Kah hăng sa mông jơnum ƀơi hơdôm tal jơnum mơ̆ng Khua pơ ala mơnuih ƀôn sang, ƀing “Khua pơ ala mơnuih ƀôn sang čơđai muai” hrŏm hăng hơdôm “Ding kơna Gong gai dêh čar čơđai muai” hmâo laih mông jơnum bơkơtuai, tơña hăng lăi pơblang bruă bơwih brơi, pơgang brơi čơđai muai kơ: Pơgang, pơgăn tơlơi rơka ruă, taih amang, kơtư̆ juă čơđai muai; Pơgang čơđai muai lăi pơthâo tâ̆o klă, pơčeh phrâo amăng glông plăng internet.

Pơhiăp amăng mông jơnum anai, Khua git gai wai lăng pơ ala mơnuih ƀôn sang dêh čar ta, ơi Vương Đình Huệ pơtŏng sit, Ping gah, Kơnuk kơna hăng abih bang mơnuih mơnam pioh na nao tơlơi lăng ba, bơwih brơi pha ra kơ čơđai muai. Kiăng ngă klă hloh dong bruă pơgang, bơwih brơi, pơtô juăt čơđai muai, Khua git gai wai lăng pơ ala mơnuih ƀôn sang dêh čar rơkâo hơdôm gưl Ping gah, Gong gai lăi pơthâo dơlăm dong hơdră pơtrun, jơlan gah mơ̆ng Ping gah, hơdră bruă, tơlơi phiăn mơ̆ng Kơnuk kơna kơ bruă pơgang, bơwih brơi, pơtô pơhrăm čơđai muai. Glông hơdră bruă, tơlơi phiăn pơgang, bơwih brơi, pơtô juăt čơđai muai, bruă pơgang, pơgăn taih amang, kơtư̆ juă, ngă rơka ruă čơđai muai hmâo mă yua tum djop laih mơn, ha amăng plĕ, ba glăi laih hơdôm bôh tơhnal klă amăng bôh nik ñu./.