong bôh tơhnal ngă tui Tơlơi pơsit 45 mơng Khua dêh čar lơ 9/1/2019./.

            VOV: Čih – Siu H’ Prăk: Pơblang