Amăng hră lăi pơthâo mơ̆ng Kơnuk kơna mơ-it kơ Jơnum min apăn bruă phun pơ ala mơnuih ƀôn sang dêh čar sem glăi 2 mơta bruă boh yôm phun: Pơpha prăk akŏ bruă tuh pơ alin mơ̆ng thun 2021-2025 lĕ 22.551 klai, rơnoh prăk pơhlôm hrŏm kơ Akŏ bruă tuh pơ alin sui thun man ƀrô mơ̆ng ngăn drăp dêh čar pơhrui glăi thun 2022 brơi kơ 11 kơčăo bruă; pơpha akŏ bruă tuh pơ alin bruă čar thun 2024 lĕ 2.100 klai mơ̆ng rơnoh prăk kơnuk kơna pơhrui glăi thun 2022. Khua git gai pơ ala mơnuih ƀôn sang dêh čar ơi Trần Thanh Mẫn lăi lĕ, truh mông anai, ăt dŏ lu kơčăo bruă, ring bruă ngă tui kaih, ƀơi anŏ hơmâo ring bruă aka ƀu tuh pơ alin prăk yua mơtam.

Yua kơ anun, Khua git gai pơ ala mơnuih ƀôn sang dêh čar ta rơkâo, Kơnuk kơna git gai pơčrâo bruă djop ding jum, anom bruă jŭ yap glăi tong ten, ngă rơđah yua mơ̆ng pơpă, hơgĕt gun, kiang pơtrut ngă bruă tañ giong hră pơar tuh pơ alin hăng rơnoh prăk hơmâo pơpha brơi laih. Khua git gai pơ ala mơnuih ƀôn sang dêh čar ăt pơtă pơtăn, bruă mă wai lăng, yua prăk tuh pơ alin kiăng pơkrem, yua djơ̆ hơdră, tŭ yua, hơmâo boh tơhnal hiam, ƀu lui kơ hơdră bruă, ring bruă pơpă ngă rơngiă hĭ huač hue prăk kăk soh sel, kiăng tơlơi đăo kơnang amăng ping gah, mơnuih ƀôn sang tong ten hloh; hrŏm hăng anun kiăng sem lăng kjăp djop kơčăo bruă, ring bruă yua anom bruă khua pơ ala mơnuih ƀôn sang dêh čar pơsit laih.