VOV4.Jarai - Mơguah lơ 1/8, pơphun Jơnum pơtrut man pơdong sang dŏ djru brơi ƀing kông nhơn, mơnuih prăk pơhrui aset. Đĭ pơhiăp amăng mông jơnum, Khua dêh čar ơi Phạm Minh Chính brơi thâo: sa amăng hơdôm tơlơi  đing nao hloh mơng Ping gah, Kơnuk kơna, anun lĕ bơwih brơi tơlơi hơdip kơ ƀing kông nhơn, mơnuih prăk pơhrui aset hăng hơmâo lu jơlan hơdră kiăng kơ djru brơi ƀing pô anai, amăng anun hơmâo djru brơi sang dŏ kơ mơnuih ƀon sang.

Khua dêh čar ơi Phạm Minh Chính đĭ pơhiăp amăng mông jơnum

Tui hăng Ding jum man pơdong, hơnong pơkă pơ anăp anai, anun lĕ pơtrut man pơdong sang dŏ djru brơi ƀing kông nhơn, ƀing mơnuih hơmâo prăk pơhrui gap ƀrô hăng aset. Tui anun, truh thun 2025 amra pơgiong hơdôm akŏ bruă pok pơhai man pơdong 156.700 boh sang hăng hơdôm akŏ bruă glăk ngă hră pơ-ar tuh pơ alin hăng 300.000 boh sang; tŏ tui pok pơhai ngă tui hơdôm akŏ bruă phrâo; truh thun 2030 pơgiong tuh pơ alin man pơdong 1 klăk boh sang djru brơi ƀing kông kơng ƀơi hơdôm anih tuh tia pơkra pơjing.

Siu Đoan: Pơblang