VOV4.Jarai - Tlam lơ 12/8, ƀơi sang bruă Khua pơ ala mơnuih ƀon sang hơmâo pơphun Jơnum ră ruai,mă tơlơi pơgôp hiăp mơng ƀing kơhnâo kơ Tơlơi phiăn khăm, pơjrao tơlơi ruă (pơplih pơkra) yua Sang bruă kơsem min Tơlơi phiăn hăng Jơnum min Mơnuih mơnam mơng Ƀirô khua pơ ala mơnuih ƀon sang git gai. Khua git gai pơ ala mơnuih ƀon sang dêh čar ơi Vương Đình Hụê nao pơhmư̆ hrŏm. pơhiăp ƀơi mông jơnum, ơi Vương Đình Huệ lăi, Tơlơi khăm pơjrao tơlơi ruă (pơplih pơkra) jing tơlơi phiăn yôm biă mă. Anai jing sa tơlơi phiăn tơnap, biă ñu amăng hrơi mông anai, tơdơi kơ glăm ba tơlơi truh prong mơng klin Covid-19 ngă. Ƀơi mông jơnum, ƀing kơhnâo, mơnuih apăn bruă hơmâo pơgôp hiăp pơsit rơđah nua khăm pơjrao tơlơi ruă; bruă ia jrao hơmâo abih bang mơnuih gum hrŏm; ngă hrŏm kơnuk kơna hăng mơnuih ƀon sang laih anun tơlơi pơkŏn mơng tơlơi phiăn khăm pơjrao tơlơi ruă (pơplih pơkra); tơlơi hơmâo tuh pơ plai kơ bruă khăm pơjrao tơlơi ruă hăng abih bang mơnuih gum ngă hrŏm. Ƀing khua lăi lĕ, tơlơi phiăn ia jrao kiăng djơ̆ hăng tơlơi pơtô wơ̆t hăng tơlơi hơmâo sit, pơgang ba bruă prăk kiăng rơđah rơđông, abih bang mơnuih thâo, kiăng mơnuih ƀon sang lăng djơ̆ pran, anai jing tơlơi yôm hloh amăng hơdră djru tơlơi hơdip mơda mơnuih ƀon sang.

Siu H’Mai: Pơblang