Khua pơ ala mơnuih ƀon sang dêh čar lăng yôm hơdôm tơlơi gir run mơng gơnong bruă pơtô pơjuăt hăng tơlơi đing nao mơng Ping gah hăng Kơnuk kơna hăng ƀing nai pơtô lăi hrŏm. Samơ̆, amăng 2 thun ha mrah laih rơgao rơbêh 14 rơbâo čô nai, amăng anun lu hloh lĕ ƀing nai pơtô sang hră čơđai mua hăng gưl tlâo tơbiă mơng sang hră kơnuk kơna pơdong, yua anun kiăng lăng glăi sit nik kah hơmâo hơdră djru lăp djơ̆. Tui ƀing khua mua, mơng anai truh thun 2026 him lăng kơƀah 107 rơbâo čô nai pơtô.

Khua pơ ala mơnuih ƀon sang dêh čar pơčrông sai ƀơi sang jơnum kơ bruă bơwih ƀong huă - mơnuih mơnam

Mrô anai kiăng jŭ yap tong ten, kiăng pơhlôm bruă pơtô hrăm tui tơđar hăng kiăng ngă tui hơnong pơkă pơplih phrâo hăng hrưn đĭ klă dong amăng pơtô hrăm. Ding jum pơtô pơjuăt ơi Nguyễn Kim Sơn lăi pơthâo kơ bruă kơƀah ia pơtô, bruă ƀing nai pơdơi hăng pơplih bruă. Kơ hơdră pơsir, Khua ding jum ơi Nguyễn Kim Sơn lăi rơđah: Ding jum kơđi čar hơmâo tŭ yap 65 rơbâo hơnong pơkă, truh ră anai gơnong bruă pơtô pơjuăt hơdôm boh tơring čar glăk pơmut phrâo ƀing nai pơtô.