VOV4.Jarai - Gum pơhiăp kơ tơlơi hră Čih pơkra Tơlơi phiăn bơwih ƀong sĭ mơdrô hră pơgang (pơplih pơkra), ƀing khua pơ ala rơkâo tâ̆o hloh anăm nô̆p Keh prăk pơgang mơnuih dưi pơgang tui tơlơi pơkă amăng hră čih pơkra Tơlơi phiăn. Khă hnun hai Ding jum prăk kak ăt rơkâo mơn djă pioh kiăng Kơnuk kơna gơgrong hlâo lăng nao bruă pơgang tơlơi dưi mơng mơnuih gum hrom. Tơlơi phiăn bơwih ƀong sĭ mơdrô hră pơgang (pơplih pơkra) hmâo tơlơi pơkă Keh prăk djă pioh khom hmâo hăng Keh prăk pơgang mơnuih blơi hră pơgang. Bôh than pơdŏng mơng 2 keh prăk anai leng kơ anăp nao truh pơhlôm bruă gơgrong mơng Anom bơwih ƀong sĭ hră pơgang lom ƀu dưi pơsir prăk, djru pơgang ba mơnuih blơi hră pơgang. Ƀing khua pơ ala ăt lăi mơn, hră čih pơkra Tơlơi phiăn sĭ hră pơgang (pơplih pơkra) khom pơhlôm djơ̆ hrơi tơlơi dưi mơng mơnuih blơi yua hră pơgang. Hơdôm khul anom bơwih ƀong sĭ hră pơgang khom mă yua rơđah rơđông hloh amăng bruă pơgang tơlơi dưi mơng mơnuih blơi hră pơgang. Tơlơi pơkă kơjăp bruă gơgrong mơng hơdôm bôh anom bơwih ƀong sĭ mơdrô hră pơgang amăng bruă mă yua tơlơi lăi pơthâo drơi pô mơng mơnuih blơi hră pơgang./.

Siu H’ Prăk: Pơblang