Khua mua pơ ala mơnuih ƀôn sang dêh čar tal XV hơmâo 499 čô pô pơ ala. Amăng anun 89 čô pơ ala mơnuih ƀôn sang dêh čar jing mơnuih djuai ƀiă, hơmâo 5 čô khua pơtô đăo; 119 čô mơnuih ngă nai pơtô hrăm hră hăng ƀing tom ngă nai pơtô. Đĭ pơhiăp ƀơi mông bưp, Khua git gai pơ ala mơnuih ƀôn sang dêh čar ơi Vương Đình Huệ lăi lĕ, tal bưp anai sa bruă mă yôm biă, pơdah rai tơlơi khăp gum pơgôp kơplah wah djop djuai ania, kơnôl kơ tơlơi tŭ ư sa pran jua hăng bruă mă, tơlơi thâo hluh glăm ba mơ̆ng anom bruă pơ ala mơnuih ƀôn sang dêh čar.

Khua git gai pơ ala mơnuih ƀôn sang dêh čar rơkâo, ƀing khua mua pơ ala jing mơnuih djuai ƀiă, mơnuih thâo hră, mơnuih rơgơi kơhnâo, ƀing khua pơtô đăo hăng ƀing ngă nai pơtô hrăm hră hur har hloh amăng bruă ngă hrom čih pơkra, ngă pơgiong glông bruă tơlơi phiăn dêh čar ăt kah hăng rơkâo đĭ, krăo lăng  bruă ngă tui tơlơi phiăn amăng kual mơnuih djuai ƀiă, tơlơi đăo, pơđĭ kyar bruă pơtô hăng pơjuăt, boh thâo ia rơgơi kiăng man pơdong kual plơi pla mơnuih djuai ƀiă dŏ hăng čư̆ siăng pơđĭ kyar.