Hrơi anai (20/4), Khua pơ ala mơnuih ƀôn sang dêh čar tal XVI pơphun jơnum tal 2 amăng jơnum lok blung a. Kơnuk kơna amra rơkâo đĭ bruă akŏ pơjing ƀôn prong Đồng Nai. Hrơi tal 2 jơnum blung a, Khua pơ ala mơnuih ƀôn sang dêh čar tal XVI pơphun hrơi anai (20/4) truh abih lơ (23/4). Khua pơ ala mơnuih ƀôn sang dêh čar amra pơgôp hiăp amăng lu boh tơhnal yôm phăn hăng amra pơsit tŭ yap hơdôm tơlơi phiăn hơmâo Khua pơ ala mơnuih ƀôn sang dêh čar pơgôp hiăp amăng jơnum tal 1.

Tui jơlan hơdră, mơguah anai, Khua ding jum gru grua, bơrơguăt drơi jăn hăng tuai čuă ngui, tui tơlơi jao bruă mơng Khua dêh čar amra pơđok hră pơ-ar lăi nao črăn tơlơi pơtrun mơng Khua pơ ala mơnuih ƀôn sang dêh čar kơ sa, dua tơhnal pơkă, hơdră bruă pơtrut pơđĭ kyar gru grua Việt Nam. Ăt amăng mơguah anai, ƀing khua mua pơčrông sai ƀơi Grup kơ črăn tơlơi pơtrun mơng Ƀirô Khua pơ ala mơnuih ƀôn sang dêh čar kơ tơhnal pơkă, hơdră bruă pơtrut pơđĭ kyar gru grua Việt Nam; črăn tơlơi pơtrun mơng Khua pơ ala mơnuih ƀôn sang dêh čar kơ ngă lông lăng pô phai kơđi; črăn tơlơi pơtrun mơng Ƀirô Khua pơ ala mơnuih ƀôn sang dêh čar kơ bruă akŏ pơjing ƀôn prong Đồng Nai.