Pơčrông sai ƀơi grup kơ črăn tơlơi phiăn pơphun bruă gong gai ƀon lan čih pơkra glăi, ƀing khua mua tŭ ư hăng tơlơi pơmĭn kơtưn bruă kah gưl, jao bruă glăm ba, yua anai lĕ hơdră amra pơsir hĭ bruă ră anai. Tơlơi phiăn anăm pơkă tong ten, rơđah tui rĭm hơdră bruă, mơ̆ kơnong pơkă hơdôm bruă tui tơlơi pơkôl pơkă, lơm jao brơi kơdrưh, gong gai dưi pơsit, gong gai amra glăm ba. Samơ̆ lơm jao hơdrưh prong ƀiă brơi djop gưl gong gai amra dui ba bruă gơnang nao kơdrưh ngă bruă ƀu klă. Đại Hoàng Văn Cường, khul Hà Nội brơi thâo:

“Ba tơbiă jơlan gah hiưm pă kiăng huăi ƀuh hluai tui hơdrưh ngă bruă ča čot, sa amăng hơdôm jơlan gah anun lĕ hơdrưh kiăng kiăo tui pơhlôm rơđah rơđông, tơpă sit, lăi pơthâo. Lơm anun, ƀing apăn bruă amra ngă tui tơlơi thâo thăi, thâo pơčeh phrâo, hur har pran jua mơng tơlơi klah čun mrô 14 mơng Ding jum kơđi čar kơ bruă pơtruh pơsur ƀing mơnuih khin pơplih phrâo kiăng ba glăi tŭ yua bruă mă”.

Mut hrŏm pơčrông sai ƀơi grup, Khua git gai Ping gah dêh čar ơi Tô Lâm pơtă: lăng tơlơi tŭ ư mơng mơnuih ƀôn sang kiăng kơ sem lăng bruă ngă klă, tŭ yua mơng Kơnuk kơna, gong gai djop gưl. Tơlơi anai gơnang nao tơlơi lăng nao ataih, pran pơplih phrâo, thâo ngă tui hơdră bruă mơng gong gai.

“Hrưn đĭ klă bruă bơwih brơi mơnuih ƀôn sang, pơtrut mut hrŏm mơng mơnuih mơnam amăng bruă hrưn đĭ tŭ yua bruă mă mơng anih anom hăng hơkrŭ pran ngă pô. Tơdah ƀu dưi pơtrut pran kơtang mơng mơnuih ƀôn sang amra tơnap tap biă mă. Kiăng pơtrut pơsur, pơkă hiưm pă kiăng dưi ngă tui tơlơi anai. Jao tơlơi glăm ba samơ̆ bruă djru brơi mơnuih ƀôn sang ăt yôm phăn biă mă. Djop hơdrưh ang samơ̆ ƀu gơgrong amăng bruă ngă hră pơ-ar, amra ƀu djru brơi klă mơnuih ƀôn sang”.

Pơgôp hiăp amăng tơlơi phiăn pơphun bruă kơnuk kơna (čih pơkra glăi), Khua git gai pơ ala mơnuih ƀôn sang dêh čar ơi Trần Thanh Mẫn lăi pơtong tơlơi pơmĭn kah pơpha gưl brơi Kơnuk kơna kiăng Kơnuk kơna gơgrong pơsit tui tơlơi sit nik, anai lĕ tơlơi pơkă kiăng pơsir hĭ hơdôm tơlơi gun, anŏ ƀu klă kiăng pok phư ngăn rơnoh pơđĭ kyar. Hơdôm bruă anai hơmâo sem lăng sit nik hăng pơsir hĭ mơtăm. Hăng pran jua anun, Khua git gai pơ ala mơnuih ƀôn sang dêh čar rơkâo, lơm pơgôp hiăp čih pơkra hơdôm tơlơi phiăn bơdjơ̆ nao kiăng tŏ tui pel ĕp, kiăng pơhlôm lăp djơ̆ hăng tơlơi pơkă amăng phiah phiăn.

“Hăng tơlơi phiăn pơphun bruă gong gai ƀon lan (čih pơkra glăi) amra kah pơpha gưl kơtang ƀiă dong brơi gong gai ƀon lan tui jơlan gah, gong gai pơsir bruă, gong gai ngă, gong gai glăm ba. Ră anai Khua pơ ala mơnuih ƀôn sang dêh čar hơmâo pơplih phrâo tơlơi pơmĭn čih pơkra tơlơi phiăn anun lĕ Khua pơ ala mơnuih ƀôn sang dêh čar jao kơdrưh prong ƀiă dong brơi Jơnum min apăn bruă Khua pơ ala mơnuih ƀôn sang dêh čar. Yua hơdră bruă mơng Jơnum min apăn bruă Khua pơ ala mơnuih ƀôn sang dêh čar pơplih lăp djơ̆ ƀiă kiăng pơsir hơdôm bruă ječ. Hăng Khua pơ ala mơnuih ƀôn sang dêh čar pơ anăp anai ƀu wai lăng akŏ bruă tuh pơ alin, wŏt kơnuk kơna ăt ƀu dưi wai lăng kiăng pla ƀiă bruă rơkâo-brơi”.

Sa amăng hơdôm tơlơi pơkă kah pơpha kơdrưh lĕ pơhlôm Khua dêh čar “Anăm pơsit hơdôm bruă tong ten tui tơlơi glăm ba mơng Khua ding jum, Khua anom bruă bơkơnar Ding jum lơm ngă ding kơna Kơnuk kơna hăng gơnong bruă, bruă mă hơmâo jao wai lăng”. Ơi Nguyễn Minh Đức, grup ƀôn prong Hồ Chí Minh rơkâo: Tơlơi pơkă tong ten kơ bruă kah pơpha gưl, jao gưl wai lăng mơng Khua dêh čar truh pơ djop ding jum, gơnong bruă.

“Jao bruă kơplah wah Khua dêh čar hăng Khua ding jum ƀudah Khua gơnong bruă kiăng jao hơdôm boh tơhnal hơget ? Jao bruă brơi Khua Jơnum min mơnuih ƀôn sang tơring čar ƀudah ƀôn prong gah gơnong glông jao bruă hơget ñu ? Amăng anun kiăng hơmâo tơlơi črâo ba kiăng tơdơi anai hơmâo tơlơi pơsit kiăng črâo ba tong ten. Tơdah ƀu hơmâo bruă juăt ƀuh anun lĕ gong gai hơmâo hră pơ-ar rơkâo, hơmâo tơlơi tơña yua aka ƀu tong ten”.

Ƀing khua mua brơi thâo, đơ đam dêh čar glăk ngă tui bruă pơplih kơtang amăng pơphun bruă mă amăng anih anom kơnuk kơna, hăng hrơi mông pơphun tañ hloh, yua kiăng ba tơbiă tơlơi pơtrun pơkă kơ bruă pơsir sa, dua bruă bơdjơ̆ nao dưm dăp anih anom mă bruă, kiăng ngă atur djơ̆ tơlơi phiăn amăng bruă dưm dăp anih anom mă bruă mơng hơdôm anom bruă kơnuk kơna ƀơi gơnong glông hăng ƀon lan./.