VOV4.Jarai - Mut sang hră laih. Bruă ngă tui hơdră djru brơi ƀing čơđai mơnuih djuai ania ƀiă lêng kơ hơmâo Khua pơ ala mơnuih ƀon sang dêh čar đing nao. Phrâo anai, Khua git gai pơ ala mơnuih ƀon sang dêh čar ơi Vương Đình Huệ hơmâo nao lăng mông ngă lơphet pok pơtô hrăm sang hră gưl tlâo Kỳ Sơn, Nghệ An hăng pơphun mut sang hră thun hrăm 2022-2023. Khua git gai pơ ala mơnuih ƀon sang dêh čar lăi pơtong, čem rông, pơtô hrăm klă hloh brơi ƀing čơđai lĕ bruă yôm hloh, anai lĕ tơlơi akŏ phun kiăng anăp nao pơgi kơdih, dưi hrưn đĭ pơklaih mơng ƀun rin, kiăng tơlơi hơdip trơi pơđao, ngă pô, yâo mơ-ak.

Kỳ Sơn lĕ tơring glông giăm guai, kual ataih, asuek, lu mơnuih djuai ania ƀiă dŏ hơdip, jing 1 amăng 74 boh tơring glông tơnap tap hloh amăng đơ đam dêh čar. Sang hră gưl tlâo Kỳ Sơn hơmâo akŏ pơdong mơng thun 1967, tơring glông Kỳ Sơn kơnong hơmâo sa boh sang hră gưl tlâo đôč. Lơ̆m nao sang hră ƀing čơđai găn nao rưng kưng, ia krông čroh hnoh hŭi rơhyưt biă mă, sit biă ñu lĕ amăng bơyan hơjan hlim ngă ia kor, lŏn tơhlŏm.

Hlâo kơ man pơdong sang hră phrâo, prăng rang, kơƀang grê ram rai abih yơh, ƀu hơmâo sang dŏ glăi brơi kơ ƀing čơđai hăng nai pơtô mơng ataih, ƀing čơđai ĕp mă anih ƀong huă, pơdơi pran lơ̆m nao sang hră. Sang hră gưl tlâo Kỳ Sơn phrâo man pơdong prong rơhaih, tui hơnong pơkă gưl dêh čar dưi pơtô brơi 2.000 čô čơđai hăng abih tih 245 anih pơtô.

Khua git gai pơ ala mơnuih ƀon sang dêh čar ơi Vương Đình Huệ nao pơhmư̆ mông pơphun mut sang hră ƀơi Nghệ An

Đĭ pơhiăp amăng mông ngă lơphet, Khua git gai pơ ala mơnuih ƀon sang dêh čar ơi Vương Đình Huệ pơsit tong glăi tơlơi pơtă mơng Khua mir sir Hồ Chí Minh kơ bruă pơtô pơjuăt, laih dong lăi pơtong, Ping gah hăng Kơnuk kơna lêng kơ lăng yôm bruă pơtô pơjuăt, lăng anai lĕ hơdră bruă phun amăng lŏn ia; lêng kơ hơmâo tơlơi hiam klă hloh brơi kơ bruă pơtô hrăm, pơhlôm brơi abih bang čơđai, mah kual dơnung ƀudah kual čư̆ siăng triang pơtâo, giăm guai, bul pơtâo, hlơi hlơi lêng kơ dưi hrăm hră, lêng kơ bơkơnar amăng bruă pơtô hrăm.

“Pơđĭ kyar bruă pơtô hrăm, pơhlôm bơkơnar amăng bruă pơtô hrăm, anăm  brơi hlơi ôh dŏ glăi gah tlôn, sit biă ñu lĕ kual mơnuih djuai ania ƀiă, kual čư̆ siăng triang pơtâo, mơnuih djuai ania ƀiă ăt kiăng đing nao gum djru kiăng plai ƀiă tơnap tap, ƀrư̆ hrơi kiăng bơkơnar hăng kual dơnung, anai lĕ tơlơi git gai prong hloh hăng na nao mơng Ping gah, Kơnuk kơna ta. Khul apăn bruă Ping gah hơmâo ba tơbiă tơlơi pơtrun mrô 29 amăng pơplih akŏ phun, djop mơta amăng pơtô hrăm. Khua pơ ala mơnuih ƀon sang dêh čar hơmâo đing nao tŭ mă hơdôm tơlơi pơgôp hiăp mơng Ping gah, pơgiong hăng ba tơbiă lu hơdră bruă, tơlơi phiăn kiăng pơđĭ kyar bruă pơtô hrăm. sit biă ñu lĕ tơlơi pơtrun mrô 88 amăng pơplih jơlan hơdră, hơdrôm hră pơtô hrăm phrâo. Đing nao pơtô hrăm brơi klă hloh kơ ƀing čơđai lĕ bruă akŏ phun, anai lĕ tơlơi yôm kiăng kơ anăp nao pơgi kơdih, djru pơklaih mơng ƀun rin, kiăng tơlơi hơdip trơi pơđao, ngă pô, yâo mơ-ak.

Yua anun, Khua git gai pơ ala mơnuih ƀon sang dêh čar ơi Vương Đình Huệ pơdah pran čang rơmang, ƀing nai pơtô amra jing mơnuih ba gru amăng tơlơi hơdip mơda, pran gir kơtir, gơgrong amăng bruă mă, abih pran jua khăp pap, pơtô hrăm brơi ƀing čơđai; ƀu djơ̆ kơnong pơtô hrăm đôč ôh mơ̆ ăt jing ƀing mơnuih pơtrut pơsur kiăng ƀing čơđai gir hrăm hră, rơgơi amăng hơdôm boh thâo thâo phrâo.

Khua git gai pơ ala mơnuih ƀon sang dêh čar ơi Vương Đình Huệ pơdah tơlơi čang rơmang hăng đăo gơnang ƀing čơđai amra ngă tui gru grua gir hrăm hră, hrăm rơgơi mơng mơnuih ƀon sang Nghệ An, gir run hrăm hră, hơdip tơpă sit; bruă hrăm blung hlâo brơi kơ ta pô, kiăng kơ thâo hluh, thâo mă bruă, thâo hơdip hrŏm, kiăng pơdah tơlơi thâo thăi ta pô; hrăm kiăng kơ prap lui tơlơi thâo thăo truh pơgi kơdih anai thâo pơphun bruă mă, pơgôp prong prin amăng pơjing plơi pla, lŏn ia. Khua git gai pơ ala mơnuih ƀon sang dêh čar rơkâo gưl Ping gah, Gong gai hăng gơnong bruă pơtô pơjuăt đing nao git gai pơjing gru grua pơtô hrăm amăng rĭm boh sang hră, kiăng rĭm boh sang hră jing anih pơtô hrăm klă hloh, gru grua yôm phara mơng plơi pla, djuai ania hơmâo pơtô kiăng djă pioh, mơng anun pơđŏm glăi amăng pran jua, akŏ dlô kơ rĭm čô čơđai, wŏt sang hră.

Khua pơ ala mơnuih ƀon sang dêh čar ơi Vương Đình Huệ atông hơgor pơphun mut sang hră

Sang hră gưl tlâo Kỳ Sơn jing anih pơtô hrăm ba kru amăng tơring čar kiăng pơjing gru grua hrăm hră pơlir hăng bruă pơplih phrâo, hrưn đĭ klă dong amăng pơtô hrăm. Laih dong, đing nao pơjing hăng pok pơhai lông lăng hơdôm boh sang hră gưl tlâo pơtô brơi čơđai dŏ glăi yang hrơi dong tui kru phrâo pơlir hăng bruă pơjing gru grua hrăm hră pơplih phrâo ƀơi kual čư̆ siăng triang pơtâo Kỳ Sơn.

Khua git gai pơ ala mơnuih ƀon sang dêh čar brơi thâo, thun hrăm 2022-2023 lĕ thun hrăm blung a ngă tui tơlơi pơtrun mrô 88 amăng pơplih jơlan hơdră pơtô hrăm, pơplih hơdrôm hră, bruă pơtô hăng pơplông tui Jơlan hơdră pơtô hrăm phrâo thun 2018 hăng anih 10. Jơnum min apăn bruă Khua pơ ala mơnuih ƀon sang dêh čar amra pơphun krăo lăng kơ bruă ngă tui jơlan hơdră pơplih phrâo, hơdrôm hră phrâo amăng thun 2023 kiăng kơ hmao kiăng kơ hmao tlôn pel ĕp, pơsir hĭ hơdôm tơlơi gun găn, pơhlôm hơdôm hơnong pơkă mơng Ping gah hăng Khua pơ ala mơnuih ƀon sang dêh čar ba tơbiă hơmâo ngă tui djop, klă hloh.

Siu Đoan: Pơblang