VOV4.Jarai-Mah bưp lu tơlơi lông lăng, tơnap tap, hŭi rơhyưt, samơ̆  ƀing hlăk ai tơdăm tơhan pơgang guai dêh čar abih pran jua mă bruă yua kơ mơnuih ƀôn sang, ngă bruă thâo pơčeh phrâo, kơsung nao pơ anăp amăng djop bruă…Gơñu arăng pơhmu kah hăng hơdôm asar pơtŭ ia mơtah bơngač lơlong amăng mông kơnam hơjan rơbŭ kơthel, adai pơđiă hai kiăng akŏ pơdong kual giăm guai dêh čar jai hrơi pơdrong asah.

Ƀing ta ngă juăt hăng sa čô mơnuih khua hlăk ai tơhan pơgang guai dêh čar kơsung nao pơ anăp phrâo anai dưi pơpŭ bơni hlăk ai ba gru hlâo laih anun mơnuih lu tơlơi čang rơmang amăng khul ling tơhan thun 2021, anun lĕ thiếu tá Trần Minh Cường, pô djru bruă kơđi čar Puih tơhan pơgang guai dêh čar amăng jang guai lŏn ia Cửa Việt, tơring čar Quảng Trị.

Amăng 10 čô mơnuih hlăk ai ba gru hlâo tơhan pơgang guai dêh čar thun 2021, Thiếu tá Trần Minh Cường, khua djru bruă kơđi čar Puih tơhan pơgang guai dêh čar či amăng jang guai dêh čar Cửa Việt tơring čar Quảng Trị jing mơnuih ngă khua git gai, pơphun brơi bruă mă amăng puih kơđông, anun yơh boh tŭ yua bruă ñu ngă hơmâo anŏ phara biă mă.

Hrăm giong sang hră tơhan pơgang guai dêh čar, hơmâo puang lu hloh, sang hră iâu brơi ngă nai pơtô samơ̆ tơlơi ñu kiăng hăng tơlơi khăp kiăng pơyơr pran jua mă bruă mơ̆ng hlăk ai djru pơgang guai lŏn ia dêh čar, Cường glăi ngă tơhan pơgang guai dêh čar tơring čar Quảng Trị. Ƀơi puih kơđông tơhan pơgang guai dêh čar Hướng Lập, Cường hơmâo pơdah rai bruă ngă, găn rơgao lu, ngă giong bruă jao. Sa tơlơi ƀuh rơđah mơ̆ng sa čô tơdăm phrâo mut ngă tơhan hmar beč bal, khin hơtai, laih anun thâo pơhiăp puăi tlao rơgơi, pơtô lăi djơ̆ rơ-ua amăng bruă mă. Ñu thâo adoh suang, pĕ gông anun pơphun lu bruă mă mơak, tŭ yua pơhưč lu hlăk ai mut ngă hrom, djơ̆ kah hăng boh pia “Khua hiư̆m pă, bruă mă hnun mơtam yơh”.

Ñu hur har biă mă lăi pơthâo khua mua pơ dlông, git gai ping gah truh khua amăng puih kơđông pơphun lu bruă mă hiam tŭ yua pơtrut lu mơnuih ngă hrom kah hăng: Tơhan pơgang guai dêh čar gum pran jua man pơdong plơi pla phrâo”; “Yong tơkai adơi nao sang hră, tŭ mă ană rông amăng puih kơđông tơhan pơgang guai dêh čar”; “Mơnuih djă thong čơkăp ƀŭ rơgơi guai dêh čar”; “Mông hrăm hră ƀơi guai dêh čar”; “Nai ia jrao tơhan grat mơtah”….Hăng hơdôm boh tơhnal, tơlơi hur har pran jua amăng bruă ñu ngă, ƀuh rơđah Khua tơhan pơgang guai dêh čar pơđĭ bruă ñu ngă khua git gai ping gah –khua djru bruă kơđi čar Puih kơđông tơhan amang jang guai dêh čar či Cửa Việt lơ̆m ñu phrâo 29 thun.

Thiếu tá Trần Minh Cường, khua djru bruă kơđi čar, Puih kơđông tơhan pơgang guai dêh čar či amăng jang Cửa Việt, gah anom bruă tơhan pơgang guai dêh čar tơring čar Quảng Trị tŭ mă tơlơi bơni gru mơnuih hlăk ai hur har amăng ling tơhan dêh čar thun 2021

Thun 2021 jing thun djă jă kơđŏm gru hiam Thiếu tá Trần Minh Cường lơ̆m Puih kơđông tơhan pơgang guai dêh čar Cửa Việt dưi tŭ mă tơlơi apah bơni anăn Puih kơđông pơsit dưi hăng dưi hơmâo Ding jum ling tơhan apah hră bơni amăng bruă mă pơhlôm, pơgang klin Covid 19; Jơnum min mơnuih ƀôn sang tơring čar Quảng Trị ăt apah hră bơni yua kơ boh tơhnal mă bruă amăng 5 thun na nao mơtam, ngă tui Hră pơčrâo mrô 5 mơ̆ng Ding jum kơđi čar pơtrut hrăm hăng hla tui tơlơi pơmin pran jua hiam, tơlơi dŏ dong ƀong huă Hồ Chí Minh, rơwang thun ngă tui mơ̆ng thun 2016-2021 laih anun ngă tui Kơčăo bruă “Kơtưn pôr pơthâo, pơtô tơlơi phiăn kơ khua mua, mơnuih ƀôn sang dŏ pơ kual guai dêh čar, bul pơtâo ia rơsĭ mơ̆ng thun 2017-2021”.

Rơngiao kơ anun, anom bruă ñu hơmâo Jơnum min mơnuih ƀôn sang tơring čar Quảng Trị apah hră bơni ƀu pơkă hlâo yua bruă djru nao pơklaih brơi ƀing đĭ amăng ƀatô Vietship 01 hơmâo tơlơi truh.

Ƀu kơdŭn kơ tơlơi tơnap tap hŭi rơhyưt ôh, amra nao djru kơ mơnuih ƀôn sang bưp tơlơi truh, thiếu tá Cường git gai ngă hrom iâu pơthưr 1.845 wơ̆t ƀatô, song nan glăi kơđap rơnuk rơnua lơ̆m rơbŭ kơthel truh; djru pơklaih brơi 8 boh ƀatô, song nan hăng 61 čô mơnuih bưp tơlơi truh ječ ameč. Laih dơ̆ng, lăi pơthâo hăng khua mua pơ dlông rơkâo akŏ pơjing 13 grup wai lăng mă ƀatô song nan rơnuk rơnua, 18 grup wai lăng mă tơlơi rơnuk rơnua plơi pla, mơ̆ng anun, hơmâo pơthâo brơi hơdôm rơtuh tơlơi pơhing yôm biă pơdjơ̆ nao kơ tơlơi pơhing ngă pô wai lăng bul pơtâo, plao amăng ia rơsĭ dêh čar, wai pơgang rơnuk rơnua, hơđong mơnuih mơnam amăng anih dŏ mă bruă, ngă hrom djop anom bruă pơsir lu tơlơi hơmâo djơ̆ hăng tơlơi phiăn laih anun hmao kru.

Klin Covid 19 hơđuh rai, Puih kơđông tơhan pơgang guai dêh čar amăng jang guai dêh čar či Cửa Việt hơmâo pơgang hăng bong glăi klin hmar hăng hơđong, hyu pôr hăng mikrô jua pơhiăp ƀơi kual plơi pla. Thiếu tá Trần Minh Cường pô mơtam čih tơlơi pơhing pơtô hơdră pơgang klin, in hră djă hyu, čih boh pơhiăp pôr pơblang tong ten pơpha truh pơ mơnuih ƀôn sang mơtam. Hăng tơlơi git gai mơ̆ng ñu, tơdơi kơ jak iâu bruă mă abih bang mơnuih ƀôn sang ngă hrom pơhlôm, pơgang klin Covid 19 laih anun pơgăn mơnuih mut rai ča čot amăng dêh čar amăng kual guai dêh čar, ƀing khua puih kơđông tơhan hơmâo pơphun brơi 3.040 boh sang anŏ ƀơi 3 boh să, tơring kual, 18 boh plơi, ƀut plơi amăng anih gơñu wai lăng khom kĭ hră ƀuăn ngă hrom pơhlôm, pơgang klin Covid 19.

Hăng tơlơi jĕ giăm, thâo krăn lu ñu nao jak iâu, pơtrut rơkâo lu anom bruă, mơnuih pơdrong djru ba gơnam yua gah ia jrao, mơnong ƀong huă kơ tơhan pơhlôm, pơgang klin, djru kơ čơđai sang hră hăng sang anŏ hơmâo anăn kơnuk kơna djru tơnap tap găn rơgao mông lông lăng truh.

Dưi lăi, rup rap, kơnuih hiam tơdăm mut phung tơhan pơgang guai dêh čar rơnuk pơblih phrâo, ba gru hiam bang bơngač kơtang biă mă kơ tơlơi hơdip hiam, pran jua hur har pơyơr mă bruă yua ană plơi, tơlơi pơmin kjăp găn rơgao tơlơi tơnap lông lăng, kiăng ngă giong bruă mă jao.

Nay Jek: Pơblang