VOV4.Jarai - Amăng rơwang hrơi rơjuh laih rơgao, Grup krăo lăng bruă mă mơng Grup Khua pơ ala mơnuih ƀon sang tơring čar Dak Lak hơmâo nao pel ĕp ƀơi Gơnong bruă wai lăng ayuh hyiăng rơhuông adai lơ̆m ngă tui hơdră bruă, tơlơi phiăn amăng pơkrem, pơgăn ngă khưi khai. Amăng mông mă bruă, Grup krăo lăng rơkâo gơnong bruă anai ngă rơđah sa, dua boh tơhnal yôm phun, amăng anun hơmâo bruă lŏn đĭ nua ƀơi tơring čar amăng thun blan laih rơgao, tơlơi anai amra ngă sat biă mă.

Ƀơi anăp kơ bruă lŏn mơnai đĭ nua kơtang tui ră anai ƀơi hơdôm kual lŏn prap pok pơhai man pơkra hơdôm ring bruă prong amăng plơi prong Buôn Ma Thuột hăng hơdôm tơring glông jum dar ngă kơ mơnuih ƀon sang ƀu hơđong pran jua ngă hmua, bơwih ƀong huă. Sit biă ñu, lu mơnuih djuai ania ƀiă sĭ lŏn sang anŏ. Grup krăo lăng bơngŏt kơ hơdră kiăng ngă hơđong hăng wai lăng tŭ yua lŏn mơnai. Yă Nguyễn Thị Xuân, Khua pơ ala mơnuih ƀon sang tơring čar Dak Lak brơi thâo:

“Hơdôm thun laih rơgao tơring čar đing nao biă mă hăng gir run git gai bruă jao lŏn dŏ, lŏn ngă hmua brơi mơnuih djuai ania ƀiă. Samơ̆, yua kơ lŏn đĭ nua tui ră anai tơdơi kơ hơdôm thun dong, amra ngă glêh tơnap kơ mơnuih ƀon sang yua kơƀah lŏn dŏ, lŏn ngă hmua. Lơ̆m anun ƀing ta ƀu hơmâo lŏn jao kơ mơnuih ƀon sang dong tah ?”.

Tui hăng ơi Trần Đình Nhuận, Khua gơnong bruă wai lăng rơhuông adai lŏn mơnai tơring čar Dak Lak, tui jŭ yap amăng 3 blan akŏ thun 2022, bruă sĭ mơdrô lŏn mơnai amăng tơring čar ƀuh lu biă mă hăng 103.000 wŏt, đĭ giăm 200% pơhmu tui tơđar thun hlâo. Lŏn đĭ nua kơtang pơhmu hăng rơwang tal 4 thun 2021. Tơlơi anai hơmâo pơplih prong kơ mơnuih blơi hăng mă yua, mơnuih mơng ƀôn prong Hồ Chí Minh, Hà Nội glăi blơi lŏn ƀơi hơdôm kual jum dar plơi prong Buôn Ma Thuột. Ơi Nhuận ăt lăi pơthâo hơdôm anŏ aka ƀu klă amăng bruă wai lăng lŏn mơnai, biă mă ñu lĕ bruă pơplih ngă hră pơ-ar mă yua lŏn mơnai mah wŏt hơdôm kual aka ƀu hơmâo djop anih anom, jơlan glông, brơi kơ ƀing mơnuih aka ƀu kiăng man pơdong sang. Laih dong, tơlơi phiăn kơ lŏn mơnai aka ƀu klă, bruă ngă hră pơ-ar mă yua lŏn man pơdong sang ƀu lăi nao tong ten, nua lŏn mơng kơnuk kơna ƀu pơsit djơ̆ hăng hơdôm kual lŏn phara…

Ƀing Khua pơ ala mơnuih ƀon sang tơring čar Dak Lak mă bruă hăng gơnong bruă wai lăng rơhuông adai lŏn mơnai Dak Lak

Bruă lŏn đĭ nua amra pơglăi 4 tơlơi sat anun lĕ: Tơnap amăng bruă ngă tui hăng wai lăng bruă man pơdong, mă glăi lŏn pioh man pơkra anih anom, rơnoh prăk tla glăi pô lŏn, bruă ƀom kiơng, amra hơmâo lu tơlơi bơrơjah, pơhrŏ amăng pơhrui ngăn drăp kơnuk kơna lơ̆m sĭ mơdrô lŏn mơnai. Lu mơnuih djuai ania ƀiă lơ̆m ƀuh lŏn đĭ nua laih anun sĭ lŏn sang, ƀu thâo yua prăk, tơdơi anai lŏn ngă hmua ƀu hơmâo, bruă mă ƀu hơmâo … Ƀơi anăp kơ tơlơi anai, gơnong bruă wai lăng ayuh hyiăng rơhuông adai hơmâo hră pơ-ar rơkâo Jơnum min mơnuih ƀon sang tơring čar git gai hơdôm tơring glông wai lăng kjăp bruă ngă hră pơ-ar pơplih mă yua lŏn. Ơi Trần Đình Nhuận brơi thâo:

“Ƀing gơmơi hơmâo mơ-it nao lu hră pơ-ar kiăng kơ pơplih, git gai hơdôm tơring glông wai lăng kjăp bruă ngă hră pơ-ar pơplih mă yua lŏn mơnai, kơnong brơi pơplih lŏn ngă hmua pơplah hăng kual lŏn man pơdong sang hơmâo jơlan glông hăng brơi kơ ƀing mơnuih glăk kiăng. Bơ amăng hơdôm kual jum dar man pơdong anih anom amăng plơi prong, plơi pla phrâo kiăng kơ ngă tui akŏ bruă hơmâo tŭ yap hăng tơlơi pơkă amăng tơlơi phiăn”.

Khua gơnong bruă wai lăng rơhuông adai lŏn mơnai tơring čar Dak Lak Trần Đình Nhuận ăt lăi pơthâo 6 tơlơi ba truh kơ lŏn đĭ nua anun lĕ: Bơbeč mơng bruă dưm dăp man pơdong rơwang thun 2021-2030, bơbeč mơng hơdôm akŏ bruă phun hơmâo gơnong glông amăng tuh pơ alin, bơbeč nao bruă pơđĭ kyar dưm dăp amăng plơi prong, bơdjơ̆ nao klin Covid-19, prăk hrŏ nua, rung răng hăng tơlơi pơmĭn kiăo tui arăng. Hrŏm hăng anun, anom bruă tuh pơ alin đing nao hơdôm anŏ gal amăng tơring čar kiăng kơ man pơdong sang pioh pơdơi pran.

Amăng thun blan laih rơgao, Jơnum min mơnuih ƀon sang tơring čar Dak Lak ăt hơmâo hră pơ-ar git gai, wŏt bruă jao brơi hơdôm anom bruă kông ang ngă rơđah ƀing mơnuih pơtrut pơsur lăi pơthâo kơ bruă đĭ nua lŏn ča čot kiăng kơ ba glăi tơlơi dưi kơ ƀing gơñu. Git gai Jơnum min mơnuih ƀon sang tơring glông, plơi prong wai lăng kjăp bruă ngă hră pơ-ar mă yua lŏn mơnai. Tŏ tui rơkâo pơplih pơkra tơlơi pơkă lơ̆m pơčlah lŏn ngă hmua tui tơlơi pơkă amăng plơi prong lĕ 1.000 met karê pơ glông, tơring glông 2.000 met karê pơ glông. Hrŏm hăng anun, jao gơnong bruă, anom bruă bơdjơ̆ nao kơsem min kiăng kơ nua sĭ lŏn mơng Kơnuk kơna giăm hăng nua lŏn djop anih, bruă ngă hră  pơ-ar sĭ lŏn kiăng kơ djơ̆ hăng tơlơi sit nik ….

Ƀing Khua pơ ala mơnuih ƀon sang tơring čar Dak Lak rơkâo, gơnong bruă wai lăng rơhuông adai lŏn mơnai tơring čar Dak Lak kơtưn pơtô pơblang, lăi pơthâo tơlơi phiăn kiăng kơ ngă tui hơdră pơkrem, pơgăn yua khưi khai. Laih dong, đing nao bruă wai lăng ngăn drăp kơnuk kơna, mơnuih mă bruă, kông ngă djơ̆ tơlơi pơkă; pơhlôm amăng mă yua lŏn mơnai, gơnam yôm amăng atur lŏn, ia krông čroh hnoh tŭ yua, hơđong kjăp.

Siu Đoan: Pơblang