Pơhiăp ƀơi mông bưp, Khua git gai pơ ala mơnuih ƀôn sang dêh čar ơi Vương Đình Huệ lăng yôm anom bruă ping gah ƀôn prong HCM hơmâo akŏ pơjing Khul pơtruh nao rai tơlơi pơhing hăng ƀing mơnă yua bruă kơđi čar đưm laih anun ƀing ayăt mă krư̆ ƀơi ƀôn prong HCM, Khul anai kiăng biă mă kơ ƀing ding kơna dưi bưp nao rai, jing sa bruă mă djru kơ Ping gah, kơnuk kơna lăng ba ƀing mơnă ayăt mă krư̆ đưm adih yua bruă kơđi čar. Anai lĕ hơdră kiăng pơtum glăi, pơtô hrăm ƀing ană tơčô tơdơi thâo hluh tơlơi yôm gru grua bruă hơkrŭ, pioh kơ tơring čar pơkŏn hrăm tui.

Khul pơtruh brơi tơlơi pơhing hơmâo čih anăn pơtum glăi ƀing mơnă, ayăt mă krư̆ yua bruă kơđi čar hăng ƀing mơnă ayăt mă krư̆ dua rơnuk blah ayăt sua lŏn ia kiăng pơphun brơi bưp glăi, ba hyu čuă jơmư anih anom gru grua hơkrŭ; laih dơ̆ng Khul pơtruh nao rai pơƀut glăi bruă mă gru phun dêh čar, jing ƀing ba gru hlâo amăng ƀing ngă bruă kơđi čar, ƀing mơnă ayăt mă krư̆ yua bruă hơkrŭ.Thun blan rơgao, gah yŭ kơ tơlơi git gai mơ̆ng Gơnong dlông ping gah ăt hơmâo pơtum glăi, pơsir hĭ lu hră pơar dŏ gun. Ƀrô djơ̆ tal anai, Khua git gai pơ ala mơnuih ƀôn sang dêh čar lăng yôm tơlơi gir run pơsir rơbêh 1000 pok hră čih anăn mơnuih hơmâo djru kơ bruă hơkrŭ lŏn ia aka ƀu pơsir mơ̆ng Khul pơtruh brơi tơlơi pơhing.