Tui hră lăi pơthâo kơ bruă akŏ pơjing hơdôm Ping gah amăng Ping gah Khua pơ ala mơnuih ƀôn sang dêh čar, hơmâo 11 Ping gah, anun lĕ Ping gah anom bruă jŭ yap kơnuk kơna; Ping gah anom bruă Khua pơ ala mơnuih ƀôn sang dêh čar, Ping gah Khul djuai ania; Ping gah Jơnum min tơlơi phiăn hăng phiah phiăn; Ping gah Jơnum min bơwih ƀong huă hăng prăk kak; Ping gah Jơnum min pơgang rơnuk rơnua, hơđong hăng pơtom hiăp; Ping gah Jơnum min gru grua hăng mơnuih mơnam; Ping gah Jơnum min boh thâo ia rơgơi hăng ayuh hyiăng; Ping gah Jơnum min bruă mă khua mua; Ping gah Jơnum min ngă tui tơlơi rơkâo mơnuih ƀon sang hăng krăo lăng; Ping gah hơdôm anom pơphô bruă, djru bruă Ping gah Khua pơ ala mơnuih ƀôn sang dêh čar.

Đĭ pơhiăp amăng mông jơnum, Khua git gai pơ ala mơnuih ƀôn sang dêh čar ơi Trần Thanh Mẫn rơkâo djop Ping gah ječ ameč pok pơhai bruă mă tui hơbô̆ bruă phrâo, khul grup phrâo, amăng anun kiăng tŏ tui klă bruă jao, boh than ba glăi bruă mă mơng grup Ping gah, Ping gah hlâo anun, anăm bruă gun hĭ, lŏm lui bruă mă, hrưn đĭ klă ƀiă, tŭ yua amăng djop mơta bruă. Hơdôm anom bruă gum hrŏm kjăp, kiăo tui lăng tơlơi tơnap tap, gun găn phrâo ƀuh kiăng hmao tlôn pơsir hĭ klă; lăi pơthâo brơi gưl bơdjơ̆ nao sem lăng, pơsit lơm kiăng.

Khua git gai pơ ala mơnuih ƀôn sang dêh čar pơtă pơtăn, ječ ameč dưm dăp anih anom amăng lăm, akŏ pơjing hơdôm grup Ping gah, pơjing tơlơi pơkă ngă bruă, pơpha bruă tong ten brơi rĭm čô mơnuih Ping gah amăng gưl Ping gah hăng tơlơi rô nao rai bruă mă hăng hơdôm anom bruă bơdjơ̆ nao kiăng bruă mă mơng djop khul Ping gah pơhlôm hơđong, tŭ yua. Kiăng ngă tui klă bruă kơđi čar, tơlơi pơmĭn, krăo lăng, pel ĕp, đing nao bruă pơphun bruă amăng hơdôm grup Ping gah, pơhlôm jơnum pơƀut klă hloh.

Khua git gai pơ ala mơnuih ƀôn sang dêh čar pơtă kiăng đing nao bruă jơnum pơƀut amăng hơdôm khul grup, mơnuih Ping gah; hơmâo hơdră djru brơi ƀing apăn bruă bơdjơ̆ nao; pơpha mơnuih apăn bruă brơi bơkơnar, tong ten hluai tui pran jua “bruă mă ĕp ruah mơnuih”, ruah ƀing mơnuih rơgơi, hơdip ba gru, “Thâo thăi rah, hơdip hiam dong”.

Phrâo anai, Ding jum kơđi čar ba tơbiă tơlơi klah čun mrô 126, amăng anun hơmâo hơdôm boh tơhnal bơdjơ̆ nao khul Khua pơ ala mơnuih ƀôn sang dêh čar, Khua git gai pơ ala mơnuih ƀôn sang dêh čar ơi Trần Thanh Mẫn rơkâo, Ping gah Khua pơ ala mơnuih ƀôn sang dêh čar tañ kơsem min kiăng lơm gơnong glông pơsit boh tơhnal tong ten, huăi sư̆ rơbư̆ ôh.

“Pơplih pơkra, pơhrua hơdôm tơlơi pơkă amăng Ping gah, tơlơi phiăn mơng Kơnuk kơna, kơ hơdră bruă bơdjơ̆ nao kiăng ngă atur djơ̆ tơlơi phiăn pok pơhai pơgiong hơbô̆ bruă abih bang mơng anih anom kơđi čar. Kar hăng Khua git gai Ping gah ơi Tô Lâm hơmâo lăi anai lĕ thun blan yôm hloh kiăng prap lui jơnum Ping gah djop gưl, anăp nao jơnum khua mua đơ đam dêh čar mơng Ping gah; tŏ tui dưm dăp lui hĭ anih anom gong jơlan; pơjing hơdră bruă tŏ tui dưm dăp gưl să lăp djơ̆ hăng hơbô̆ bruă pơphun phrâo; jơlan gah pơmut hrŏm sa, dua anih anom gưl tơring čar; pơplih pơkra, pơhrua hơdôm tơlơi phiăn, tơlơi pơkă mơng Ping gah bơdjơ̆ nao boh tơhnal kơ dưm dăp anih anom “wŏt hră pơ-ar yôm phăn anun lĕ čih pơkra phiah phiăn”, tơlơi phiăn ruah khua mua….pơ anăp anai”.

Khua git gai pơ ala mơnuih ƀôn sang dêh čar ơi Trần Thanh Mẫn čang rơmang, gưl Ping gah mơng hơdôm Ping gah hơmâo akŏ pơjing ră anai kiăng tŏ tui tơlơi gơgrong git gai djop mơta, tŭ yua amăng bruă ngă tui hơdôm bruă jao kơđi čar mơng Khul pơ ala, hơdôm jơnum min, hơdôm anom bruă mơng Ƀirô Khua pơ ala mơnuih ƀôn sang dêh čar; pơhlôm hơdôm boh tơhnal bruă mă kiăng hơmâo gưl Ping gah sem lăng, pơgôp hiăp hlâo kơ pok pơhai, amăng anun hruă kjăp hơdôm tơlơi pơmĭn, tŏ tui pơplih phrâo bruă čih pơkra tơlơi phiăn, pơhlôm brơi kơ klă, tong ten, lăp djơ̆ hăng tơlơi rơkâo sit nik; hrưn đĭ tŭ yua bruă krăo lăng hăng pơgôp hiăp, pơtrut hơdră lăi pơthâo, tŭ mă tơlơi pơgôp hiăp mơng khua mua hăng mơnuih ƀôn sang; hrưn đĭ klă amăng tơlơi pơsit hơdôm bruă yôm phăn amăng lŏn ia tui jơlan gah jai hrơi klă, hmao tlôn; kơsem min, pơjing hơdră djru pơplih mrô, pơplih mơtah, mă yua boh thâo phrâo, pơtrut pơphun bơwih ƀong, pơplih pơčeh phrâo…

Hăng pran jua “đuăi rah, dưm dăp rah” kiăng ngă tong ten, klă hloh hăng tañ; gơgrong samơ̆ anăm pơtah hơtai, Khua git gai pơ ala mơnuih ƀôn sang dêh čar čang rơmang hăng đăo gơnang, khul grup Ping gah Khua pơ ala mơnuih ƀôn sang dêh čar lăi hrŏm hăng rĭm Ping gah hnun mơn amra gum hrŏm kjăp phik, ngă tui pran gum pơgôp, ngă pô, gơgrong, pơplih pơčeh phrâo kiăng gir run pơgiong klă bruă jao, pơgôp amăng tơlơi dưi hrŏm amăng lŏn ia./.