Đĭ pơhiăp amăng mông bưp, Khua git gai pơ ala mơnuih ƀôn sang dêh čar ơi Trần Thanh Mẫn lăng yôm tơlơi git gai ƀơi anăp mơng kơ-iăng khua mir sir hơđăp yă Trương Mỹ Hoa, keh prăk djru hrăm hră Vừ A Dính hơmâo lu bruă mă, pơčeh phrâo, tŭ yua. Lu akŏ bruă yôm phăn hơmâo keh prăk ngă tui hăng glăk ngă anun lĕ: Akŏ bruă “Čem rông ba” hơmâo rông rơbêh 600 čô čơđai mơng hơdôm kual giăm guai, bul pơtâo glăi hrăm ƀơi anih čem rông ba; akŏ bruă “Pok jơlan anăp nao pơgi kơdih” brơi 100 čô čơđai djuai ania ƀiă, čư̆ siăng hăng bul pơtâo tơnap tap hloh….hơmâo lu tơlơi kơđŏm glăi, ngă lar hyu pran djru tơdruă, pơgôp yôm phăn amăng bruă pơjing mơnuih apăn bruă kual mơnuih djuai ania ƀiă, kual čư̆ siăng hăng bul pơtâo.

Khua git gai pơ ala mơnuih ƀôn sang dêh čar lăng yôm hăng bruă mơng thun 2009 keh prăk hơmâo jao pri Vừ A Dính kiăng kơ pơpŭ ƀing mơnuih, khul grup hơmâo tơlơi dưi amăng bruă: Pơtô hrăm; kơsem min boh thâo ia rơgơi, gru grua adôh suang; bơrơguăt drơi jăn, ling tơhan, wai pơgang rơnuk rơnua; bruă mă amăng mơnuih mơnam…ba glăi tơlơi dưi sit nik brơi kơ mơnuih djuai ania ƀiă kual čư̆ siăng hăng bul pơtâo. Amăng 15 thun rơgao, Bruă jao pri ƀu pơdơi pơđĭ kyar, pok prong; mơng 15 čô mơnuih rơgơi, ba gru hăng 5 khul grup pơ-ư ang čơkă mă pri tal blung a, truh ră anai hơmâo 118 khul grup hăng 210 čô mơnuih rai mơng 44 djuai ania, amăng anun hơmâo hơdôm djuai ania ƀiă hơmâo mă pri.

Khua git gai pơ ala mơnuih ƀôn sang dêh čar lăng yôm ƀing pơ ala  lĕ ƀing čơđai sang hră, ƀing hlăk ai, ƀing apăn bruă amăng Khul hlăk ai, ƀing nai pơtô dŏ hlăk ai hơmâo gir run hrăm hră, pơhrăm pô, mă bruă, pơčeh phrâo, hơmâo lu tơlơi truh kih, hơmâo mă pri, miđai gưl dêh čar; jar kmar; hơmâo lu tơlơi găn rơgao, pơčeh phrâo, pơgôp lu amăng boh thâo phrâo, pơkra rai lu gơnam hơmâo nua sit nik, dưi mă yua amăng tơlơi hơdip mơda hăng pơđĭ kyar bơwih ƀong huă, mơnuih mơnam, pơhlôm pơgang rơnuk rơnua, hơđong amăng mơnuih mơnam.

Khua git gai pơ ala mơnuih ƀôn sang dêh čar ăt tŭ yap, pơpŭ hơdôm boh than mơ̆ keh prăk djru hrăm hră Vừ A Dính dưi ngă amăng 25 thun rơgao; pơpŭ bơni hơdôm anih anom gum djru, ƀing čơmah, hrŏm hăng bruă bơwih ƀong sĭ mơdrô hơmâo ba glăi tơlơi yôm phăn, hiam klă, pơgôp pran mă bruă, kông ngăn amăng bruă pơđĭ kyar kual djuai ania ƀiă, kual čư̆ siăng hăng bul pơtâo hluai tui keh prăk amăng hơdôm thun rơgao.

Khua git gai pơ ala mơnuih ƀôn sang dêh čar čang rơmang, ƀing čơđai sang hră, ƀing nai pơtô dŏ hlăk ai ngă tui klă tơlơi pơtă mơng Khua mir sir Hồ Chí Minh amăng hră mơ-it ƀing čơđai sang hră ƀrô hrơi mut sang hră, wa pơtă tui anai “Lŏn ia Việt Nam dưi him klă hă ƀŭ, djuai ania Việt Nam dưi yak nao prong kơtang kiăng bơkơnar hăng hơdôm dêh čar amăng rŏng lŏn tơnah hă ƀŭ, ăt yua ha bơnah mơng tơlơi gir run mơng ƀing čơđai sang hră”. Khua git gai pơ ala mơnuih ƀôn sang dêh čar ơi Trần Thanh Mẫn rơkâo:

“Hơdôm khul grup, ƀing mơnuih hơmâo mă pri kiăng ngă tui hơdôm boh than dưi ngă, tŏ tui gir run pơgôp pran, tơlơi thâo thăi amăng pơjing plơi pla, lŏn ia jai hrơi hiam klă. Ƀrô tal anai, kâo rơkâo Khul hlăk ai gơnong glông tŏ tui đing nao git gai, ngă gêh gal kiăng keh prăk djru hrăm hră Vừ A Dính lar hyu kơtang pran gum pơgôp, pơlăi nao rai, djru tơdruă; hmao tlôn gum djru, pơ alum, pơgôp pơđĭ kyar, ngă tui tơlơi dưi, tơlơi gal mơng djuai ania ƀiă, kual čư̆ siăng hăng bul pơtâo, pơgôp pơjing mơnuih mă bruă hlăk ai rơgơi djơ̆ hăng tơlơi kiăng amăng rơnuk tuh tia pơkra ming, pơplih phrâo lŏn ia”.

Khua git gai pơ ala mơnuih ƀôn sang dêh čar brơi thâo, Ping gah, kơnuk kơna glăk đing nao tuh pơ alin lu ƀiă dong brơi kơ kual mơnuih djuai ania ƀiă. Khua pơ ala mơnuih ƀôn sang dêh čar hơmâo ba tơbiă hơdôm tơlơi pơtrun kơ 3 jơlan hơdră tui hơnong pơkă dêh čar anun lĕ man pơdong plơi pla phrâo; pơđĭ kyar bơwih ƀong huă-mơnuih mơnam kual mơnuih djuai ania ƀiă hăng čư̆ siăng; pơhrŏ trun ƀun rin hơđong kjăp. Ră anai, kơnuk kơna glăk gir run ngă tui hơdôm jơlan hơdră anai.