VOV4.Jarai - Phrâo tôm adih anai, Khua git gai Ping gah hăng Kơnuk kơna hmâo laih hơdôm bruă bưp ƀô̆ mơta Khua pơ ala mơnuih ƀôn sang lĕ djuai ania ƀiă tal 15. Pơhiăp amăng mông bưp ƀô̆ mơta, Khua git gai wai lăng pơ ala mơnuih ƀôn sang dêh čar ta ơi Vương Đình Huệ pơdah pran jua čang rơmang hăng đăo gơnang lĕ, rim khua pơ ala mơnuih ƀôn sang djuai ania ƀiă ƀu pơdơi gir run kiăng ngă giong klă hloh bruă mă mơng pô, hrưn đĭ na nao, djơ̆ hăng pran đăo gơnang kiăng khăp, čang rơmang mơng mơnuih ƀôn sang đơ đam dêh čar, biă ñu lĕ neh wa, mơnuih ƀôn sang kual neh wa djuai ania ƀiă hăng kual čư̆ siăng.

Khua git gai wai lăng pơ ala mơnuih ƀôn sang dêh čar ta ơi Vương Đình Huệ lăi rơđah, Ping gah hăng Kơnuk kơna pơsit ha sa pran jua gum hrom hơbit djop djuai ania hmâo bôh tŭ yua yôm phăn hăng lŏn ia ta, sa lŏn ia pơlir hơbit mơng 54 djuai ania adơi ayong hơdip hrom, gum hrom pơdŏng lŏn ia hăng wai lăng lŏn ia amăng hơdôm gru grua mơng djuai ania hăng pơdŏng hơdră bruă gum hrom hơbit djuai ania, hluai tui tơlơi dưm kơnar, gum hrom hơbit, pơpŭ hăng djru nao rai tơdruă pơđĭ kyar. Hơdôm hơdră bruă bơdjơ̆ nao neh wa djuai ania ƀiă, dưi pơsit amăng abih bang hơdôm hră Pơkôl tơlơi phiăn mơng Dêh čar Việt Nam djop mơnuih dưm kơnar. Hơdôm thun rơgao, hmâo lu hơdră pơtrun, hơdră bruă pơđĭ kyar bơwih ƀong – mơnuih mơnam hăng kual djuai ania ƀiă hăng kual čư̆ siăng, tơlơi hơdip mơda gơnam tam, pran jua mơng neh wa djuai ania ƀiă amăng ƀrư̆ dưi pơplih ƀô̆ mơta kual djuai ania ƀiă hăng kual čư̆ siăng.

Khă hnun hai, yua kơ lom pơphun ƀu prong, anih anom bơwih ƀong huă tơnap tap, ataih mơng kual krah, ayuh hyiăng ƀu klă hiam, khom gơgrong ba lu tơlơi ƀu klă mơng ayuh hyiăng pơplih, anom mă yua dô̆ kơƀah. Anun ră anai, kual djuai ania ƀiă hăng kual čư̆ siăng ăt jing anih anom kaih đĭ kyar hloh, rơnoh pơhrui glăi hơnong ñu mơng mơnuih djuai ania ƀiă ƀiă hloh bơhmu hăng hơnong pơkă hrom đơ đam dêh čar amra hmâo tơlơi hleh hloh jai hrơi jai prong tui.

Hăng pran jua hơdôm tơlơi pơtrun pơsit mơng Kơnuk kơna, lơ 18/11/2019 Khua pơ ala mơnuih ƀôn sang hmâo mă yua laih Tơlơi pơtrun pơsit mrô 88 pơsit Akô̆ bruă abih bang pơđĭ kyar bơwih ƀong – mơnuih mơnam kual neh wa djuai ania ƀiă hăng kual čư̆ siăng rơwang mơng thun 2021-2030, črâo rơđah jơlan gah pơsit: “Hơdôm hơdră bruă pơđĭ kyar bơwih ƀong – mơnuih mơnam, pơgang lŏn ia, rơnuk rơnua kual djuai ania ƀiă hăng kual čư̆ siăng khom pơhlôm akô̆ tlôn, anăp nao truh tơhnal pơđĭ kyar kơjăp hăng ngă tui anô̆ gal, tơhnal gal mơng kual hăng pran jua gơgrong pô mơng neh wa djuai ania ƀiă” hrom hăng hơdôm tơhnal pơkă rơđah hăng čang rơmang hăng pran pơsit bruă kơđi čar prong biă.

Anih anom mông bưp ƀô̆ mơta

Kiăng dưi hmâo hơdôm tơhnal pơkă hăng hmâo kiăng ječ ră anai, Khua git gai wai lăng pơ ala mơnuih ƀôn sang dêh čar ta ơi Vương Đình Huệ rơkâo ƀing khua pơ ala mơnuih ƀôn sang lăi hrom, biă ñu Khul apăn bruă djuai ania hăng ƀing khua pơ ala lĕ djuai ania ƀiă tal 15 khă gơgrong ƀudah apăn bruă ƀơi hơdôm grŭp khom đing nao, djru hrom hăng Khua pơ ala mơnuih ƀôn sang đing nao lăng tui, kiăng ƀirô hmâo tơlơi dưi bơdjơ̆ nao ngă tui ba glăi bôh tơhnal sa dua bruă mă phun:

“Gơgrong hlâo, klă hăng tañ hloh dong amăng bruă prăp lui pơdŏng kơčăo bruă lăng tui, kiăng ƀirô hmâo tơlơi dưi pơphun ngă tui djơ̆ tui pran jua pơtrun pơsit mơng Khua pơ ala mơnuih ƀôn sang, ngă tui klă dong pran jua gơgrong pô hrưn đĭ, gum nao rai tơdruă kơplah wah djop djuai ania, kơplah wah hơdôm anih anom, tơlơi gum hrom klă, ba glăi bôh tơhnal mơng hơdôm bôh anom bơwih ƀong hăng neh wa djuai ania ƀiă, kơtưn pran gum hrom hơbit abih bang djuai ania. Khua pơ ala mơnuih ƀôn sang djuai ania ƀiă khom pơđĭ dlông hloh dong tơlơi pơmin gah bruă djuai ania pioh kơ mơnuih apăn bruă, gưl ping gah, gong gai, jơnum min djop djuai ania, abih bang khul grŭp hơdôm gưl amăng glông bruă kơđi čar, ngă tui klă hơdră bruă dưm kơnar, gum hrom hơbit, pơpŭ djru nao rai tơdruă gum hrom pơđĭ kyar; lăng yôm tơlơi kơđiăng hăng pơgăn hơdôm tơlơi pơmin ƀu klă, ngă sat yua tŭ tơlơi djuai ania, ngă pơklah amăng khul gum hrom hơbit abih bang djuai ania; hơkrŭ đĭ tơlơi pơmin tơnĭt drơi pô, lăng pô ƀu hmao kiăo tui arăng”.

Khua git gai wai lăng pơ ala mơnuih ƀôn sang dêh čar ta ơi Vương Đình Huệ pơhiăp amăng mông bưp ƀô̆ mơta

Khua git gai wai lăng pơ ala mơnuih ƀôn sang dêh čar ta ơi Vương Đình Huệ čang rơmang ƀing khua pơ ala mơnuih ƀôn sang lĕ djuai ania ƀiă kơsem min klă, ba tơbiă hăng pơplih tơlơi pơmin, tơlơi pơtrun, jơlan gah hơdră bruă djuai ania mơng Ping gah hăng Kơnuk kơna ta jing hơdôm jơlan hơdră, tơhnal pơkă, bruă mă rơđah; đing nao hơdră pơkă, hơdră bruă pơhlôm ngă tui ba glăi bôh tơhnal hơdôm hơdră pơtrun, hơdră bruă mơng Kơnuk kơna ƀơi kual čư̆ siăng, guai lŏn ia, kual neh wa djuai ania ƀiă; đing nao pơdŏng kual djuai ania ƀiă hăng kual čư̆ siăng pơđĭ kyar tañ gah bơwih ƀong, bôh thâo, mơnuih mơnam, kơjăp kơtang gah rơnuk rơnua, pơgang lŏn ia, mut hrom hăng tơlơi pơđĭ kyar hrom mơng đơ đam lŏn ia, lăp djơ̆ hăng anih anom gơgrong yôm phăn mơng lŏn ia.

Khua git gai wai lăng pơ ala mơnuih ƀôn sang dêh čar ta rơkâo ƀing khua pơ ala mơnuih ƀôn sang lĕ djuai ania ƀiă đing nao pơphô pơdŏng, pơplih pơkra, pơhrua nao dong hơdôm hơdră bruă tơlơi phiăn djơ̆ hăng bôh nik hăng tơlơi rơkâo kơtưn đĭ tuh pơplai, đing nao pơđĭ kyar kual neh wa djuai ania ƀiă hăng kual čư̆ siăng; guai lŏn ia; biă ñu đing nao hơdră bruă pơđĭ kyar bơwih ƀong huă, pơđĭ tui tơlơi hơdip mơda, pơđĭ kyar bruă pơtô pơhrăm, bruă ia jrao, pơđĭ tui bôh thâo kơ mơnuih ƀôn sang, anô̆ kơjăp bruă mă, pơđĭ tui bôh thâo mă bruă kơ mơnuih apăn bruă, mơnuih djuai ania ƀiă apăn bruă; hơdră bruă djru pơtô bruă mă, pơsir bruă mă, pơhlôm hơđong tơlơi hơdip mơnuih mơnam, pơđĭ kyar kơjăp; pơkĕ pơđĭ kyar bơwih ƀong – mơnuih mơnam hăng pơgang anih anom dô̆; pơđĭ kyar bơwih ƀong – mơnuih mơnam hăng pơhlôm rơnuk rơnua plơi pla – lŏn ia; pơdŏng plơi pla phrâo; pơjing rai phun than kơ bruă pơplih phrâo măi mok, pơplih phrâo tui rơnuk anai; wai lăng hăng ngă tui gru grua bôh thâo klă hiam amăng plơi pla djop djuai ania Việt Nam./.

VOV1: Čih – Siu H’ Prăk: Pơblang