Ƀơi anăp bruă hơmâo lu wơ̆t măt mơnŏng ƀong huă, pô pơ ala Nguyễn Minh Tâm, grup khua mơ̆ng Quảng Bình rơkâo đĭ Kơnuk kơna, Khua mua pơ ala mơnuih ƀôn sang dêh čar čih pơkra giong tơlơi phiăn đah mơ̆ng dưi wai lăng rơnuk rơnua hơdjă mơnŏng ƀong huă, biă ñu lĕ gơnam ƀong huă sĭ ter jơlan. Amăng bruă pơgăn apui ƀong mơnŏng ngă pơtuh, Nguyễn Minh Tâm pơsit: ăt dŏ hơmâo đôč bruă “mơ̆ng ngŏ pơ-iă, gah yŭ rơ-ơ̆” amăng bruă pơgang hĭ tơlơi anai:“Jơnum lok 5, Khua ding jum man pơdong pơsit amra hrŏm hăng Ding jum Kông an pơhlôm klă hloh rơnuk rơnua hloh amăng bruă pơgăn, pơgang apui ƀong. Jơnum lok 6 hơmâo lu khua bơngơ̆t kơ bruă pơgang pơhlôm apui ƀong, prah apui, Kơnuk kơna ăt ƀuăn laih anun ăt črâo bruă hruă kơjăp hloh bruă pel ĕp pơgang, prah apui, biă ñu ƀơi hơdôm plơi prong samơ̆ hơdôm tal apui ƀong rơngôt biă mă phrâo rơgao brơi ƀuh ƀing ta ƀu thâo anŏ ngă ôh lơ̆m hơmâo apui ƀong kơtang. Kiăng biă mă hơdôm anom bruă pơplih hơdră ngă bruă, tañ pơsir hĭ bruă mơ̆ng ngŏ pơtrun bruă pơ yŭ ƀu ngă tui, kiăng hơdôm tơlơi pơtrun mơ̆ng Kơnuk kơna tañ hơmâo ngă đah mơ̆ng pơgăn hĭ tơlơi rơngôt, djai rơngiă yua apui ƀong, mơnŏng pơtuh ngă hrơi blan pơ anăp”.

Amăng bruă pơtô hrăm, ơi Trần Đình Gia, khua pơ ala mơ̆ng tơring čar Hà Tĩnh lăi, tơdơi kơ ngă tui jơlan hơdră pơtô hrăm phrâo, hơdrôm hră phrâo, lu gơnam bơwih brơi bruă pơtô hăng hrăm aka ƀu hơmâo tuh pơ alin djŏp ôh, pơtô pơjuăt, bơrơguăt bruă brơi ƀing nai pơtô ăt bư̆p lu tơlơi tơnap...Kơ bruă wai lăng čơđai hrăm apah, khua pơ ala Trần Đình Gia lăi:“Hrăm apah jing tơlơi kiăng mơ̆ng djŏp mơnuih yơh, tơdah hơmâo wai lăng, pơtô ba klă, samơ̆ hơdôm hră pơ-ar pơtô wai lăng, pơphun pơtô hrăm apah gah rơngiao sang hră aka ƀu djơ̆ đơi ôh, anun jing hơmâo mơnuih ngă hmư̆ ư sat kơ bruă pơtô hrăm. Kơ bruă anai, anom bruă pơtô hrăm khŏm kiăng pơtô brơi lăp djơ̆”.

Pơčrông sai ƀơi mông jơnum kơ bruă kiăng tuh pơ alin prăk kăk kơ sang ia jrao, khua pơ ala Nguyễn Lân Hiếu, grup mơ̆ng Bình Định pơsit: Tơdah ngă tui hơdră hơđăp, ƀu tŭ yua ôh, laih anun ba tơbiă hơdră pơsir:“Kâo rơkâo amăng mông anai kiăng tuh pơ alin prăk kăk, mơnuih mă bruă kơ sang ia jrao tơring glông yua dah sang ia jrao pơ anai sô kơnô, mơnuih mă bruă hai aset mơn. Ƀing ruă sang anŏ hơmâo prăk lĕ arăng ba nao pơ sang ia jrao prong, bơ ƀing dŏ glăi lĕ mơnuih rin, ruă kơtang, jing glêh tơnap biă mă”.

Pơsit boh yôm mơ̆ng jơlan hơdră man pơdong plơi pla phrâo ngă pơplih tơlơi bơwih ƀong, mơnuih mơnam, samơ̆ pô pơ ala Nguyễn Văn Huy, grup mơ̆ng Thái Bình bơngơ̆t kơ bruă lăng ƀu yôm gru grua. Lu gru grua yơyôm, anih gru đưm, anih hơdip ană plơi ƀu hơmâo lăng yôm ôh; tơlơi pơmin soh sat pơčut mơ̆ng klôn, bơbeč djơ̆ tơlơi hơdip mơnuih ƀôn sang amăng plơi pla...“Kiăng pơtrut bruă akŏ pơdong plơi pla phrâo, dưi ngă djŏp rơnoh pơkă gru grua hiam amăng man pơdong plơi pla phrâo lăi hơjăn, kâo rơkâo đĭ Kơnuk kơna ta pơƀut sem lăng ba tơbiă hơdră čih pơkra tơlơi phiăn gru grua đưm, hơdôm tơlơi tơnap kơ bruă tuh pơ alin bơbeč djơ̆ bruă đĭ kyar bơwih ƀong, rơkâo đĭ hăng Kơnuk kơna lăng yôm, pơtô ba kiăng hơmâo tơlơi pơtrun rơđah hloh kơ plơi pla phrâo, biă ñu rơnoh pơkă gru grua đưm”.

Ăt amăng rơwang hrơi tơjuh rơgao mơn, Khua mua pơ ala mơnuih ƀôn sang bơkơtuai kơ bruă bơwih ƀong, mơnuih mơnam hăng prăk kơnuk kơna thun 2023 hăng hơdôm blan akŏ thun anai. Ƀing khua pơsit, bơwih ƀong dêh čar ta đĭ kyar lu mơn, hơđong mơn lơ̆m ƀơi rŏng lŏn tơnah hơmâo lu rung răng. Lăi nao tơlơi rơđah bơngač kiăng tŭ yap anun lĕ kual ngă hmua pla pơjing ăt jing gong tơmeh phun mơn, ƀing khua kiăng wai lăng bruă pok prong tơlơi bơwih ƀong, lăp đing nao anih sĭ mơdrô amăng dêh čar hơmâo 100 klăk čô mơnuih; laih dong kah pơpha, jao bruă kơ hơdôm boh tơring đah mơ̆ng pơtrut pơsur pran jua ngă bruă gir hloh, thâo pơčeh phrâo./.