Pơgôp bhiăp amăng črăn tơlơi phiăn čih pơkra, pơhrua sa, dua črăn amăng tơlơi phiăn djru ba djơ̆ tơlơi gal pô, boh tơhnal pok prong hăng lu mơnuih phara dưi djru ba djơ̆ tơlơi gal pô hơmâo lu tơlơi pơgôp hiăp mơng khua pơ ala mơnuih ƀôn sang. Tui ƀing khua mua, tơlơi pơkă anai ƀu djơ̆ kơnong bơdjơ̆ nao prong kơ bruă ngă bơkơnar amăng pơhlôm djơ̆ tơlơi gal pô đôč ôh mơ̆ ăt pơdah bruă pơđĭ kyar bơwih ƀong huă mơnuih mơnam amăng lŏn ia dong. Laih dong pơhrua ƀing mơnuih pơkŏn dong dưi djru ba soh sel, samơ̆ khua pơ ala mơnuih ƀôn sang Lý Anh Thư, grup An Giang brơi thâo:

“Bruă ba tơbiă tơhnak pơkă djru ba soh sel ăt pơƀuh lu anŏ aka ƀu klă anun lĕ ngă glêh tơnap brơi sang bruă prăk kơnuk kơna; aka ƀu pơhlôm abih bang mơnuih kiăng samơ̆ ƀu dong amăng grup djru soh sel. Yua anun, kâo rơkâo anom bruă čih pơkra kơsem min pơhrua tơhnal pơkă hrŏ trun prăk duh djru brơi tơlơi gal pô hrŏm hăng tơhnal pơkă djru brơi soh sel tui jơlan gah: pok prong ƀing mơnuih dưi djru brơi hăng mrô prăk duh gap ƀrô. Laih dong ƀing mơnuih hơmâo prăk pơhrui aset amra djru brơi soh sel djop mơta, bơ ƀing hơmâo prăk pơhrui gap ƀrô, mơnuih hyu mă bruă ƀudah mơnuih djuai ania ƀiă, ƀing gơñu ăt kiăng djru brơi ha bơnah prăk kak kiăng dưi tŭ mă tơlơi djru ba.”

Lăi pơtong, hơnong pơkă tuč rơnuč mơng hơdră bruă anai lĕ tŭ yua amăng wai pơgang tơlơi dưi lăp djơ̆ tơlơi gal mơng mơnuih arăng djru ba, khua pơ ala mơnuih ƀôn sang Cao Thị Xuân, grup Thanh Hóa brơi thâo, kiăng pơplih mơng pơhlôm hơmâo tơlơi bơwih brơi hơdai nao pơhlôm klă amăng bruă bơwih brơi:

“Mơng tơlơi sit nik ƀơi ƀon lan, ƀing gơmơi ƀuh, mơnuih ƀôn sang ƀu djơ̆ kơnong hơmâo djru brơi đôč ôh mơ̆ ăt hơmâo djru ba truh dưi, pơgang brơi tơlơi dưi sit nik. Tơdah ƀu ngă tui anun, pran đăo gơnang nao tơlơi tơpă sit amra bơdjơ̆ nao mơtăm. Yua anun, kâo rơkâo črăn tơlơi phiăn kiăng đing nao ƀiă dong bruă čih pơkra tơlơi phiăn hơdôm hơnong pơkă kơ bruă djru ba djơ̆ tơlơi gal pô. Laih dong kơsem min tơhnal pơkă sem lăng phara, pơlir hăng bruă jao tong ten mơng mơnuih ngă bruă djru ba anai, mơng anun pơhlôm djơ̆ sit nik, anăm ngă brơi hơmâo đôč ôh.”

Pơmĭn phara kơ bruă anai, khua pơ ala mơnuih ƀôn sang Nguyễn Thị Yến Nhi, grup Vĩnh Long rơkâo, anom bruă čih pơkra kơsem min, čih pơkra amăng tơlơi phiăn kơ hơbô̆ bruă khul gum hrŏ pơlir gơnong bruă djru brơi djơ̆ tơlơi gal pô amăng bruă ƀom kiơng.

“Lơm hơdôm anom bruă phiah phiăn ngă bruă phara, bruă ba tơbiă tơhnal pơkă gum hrŏm kơplah wah hơdôm anom bruă anai dŏ glăi ƀơi gưl, anun lĕ hră pơ-ar djơ̆ tơlơi phiăn yua anun pơhlôm djơ̆ tơlơi gal aka ƀu sit nik, bruă mă amăng hơdôm anom bruă ngă tui ăt aka ƀu klă. Lơm anun tơlơi rơkâo pơplih phiah phiăn pơhlôm brơi tơlơi dưi ană mơnuih, tơlơi dưi mơnuih ƀôn prong jai hrơi prong tui. Yua anun bruă ba boh tơhnal anai mut amăng tơlơi phiăn djru ba djơ̆ tơlơi gal pô lĕ kiăng biă mă, kah mơng dưi hơmâo tơlơi pơkă djơ̆ tơlơi phiăn kjăp ƀiă, pơhlôm mut hrŏm kơplah hăng djop gơnong bruă hăng hơđong sui pơ anăp amăng bruă ngă tui tơlơi dưi ană mơnuih.”

Hăng hơdôm črăn tơlơi phiăn Hộ tịch (čih pơkra glăi), sa, dua tơlơi pơgôp rơkâo hơdôm anom bruă bơdjơ̆ nao pel ĕp, kah pơpha hăng pơmut hrŏm hră pơ-ar hơmâo pơkă amăng tơlơi phiăn Hộ tịch glăk čih pơkra hăng tơlơi phiăn kak căn cước thun 2023. Khua pơ ala mơnuih ƀôn sang Tô Ái Vang, grup Cần Thơ brơi thâo:

“Kơ bruă măi mok hăng hră pơ-ar kiăng pơmut nao rai 100%, pơmut hrŏm hrơi mông ngă tui hăng mă yua mrô pơsit anăn pô ngă atur kiăng ĕp pơƀuh tơlơi čih lăi nao Hộ Tịch amăng VneID. Kơ bruă ngă hră pơ-ar, ngă tui ha bơnah bruă pơmut tơlơi čih lăi nao Hộ Tịch amăng VneID, mă hua VneID plih hĭ bruă ĕp mă hră pơ-ar pô.”

Dŏ pơmĭn phara hăng tơlơi pơkă amăng Črăn 2, tơlơi 7, hluai tui tơlơi sik nik, Khua jơnum min mơnuih ƀôn sang să dưi jao brơi pô pơkŏn kĭ djop hră pơ-ar Hộ Tịch, ƀu yap wŏt hră tơkeng, hră lăi pơthâo lơm djai, hră pơdô̆ rơkơi bơnai, Khua pơ ala mơnuih ƀôn sang Nguyễn Trường Giang, grup Lâm Đồng rơkâo lăng glăi tơlơi pơkă anai:

“Sa čô mơnuih djai kiăng hơmâo hră pơsit pô anai djai laih kah dưi ngă hră brơi nao dor. Ră anai ƀu brơi Khua jơnum min mơnuih ƀôn sang să jao brơi pô pơkŏn kĭ, mơ̆ lơm ñu nao pơ Hà Nội jơnum khua pơ ala mơnuih ƀôn sang, ha blan kah glăi, mơnuih ƀôn sang amra ngă hiưm pă ? hră tơkeng ta dưi dŏ tơguăn. Hră pơdô̆ rơkơi bơnai ăt kiăng tañ mơn kah mơng dưi ngă hră pơ-ar dong. Yua anun kâo rơkâo kiăng pơplih djơ̆ tơlơi sit nik kiăng pơhlôm gêh gal brơi mơnuih ƀôn sang”./.