VOV4.Jarai - Rơwang hrơi tơjuh rơgao, Khul wai lăng mơng Ƀirô khua pơ ala mơnuih ƀon sang dêh čar tal 15 hơmâo ngă bruă ƀơi 2 boh tơring čar Lâm Đồng hăng Gia Lai kơ bruă pơkrem, pơgăn prai prăk rơwang thun 2016-2021. Tui anun, khul khua wai lăng kiăng hơdôm boh tơring lăi pơthâo glăi rơđah, hơdôm tơlơi aka ƀu djơ̆, phun tơhnal hăng rơkâo đĭ kiăng ngă klă bruă mă yua pơkrem, pơgăn prai prăk khưi khai ƀơi tơring čar amăng rơwang thun pơ anăp.

Ƀơi Lâm Đồng, Khul khua wai lăng mơng Ƀirô khua pơ ala mơnuih ƀon sang dêh čar yua Thượng tướng Trần Quang Phương, Ding kơna Ping apăn bruă Ping gah, Kơ-iăng khua git gai pơ ala mơnuih ƀon sang dêh čar ba jơlan hơmâo mông ngă bruă hăng Jơnum min mơnuih ƀon sang tơring čar Lâm Đồng kơ bruă pơkrem, pơgăn prai prăk rơwang thun 2016-2021.

Lăi pơthâo glăi ƀơi mông ngă bruă brơi ƀuh, tơring čar Lâm Đồng pơƀut wai lăng kơjăp bruă mă yua prăk kơnuk kơna, pơhlôm pơhrui djŏp, ƀu dưi rơngiă, hrŏ trun hnưh prăk jia. Khut khăt mă yua prăk thâo pơkrem, pơmut hrŏm lu jơlan hơdră, hơmâo hơdră pơkrem prăk đah mơng dưi ngă mơng hrơi kah pơpha mơtăm truh kơ amăng hrơi mông ngă bruă mơtăm; ngă tui djơ̆ mrô prăk pơkă hlâo hơmâo Jơnum min pơ ala mơnuih ƀon sang tơring čar pơsit brơi. Amăng bruă brơi yua prăk thun 2016-2021, tơring čar hơmâo pơkrem prăk mơng hrơi pơphun ngă, pơsit mrô prăk mă yua, wai lăng mă yua prăk kơnuk kơna hơmâo rơbêh 3.380 klai prăk.

Khul wai lăng bruă mơng Ƀirô khua pơ ala mơnuih ƀon sang ngă bruă ƀơi Lâm Đồng

Khua khul wai lăng, Thượng tướng Trần Quang Phương - Kơ-iăng khua git gai pơ ala mơnuih ƀon sang dêh čar klah čun glăi ƀơi mông ngă bruă hơmâo pơsit, lăng yôm hơdôm tơlơi gir run mơng tơring čar kơ bruă pơkrem prăk, pơgăn prai prăk khưi khai rơwang thun 2016-2021 mơng tơring čar Lâm Đồng, bơni kơ hơdôm tơlơi lăi pơthâo glăi mơng Jơnum min mơnuih ƀon sang - Jơnum min khua pơ ala mơnuih ƀon sang tơring čar hăng khul khua pơ ala mơnuih ƀon sang dêh čar tơring čar Lâm Đông hơmâo lăi pơthâo djŏp. Kơ-iăng khua git gai pơ ala mơnuih ƀon sang dêh čar kiăng tơring čar ngă rơđah hơdôm tơlơi hơmâo, tơlơi aka ƀu gal, tơhnal ñu hăng rơkâo đĭ hơdră ngă bruă đah mơng dưi ngă klă hloh bruă pơkrem, pơgăn prai prăk ƀơi tơring čar amăng hrơi blan pơ anăp. Kiăng sem lăng kiăo tui tơlơi dưi pơsir amăng bruă ngă tui sit nik tơlơi phiăn pơkrem hăng pơgăn prai prăk. Lăng glăi djŏp hơdôm bruă pơkrem, pơgăn prai prăk mơ̆ phun ñu lĕ mă yua, pơhrui prăk kơnuk kơna, wai lăng ngăn hơdrăp kơnuk kơna, lŏn kơnuk kơna, anih ma bruă, kông ngăn bơdjơ̆ nao lŏn tơnah, măi mok, wai lăng lŏn tơnah, pơtâo čuah, wai lăng mơnuih mă bruă, dưm dăp mơnuih mă bruă kơnuk kơna mă bruă hơdeč, pơhrŏ trun mrô biên chế đah mơng dưi ngă tŭ yua...

Kơ-iăng khua pơ ala mơnuih ƀon sang dêh čar Trần Quang Phương pơhiăp ƀơi mông mă bruă.

Ƀơi Gia Lai, khul mă bruă mrô 2 gah khul wai lăng mơng Ƀirô khua pơ ala mơnuih ƀon sang dêh čar yua Ding kơna Khul apăn bruă git gai Ping gah, Khua Jơnum min bruă prăk - Prăk kăk kơnuk kơna mơng Ƀirô khua pơ ala mơnuih ƀon sang Nguyễn Phú Cường ngă khua khul hơmâo mông ngă bruă hăng Jơnum min mơnuih ƀon sang tơring čar Gia Lai kơ bruă pơkrem, pơgăn prai prăk thun 2016-2021. Tui hăng tơlơi lăi pơthâo, amăng rơwang thun 2016-2021, tơring čar Gia Lai hơmâo pơkrem rơbêh 4.368 klai prăk. Amăng anun, prăk pơkrem amăng bruă mă yua re se lĕ 10% đah mơng hơmâo prăk pioh kơ prăk blan rơbêh 1.154 klai...

Ƀơi mông ngă bruă, ƀing khua mơng khul wai lăng hơmâo rơkâo khua mua Jơnum min mơnuih ƀon sang tơring čar Gia Lai hăng hơdôm gơnong bruă ngă rơđah hơdôm bruă bơdjơ̆ nao kah hăng: bruă wai lăng, pơgang glai, pla glai rưng; hơdôm bruă tuh pơ plai man pơkra kaih; pơtŏng glăi bruă mă yua prăk ODA ƀơi tơring čar; bruă pơkra dơnao ia Ia Mơr aka ƀu mă yua đut tơhnal bruă pruih; hơdôm tơlơi tơnap amăng pơđĭ kyar pơkra apui lơtrik pơplih phrâo; bruă wai lăng, mă yua ia, hơdăng pơtâo; bruă dưm dăp mơnuih mă bruă amăng kơnuk kơna, lăng glăi mrô mơnuih mă bruă kơnuk kơna sit nik...

Pơhiăp ƀơi mông wai lăng, Khua Jơnum min bruă prăk - Prăk kăk kơnuk kơna mơng Ƀirô khua pơ ala mơnuih ƀon sang ơi Nguyễn Phú Cường bơni kơ tơlơi gơgrong bruă mơng tơring čar Gia Lai amăng bruă pơkrem, pơgăn prai prăk. Laih dong kiăng tơring čar pơtrut tui ngă tŭ yua bruă anai; hơmâo hơdră ngă bruă ƀơi rim anom bruă, plơi pla; hyu pel ĕp, sem lăng hloh dong; lăng ba git gai hơdôm kơčăo bruă ngă kaih; hơmâo hơdră pơsir brơi hơdôm kơčăo bruă glăk pơdơi hĭ, biă ñu hơdôm kơčăo bruă kaih giong; hơmâo hơdră wai lăng, mă yua kông ngăn lŏn tơnah lăp djơ̆, djơ̆ hăng tơlơi pơkă...

Khua Jơnum min bruă prăk - prăk kơnuk kơna mơng Ƀirô khua pơ ala mơnuih ƀon sang Nguyễn Phú Cường ăt kiăng Khua Jơnum min mơnuih ƀon sang tơring čar Gia Lai git gai djŏp anom bruă pơhmư̆ tui djŏ tơlơi pơgôp hiăp mơng khul wai lăng; pơhrua tui, ngă pơgiong hră lăi pơthâo glăi đah mơng pơƀuh kơ khul wai lăng tañ hloh. Khul amra pơhmư̆ djŏp hơdôm tơlơi pơgôp hiăp, rơkâo đĭ mơng tơring čar laih anun amra tum pơƀut glăi lăi pơthâo hăng Jơnum min apăn bruă git gai pơ ala mơnuih ƀon sang dêh čar amăng hrơi blan pơ anăp.

Siu H’Mai: Pơblang