VOV4.Jarai - Ơi Đỗ Văn Chiến, Khua Jơnum min djop djuai ania mơnuih mơnam dêh čar Việt Nam hrom hăng grŭp hyu mă bruă phrâo nao čuă, ƀơk gơnam tam kơ mơnuih Khmer mơbruă ƀôn prong Cần Thơ ƀrô djơ̆ tal Tết Chôl Chnăm Thmây thun 2022.

Ơi Đỗ Văn Chiến ƀơk gơnam tam kơ ƀing yă yơng ơi phơ̆t, Achar ƀrô djơ̆ tal Tết Chôl Chnăm Thmây

Pơ ala kơ khua git gai Ping gah, Kơnuk kơna, ơi Đỗ Văn Chiến hơ-ư̆č hmưi Tết Chôl Chnăm Thmây truh hòa thượng Đào Như, Kơ-iăng Khua Khul git gai bruă khul đăo phơ̆t Việt Nam; Khua Anom kơsem min đăo phơ̆t Nam tông Khmer; Khua grŭp git gai bruă Khul đăo phơ̆t Việt Nam ƀôn prong Cần Thơ, hrom hăng hòa thượng, thượng tọa, ƀing yă yơng ơi phơ̆t hăng neh wa djuai ania Khmer čơkă Tết tui phiăn juăt Chôl Chnăm Thmây pơđao, mơ-ak, tâ̆o yâu hăng ba glăi lu bôh tơhnal pơ̆ anăp anai. Ơi Đỗ Văn Chiến čang rơmang, ƀing yă yơng ơi phơ̆t hrom hăng neh wa tui đăo phơ̆t djuai ania Khmer pơsur dong ană bă, ană tơčô gir run pơhrăm, khă tơnap tap ăt ƀu dưi lui hrăm hră mơn. Hrom hăng anun, čang rơmang neh wa ngă tui dong pran jua gum hrom hơbit, gum tơngan hrom ngă klă hơdôm tơlơi pơtrun, jơlan gah mơng Ping gah, hơdră bruă, tơlơi phiăn mơng Kơnuk kơna, djru pơdŏng plơi pla jai hrơi jai đĭ kyar./.

Siu H’ Prăk: Pơblang