Lơ 13/1, pơđok hră lăi pơthâo bruă mă amăng Jơnum đơ đam dêh čar kơ bruă pơplih pơđĭ kyar yua boh thâo phrâo, boh thâo măi mok, pơplih pơčeh phrâo hăng pơplih mrô dêh čar, Ding kơna Ding jum kơđi čar, Khua git gai pơ ala mơnuih ƀôn sang dêh čar ơi Trần Thanh Mẫn pơsit tong tŏ tui gum hrŏm pơphun pel ĕp, sem lăng, lăng glăi bruă pơphun ngă tui hơdră bruă, tơlơi phiăn; mut hrŏm tơlơi pơmĭn kơ bruă jao “ba hơdră bruă jing bruă bơkơtưn”.

Hluai tui tơlơi anun, Khua pơ ala mơnuih ƀôn sang dêh čar amra đing nao hơdôm bruă jao, hơdră bruă yôm phun hrưn đĭ tơlơi pơmĭn, pơplih tơlơi pơmĭn kơ tơlơi gơgrong, bruă pơplih yua boh thâo phrâo, boh thâo măi mok, pơplih pơčeh phrâo, pơplih mrô. Lơ 10/1/2025, Ping gah amăng Ƀirô Khua pơ ala mơnuih ƀôn sang dêh čar hơmâo ba tơbiă akŏ bruă mrô 3260 kiăng ngă tui tơlơi pơtrun, amăng anun hơmâo pơsit tong hơnong pơkă, bruă jao tui tơlơi glăm ba tong ten, bruă mă tong ten hăng pơphun pok pơhai hăng pran jua ječ ameč, tơlơi gir run prong hloh; tơlơi pơkă tong ten, tŭ yua bruă pơplih mrô, mă yua hơdôm tơlơi dưi mơng yua boh thâo phrâo, boh thâo măi mok amăng ngă tui bruă jao; ngă tui pran jua pơplih, pơčeh phrâo, ba jơlan hlâo, thâo pơmĭn, khin ngă, gơgrong glăm ba.

“Sit biă ñu, amăng jơnum klah čun mơng kơnuk kơna thun 2024 laih rơgao, Khua git gai Ping gah dêh čar ơi Tô Lâm tŏ tui lăi pơtong: tơlơi phiăn kiăng pơgiong tañ, kiăng rĭm boh tơhnal pơkă amăng sa tơlơi phiăn đôč. Wai lăng klă boh than dưi ngă, kiăng pơgăn hơdôm brơi rơkâo hăng pơgang brơi; pơplih bruă kah pơpha ngăn drăp hluai tui boh than ba tơbiă, mơ-it nao prăk pel ĕp hơdai nao tơdơi kơ pel ĕp. Hơdră wai lăng yua boh thâo phrâo kiăng pơtrut pơplih pơčeh phrâo hăng pran jua “tơlơi pơkă mrô 10” amăng ngă hmua”.

Hluai tui akŏ bruă kơnuk kơna mơ-it nao hăng ngă tui jơlan hơdră čih pơkra tơlơi phiăn, tơlơi pơkă, Khua pơ ala mơnuih ƀôn sang dêh čar amra pơgôp hiăp sem lăng tŭ yap mă yua hơdôm črăn tơlơi phiăn amăng 06 mơta bruă akŏ phun: Kơ boh thâo ia rơgơi, boh thâo măi mok, pơplih pơčeh phrâo, boh thâo mrô: Pơgiong 8 tơlơi phiăn. Kơ bruă tuh pơ alin hăng prăk kak: pel ĕp, pơgiong 12 tơlơi phiăn. Kơ dưm dăp anih anom, ruah mơnuih apăn bruă, pơtô pơjuăt, pơđĭ kyar mơnuih mă bruă: pel ĕp, pơkra ming, pơgiong 11 tơlơi phiăn. Kơ bruă bơwih ƀong sĭ mơdrô: pel ĕp, pơgiong 3 tơlơi phiăn. Kơ bruă pơhlôm hơđong amăng plang internet, boh thâo mrô, pel ĕp pơgiong 3 tơlơi phiăn. Kơ bruă pơplih mrô, yua boh thâo phrâo, boh thâo măi mok, pơplih pơčeh phrâo: pơgiong tơlơi pơkă djơ̆ tơlơi phiăn kiăng pơtrut bruă pơjing, mă yua Ƀirô Khua pơ ala mơnuih ƀôn sang dêh čar mrô, kơnuk kơnua mrô, gong gai mrô. Laih dong, tŏ tui pel ĕp, čih pơkra phrâo hơdôm hră pơ-ar djơ̆ tơlơi phiăn pơkŏn bơdjơ̆ nao. Hăng pran jua anun, tui Khua git gai pơ ala mơnuih ƀôn sang dêh čar ơi Trần Thanh Mẫn:

“Blung hlâo lĕ ječ ameč gum hrŏm prap lui, gir run pok pơhai jơlan hơdră čih pơkra tơlơi phiăn, tơlơi pơtrun thun 2025. Rơkâo khul apăn bruă Ping gah, kơnuk kơna, djop ding jum, gơnong bruă: Đing nao bruă pơphun lăng glăi, sem lăng bruă ngă tui, pel ĕp, rơkâo pơplih pơkra, pơhrua, čih pơkra phrâo tơlơi phiăn amăng bruă boh thâo ia rơgơi, boh thâo măi mok, pơplih pơčeh phrâo, pơplih mrô kiăng pơhlôm djơ̆ tơlơi rơkâo, djơ̆ tơlơi pơkă”.

Hăng Khul pơ ala mơnuih ƀôn sang djop gưl, Khua git gai pơ ala mơnuih ƀôn sang dêh čar rơkâo, hluai tui tơlơi sit nik, gum hrŏm ba tơbiă hơdră bruă tui tơlơi glăm ba kiăng pơtrut pơsur pơđĭ kyar kơsem min boh thâo ia rơgơi, boh thâo măi mok, pơplih pơčeh phrâo, pơplih mrô, hrưn đĭ klă dong amăng bruă mă, ba glăi tŭ yua mơng hơdôm anih anom kơnuk kơna, anom bơwih ƀong sĭ mơdrô, khul grup, ƀing mơnuih amăng ƀon lan.

Khua git gai pơ ala mơnuih ƀôn sang dêh čar ơi Trần Thanh Mẫn brơi thâo, tơlơi sit nik amăng lŏn ia ta ră anai hơmâo lu tơlơi kiăng pơsir hĭ, mơnuih ƀôn sang glăk dŏ tơguăn hăng čang rơmang nao hơdôm hơdră hơdră mơng Ping gah, Kơnuk kơna. Hăng pran jua anun, Khua pơ ala mơnuih ƀôn sang dêh čar amra tŏ tui pơplih kơtang, hrưn đĭ klă dong, tŭ yua bruă mă, anun lĕ tơlơi pơhiăp mơng Khua git gai Ping gah dêh čar ơi Tô Lâm amăng Jơnum klah čun bruă mă thun 2024, pok pơhai bruă jao thun 2025 mơng Kơnuk kơna hăng gong gai ƀon lan anun lĕ: amăng hrơi mông anai lŏn ia ta hơmâo tơlơi dưi hăng tơlơi gal, djop pran kơtang hăng tơlơi gir run kiăng yak nao rơnuk hrưn đĭ pơđĭ kyar, pơdrong asah mơng djuai ania; djop tơlơi dưi glăk rai pơ ƀing ta, ƀing ta kiăng tŭ mă lăp djơ̆, yua tơdah rơngiă hĭ, ƀing ta amra ngă soh hăng gru grua lŏn ia, soh hăng mơnuih ƀôn sang./.