Pơhiăp git gai, Khua pơ ala mơnuih ƀôn sang dêh čar ơi Trần Thanh Mẫn lăi pơtong, sa tơlơi phiăn klă khom “Tong ten mơ̆ng jơlan hơdră, kơjăp mơ̆ng bruă čih pơkra, tŭ ư hrŏm mơ̆ng abih bang, thâo hluh rơđah dưi ngă tui sit nik”. Anai ăt tơlơi kiăng pơkă brơi kơ abih bang pioh pơphun bruă mă čih pơkra tơlơi phiăn dêh čar, jai hrơi tong ten hăng bruă mă hơmâo sit nik amăng tơlơi hơdip mơda rim hrơi, hăng hơdôm tơlơi mơnuih ƀôn sang laih anun ƀing ngă bruă mơdrô hlăk đing nao.

Tui hăng ơi Trần Thanh Mẫn, lơ̆m čih pơkra tơlơi phiăn dêh čar, blung hlâo khom pơphun mơ̆ng boh tŭ yua jơlan hơdră, hră pơtrun, ƀu djơ̆ lăi tŭ kơ hơmâo lu tui mrô rơnoh jŭ yap, tơlơi phiăn pơkă đôc ôh. Rĭm sa hơdrôm hră tơlơi phiăn, kiăng lăi pơthâo rơđah anŏ či pơsir tơlơi hơgĕt amăng bruă hơmâo sit nik, yua hơgĕt kiăng čih pơkra, jơlan hơdră pơjing rai rơnoh hơgĕt, bơbeč djơ̆ pô hlơi, prăk či ngă tui hơdôm, pran jua či ngă tui mơ̆ng pơpă laih anun anom bruă hơƀơi pô glăm ba.

Biă mă ñu, ƀing khua mua pơ ala kiăng pơtum pơčrong sai hơdôm jơlan hơdră mơ̆ dŏ phara đơi tơlơi či kiăng, anŏ thâo hluh, hơdôm tơlơi pơdjơ̆ nao sit nik kơ mơnuih ƀôn sang, sang bruă mơdrô; hơdôm tơlơi phiăn pơkă phrâo aka ƀu hơmâo djơ̆ ôh hlâo tơdơi ƀudah aka ƀu lông ngă lăng, găn rơgao djop ôh. Khua pơ ala mơnuih ƀôn sang dêh čar ơi Trần Thanh Mẫn pơtrun hiăp, brơi bruă mă čih pơkra tơlơi phiăn dêh čar khom ngă tui tơlơi pơmin phrâo, amăng anun tơlơi phiăn pơtum nao kơ tơlơi phun pơdjơ̆ nao amăng tơlơi dưi mơ̆ng khua pơ ala mơnuih ƀôn sang dêh čar, hơmâo tơlơi pơsit găl hăng hơđong.  Tơlơi kiăng anun dưi lăi pơtong rơđah amăng tơlơi phiăn ƀơi anŏ ber đôč samơ̆ djop laih anun kŏn ngă tŭ kơ hơmâo lơi jơlan hơdră pơtrun; tơlơi pơkă ƀiă hloh samơ̆ anŏ glăm, gơgrong phun khom rơđah. Tơlơi phiăn khom kiăo tui hmao hăng tơlơi hơdip, samơ̆ ƀu djơ̆ lăi, hăng hơdră pơblih pơkra glăi na nao tơlơi phiăn.

“Hơdôm tơlơi pơdjơ̆ nao tơlơi dưi ană mơnuih, tơlơi dưi mơ̆ng mơnuih ƀôn sang, anŏ gêh găl kơ bruă sĭ mơdrô, pơpha prăk kăk ngăn rơnoh, pơphun bruă mă tơlơi dưi hăng gơgrong ba mơ̆ng sang bruă kơnuk kơna, khom pơkă tong ten rơđah rơđong amăng tơlơi phiăn. Bơkơđai glăi, ƀu dưi čih pơkra nao amăng tơlơi phiăn lu đơi ôh, hơdôm hơdră ngă pơdjơ̆ nao mơneč tơlơi kơhnâo amăng bruă mă sa hnơ̆ng ƀudah hơdôm boh yom phun pơblih na nao. Anŏ kiăng tơlơi phiăn čih pơkra ber đôč samơ̆ ƀu ngă tŭ kơ hơmâo ôh jơlan hơdră, hră pơtrun; tơlơi pơkă ƀiă hloh samơ̆ tơlơi gơgrong khom rơđah; hơđong hloh samơ̆ ăt djop mơ̆n anŏ gêh găl ngă tui hăng bruă mă rim hrơi. Tơlơi phiăn khom kiăo tui hmao bruă mă amăng tơlơi hơdip mơda rim hrơi samơ̆ kiăo tui hmao kru ƀu djơ̆ lăi bruă kiăo tui tơlơi hơdip hăng hơdră čih pơkra na nao tơlơi phiăn dêh čar”.

Hăng mơnuih ruah khua, boh tŭ yua mơ̆ng sa mơta tơlơi phiăn ƀu kơnong pơƀuh brơi ƀơi hơdôm mơta tơlơi dưi hơmâo ƀing khua mua pơ ala mơnuih ƀôn sang dêh čar posit đôč ôh, dŏ yom hloh lĕ sit bă yua amăng tơlơi hơdip mơda, tơlơi phiăn dưi pwosir hơdôm tơlơi hơmâo mơ̆n hă, tơlơi dưi hăng anŏ tŭ yua găl kơđi, djơ̆ tơlơi phiăn mơ̆ng mơnuih ƀôn sang hơmâo sem lăng tong ten hăng pơgang ba klă mơ̆n hă. Khua pơ ala mơnuih ƀôn sang dêh čar ơi Trần Thanh Mẫn pơtrun hiăp brơi sem glăi tong ten hnơ̆ng boh thâo, djơ̆ rơ-ua rimčrăn ngă tui tơlơi phiăn; pơhlom djơ̆ hăng hơbô̆ gong gai kơnuk kơna tơring čar dua gưl laih hă laih anun brơi pơpha rơđah gưl apăn bruă, tơlơi dưi mă bruă. Pơpha gưl anom bruă ƀu kơnong pơblih jao tơlơi dưi đôč ôh, dŏ nao hrŏm hăng pran jua, prăk kăk kông ngăn, mrô rơnoh hăng gơgrong ba amăng bruă mă.

“Khua pơ ala mơnuih ƀôn sang dêh čar čih pơkra tơlơi phiăn pioh pơsir hơdôm tơlơi hơmâo sit nik, pơgang tơlơi dưi hăng anŏ tŭ yua găl kơđi mơ̆ng mơnuih ƀôn sang, pơsir hĭ tơlơi gun, anŏ kơđông, pơhluh bruă ngă, pran jua, pok jơlan pơđĭ kyar. Gai pơkă tuč rơnuč ƀu djơ̆ lăi pơsit hĭ hơdôm mơta tơlơi phiăn, tơdơi kơ tơlơi phiăn laih dưi ngă tui đôč ôh, khul apăn bruă khua mua dŏ ba yua klă hă ƀô̆, mơnuih ƀôn sang hăng sang bruă mơdrô ngă bruă gêh găl mơ̆n hă, pran jua mơnuih mơnam dưi pơklaih brơi mơ̆n, tơlơi dưi git gai wai lăng dêh čar dưi pơđĭ tui mơ̆n hă ƀô̆. Sa tơlơi phiăn klă lĕ khom tong ten mơ̆ng jơlan hơdră, kơjăp amăng hơdră čih pơkra, tŭ ư sa hnơ̆ng amăng glông bruă, abih bang thâo hluh lơ̆m ngă tui”.

Khua pơ ala mơnuih ƀôn sang dêh čar čang rơmang, rĭm tơlơi pơgôp hiăp mơ̆ng ƀing pơ ala mơnuih ƀôn sang dêh čar pơčrong sai ƀơi mông jơnum ƀu dŏ glăi ƀơi glông boh hră, tơlơi pơhiăp čih amăng hơdrôm hră tơlơi phiăn đôč ôh, dŏ tơbiă rai mơ̆ng hrơi mông kơsem min tong ten hră pơar, pơhmu nao rai lu mơta bruă mă rĭm hrơi laih anun pơkă lăng hăng abih bang glông bruă tơlơi phiăn pơkŏn ƀơi dêh čar. Hơdôm mơta tơlơi amăng jơlan hơdră, hră pơtrun, pơtong rơđah anŏ bơbeč nao, tơlơi ngă pơdjơ̆ hrŏm mơ̆ng lu mơta tơlơi phiăn pơkŏn ƀudah anŏ gêh găl či ngă tui djop, ngă pơgiong tui. Hăng mơnuih ruah khua, anai lĕ lăng kah hăng gai pơkă yom hloh amăng bruă mă čih pơkra tơlơi phiăn dêh čar. Sa tơlơi phiăn ƀu kơnong hơmâo rơnoh yom sit nik lơ̆m hơmâo djru kơ khul apăn bruă git gai wai lăng kơnuk kơna dêh čar tŭ yua prong, mơnuih ƀôn sang hăng sang bruă mơdrô gêh găl hloh, kông ngăn pran jua mơnuih mơnam dưi pơklaih brơi hăng tơlơi thâo git gai wai lăng ƀơi dêh čar dưi pơđĭ tui hloh mơ̆n.